Kichay leenaykipaq

Índice nisqaman riy

 66 WILLAKUY

Esdras Diospa leyninta yachachin

Esdras Diospa leyninta yachachin

Judiokuna Jerusalenman kutipusqankumantaqa 70 watañan pasaran. Chaywanpas wakin judiokunaqa Persia nacionpa llaqtankunapin tiyaranku. Jujninmi karan Esdras, payqa Jehová Diospa leyninta yachachiq sacerdoten karan. Esdrasqa uyarisqan Jerusalenpi tiyaq judiokuna Diospa leyninta mana kasukusqankuta, jinan riyta munaran paykunata yanapananpaq. Rey Artajerjesmi niran: “Diosmi yachayta qosunki leyninta yachachinaykipaq. Chhaynaqa qanwan riyta munaqkunata pusarikuspa viajay”, nispa. Jinan Esdrasqa Jerusalenman ripuyta munaqkunata juñuran. Diosmantataq mañakuranku viajasqankupi cuidananpaq, jinaspa viajaranku.

Tawa killapin Jerusalenman chayaranku. Jinan umalliqkunaqa Esdrasta niranku: “Llaqtanchismanta runakunaqa idolokunata adoraq warmikunawanmi casarakunku”, nispa. Chaymi Esdrasqa judío runakunaq ñaupanpi qonqorikuspa Diosmanta mañakuran: “Jehová Diosniy, imaymanatan noqaykupaq ruwaranki, noqaykutaq qan contra juchallikuyku”, nispa. Jinan judiokunaqa juchankumanta pesapakuranku. Chaywanpas mana allinkunatan ruwashallaranku, chaymi Esdrasqa umalliqkunata juezkunatawan ajllaran allinta investiganankupaq. Jinan kinsa killapi Diosta mana adoray munaqkunata qarqopuranku.

Chay pasasqanmantaqa 12 watan pasaran. Chay watakunapin Jerusalén llaqtaq perqankunata jatarichiranku. Esdrasqa wajmantan runakunata juñuspa paykunaq ñaupaqenpi Diospa leyninta leeran. Diospa qelqanta kichaqtinmi runakunaqa sayariranku. Jinan Esdrasqa Jehová Diosta alabaran runakunapas makinkutan oqariranku. Chay qhepamanmi Esdrasqa Diospa leyninta leespa explicaran. Runakunaqa tukuy yuyaywanmi uyariranku. Jinan reparakuranku wajmanta Diosmanta karunchakusqankuta, jinaspa waqaykuranku. Qhepantin p’unchaymi Esdrasqa Diospa leyninta leellarantaq. Chaypin Israel runakunaqa  yacharanku ch’ujlla ruway fiestata ruwanankuña kasqanta, jinan alistakuranku chay fiestapaq.

Israel runakunaqa qanchis p’unchaymi chay fiestata kusisqa ruwaranku. Diostan agradecekuranku allinta cosechasqankumanta. Josuepa tiemponpi jinaraqmi ruwaranku fiesta ruwayta tukuspataq mañakuranku: “Jehová Diosniy qanmi esclavo kasqaykumanta librawarankiku. Ch’inneqpin mijuyta qowarankiku, kay sumaq allpatataq qowarankiku. Noqaykun ichaqa askha kutipi juchallikurayku. Profetakunataña kachamuranki chaypas, manan kasukuraykuchu. Chaywanpas pacienciakurankin. Manan Abrahanman prometesqaykita qonqarankichu. Chaymi kunan prometekuyku qanta kasukunaykupaq”, nispa. Jinan prometekusqankuta qelqaranku, jinaspa umalliqkuna, leví runakuna, sacerdotekunapas firmaranku.

‘Diospa siminta uyarispa waqaychaqkuna kusisqa kachunku’ (Lucas 11:28)