Salmos 69:1-36
Takiqkunata pusariqpaq. “Liriokuna”* nisqaman jina. Davidpa takin.
69 Diosníy, salvaway, unukunan millp’uyta munashawan.+
2 T’urumanmi chinkaykushani,manan mayman saruyta atinichu.+
Unuq sonqonpin kashani,manchay unun apapushawan.+
3 Wajakusqaypin sayk’usqaña kashani,+kunkaypas ch’ajallañan kashan.
Diosniyta qhawapakusqaypin ñawiypas sayk’upunña.+
4 Chujchaymantapas aswan askhan yanqapas qasi cheqniwaqkunaqa kanku.+
Askhan kanku wañuchiyta munawaqkunapas, traicionero runakunapas.
Manan imatapas suwakurqanichu,ichaqa suwamanta jinan kaqniykunata qechuwanku.
5 Diosníy, qanqa allintan yachanki mana allin yuyayniyoq kasqayta,juchayqa manan qanmantaqa pakasqachu kashan.
6 Tukuy munayniyoq Señor, amayá qanpi suyakuqkunaqa p’enqachisqachu kachunku,ejercitokunata kamachiq Jehová Dios, amayá noqaraykuqa mayqenninkupas p’enqaypiqa tarikuchunchu.
Israelpa Diosnin, amayá qanta maskhaqkunaqa pisichasqachu kachunku,amapuni noqaraykuqa sarunchasqachu kachunku.
7 Qanraykun pisichasqa kashani,+sinchi p’enqachisqan kashani.+
8 Wayqeykunapas manan reqsipuwanñachu,mamaypa wawankunapaqqa mana reqsisqa runa jinan kapuni.+
9 Wasiyki munakusqaymi nina jinaraq sonqoypi raurarishan,+k’amiqniykikunaq k’amikuyninqa noqapin kashan.+
10 Ayunashaqtiymi waqashaqtiymi, pisichawarqanku,chaykuna ruwaqta rikuspan asipayawarqanku.
11 Qhasqa p’achawan churakuqtiypas asipayawarqankun,paykunaq pisichananmi, asipayananmi karqani.
12 Llaqta punkukunapi tiyaqkunan noqamanta rimanku,machaqkunan noqamanta takikunata paqarichinku.
13 Diosníy Jehová, wajakusqayta uyariykuway,chaskinayki tiempopi mañakusqayta chaskiykuway.+
Diosnilláy, mana tukukuq ancha munakuyniykipi kutichimuway,qanmi libraqniyqa kanki, libraq kasqaykita rikuchiway.+
14 T’uru ukhumanta orqoway,ama chinkaykunayta munaychu.
Cheqnikuwaqniy runakunamanta libraway,unu sonqomanta orqoway.+
15 Ama munaychu manchakuy mayuq apawananta,+ama munaychu chinkay-chinkay unu millp’uwananta,ama munaychu unu t’oqo* millp’uwanantapas.+
16 Jehová Diosnilláy, mana tukukuq munakuyniykipi uyariway;+may khuyapayakuq kayniykipi noqaman kutirimuway.+
17 Noqa kamachiykimanta ama uyaykita pakaychu.+
Diosníy, usqhaylla uyarimuway, may llakisqan kashani.+
18 Qayllaykamuway, libraway,enemigoykunamanta salvaway.
19 Qanmi pisichasqa kasqayta yachanki,qanmi p’enqaypi tarikusqayta, k’umuchisqa kasqayta yachanki.+
Contraypi kaqkunataqa llapantan rikushanki.
20 Pisichasqa kasqaywanmi mayta sonqoy nanashan,mana thaniy atiytan sonqoy nanashawan.
Khuyapayasqa kanaypaqmi piensasharqani,ichaqa manan pipas khuyapayawarqanchu;+kallpachasqa kanaypaqmi yuyaykusharqani,ichaqa manan pipas kallpachaqniy karqanchu.+
21 Aswanmi mijunaypaq venenota* qowarqanku,+ch’akiyniypaqtaq vinagreta jaywawarqanku.+
22 Mijunanku* paykunapaq juj trampa kachun,allinyasqankupas, qhapaqyasqankupas toqlla kachun.+
23 Ñawinkupas arphayapuchun, ama rikuchunkuchu,cinturankupas, chakankupas pasaqta khatatatachun.*
24 Phiñakuyniykita paykunaman jich’aykuy,k’araq phiñakuyniykita paykunaman chayachimuy.+
25 Karpa-karpankupas ch’in kapuchun,karpankupiqa amaña pipas tiyachunchu.+
26 Pitachus castigasqaykitan paykunaqa qatikachanku,k’irisqayki runakunaq nanayninmantan mana sayk’uspa rimashanku.
27 Juchankumanta castigasqa kachunku,ama paykunataqa chaninpaqqa qhawariychu.
28 Kausay libromanta borrasqa kachunku,+ama chanin runakunawan kuskaqa qelqasqa kachunkuchu.+
29 Kay sufriq runata, ñak’ariq runata ichaqa qan yanapaykuway,+Diosnilláy, kallpayki librawachun, atiyniyki pakaykuwachun.
30 Diospa sutinmanmi jatunchay takikunata takisaq,graciasta qoy simikunawanmi jatunchasaq.
31 Jehová Diospaqqa chaymi toromantapas aswan sumaqqa kanqa,chaymi allin poqosqa malta toromantapas aswan sumaqqa kanqa.+
32 Llamp’u sonqo runakunan chaykunata rikunqaku jinaspa kusikunqaku.
Diosta maskhaqkuna, sonqoykichis kusirikuchun.
33 Jehová Diosqa wajchakunaq wajakusqantan uyarishan;+payqa manan jinallatachu qhawanqa presochasqa llaqtantaqa.+
34 Janaq pachapas kay pachapas payta jatunchachun,+lamar-qochapas llapa chaypi kaqkunapas payta alabachun.
35 Diosmi Siontaqa libranqa,+paymi Judá llaqtataqa jujmanta jatarichinqa,chaypin llaqtan runakuna tiyanqaku.*
36 Kamachinkunaq miraynin runakunan chayta chaskikunqaku,+sutinta munakuq runakunan chaypi tiyanqaku.+
Uraypi willakuykuna
^ Chaypiqa yaqapaschá musicaq imayna uyarikusqanmanta otaq imayna tocakusqanmanta rimashan.
^ Chaypiqa wañuymantan rimashanman.
^ Chaypiqa “venenoyoq qorata” nillanmantaqmi.
^ Hebreo rimaypiqa “Mesanku” ninmi.
^ Khatatataytaqa “kharkatiy” nillankutaqmi.
^ Chaypiqa chay jallp’ata dueñochakapunankumantan rimashan.
