Salmos 60:1-12
Takiqkunata pusariqpaq. “Yuyarichiq lirio”* nisqaman jina. Mijtan.* Davidpa takin. Yachachinapaq. Kay takitan Davidqa paqarichirqan Aram-Narainwan, Aram-Zobawan maqanakuspa. Joabtaq kutimuspa Kachi wayq’opi chunka iskayniyoq waranqa Edom runakunata wañuchirqan.+
60 Diosniyku, qanqa manañan munakapuwankikuchu,qanqa lliutan ñut’upuwankiku.+
Sinchitan noqaykupaq phiñakurqanki.
Kunanqa, ¡jujmantayá chaskiykuwayku!
2 Qanmi kay pachata chhafchirirqanki, qanmi jallp’ata kicharirqanki.
Kay jallp’aqa thunikapushanñan, raqrankunata* allichay.
3 Llaqtaykitan imaymana llakikunapi tarichirqanki.
Kinray-kinray purichikuq vinotan ujachiwarqankiku.+
4 Qanta manchakuqkunaman juj señalta rikuchiy,*chayta rikuspan flechakunamanta ayqekunqaku. (Séla).
5 Chhaynapin munakusqayki runakunaqa librasqa kanqaku.
Paña makiykiwan librawayku, mañakusqaykuta uyarimuwayku.+
6 Ch’uya kayninpin* Diosqa rimarimun:
“May kusisqan Shejen pampata herenciata jina t’aqasaq,+Sucoj wayq’o pampatapas medisaq.+
7 Galaadqa noqaqmi, Manasespas noqaqmi,+Efraintaq umayman churakunay casco;*
Judataq kamachikunay vara.+
8 Moabqa maqchikunay puruñan.+
Edommanmi usut’ayta choqasaq,+Filisteata atipaspaytaq kusisqa qaparisaq”,+ nispa.
9 ¿Pin muyuykusqa llaqtaman* apawanman?
¿Pin Edom llaqtakama pusawanman?+
10 ¡Qanllan Diosniyku chaypiqa yanapawankikuman!
Ichaqa manañan qanqa noqaykuwanchu kashanki,manañan soldadoykutapas puriysinkiñachu.+
11 Llapa llakikuyniykupi yanapawayku,runakunamanta jamuq yanapayqa yanqan.+
12 Diosmi kallpata qowasunchis,+paymi cheqniwaqninchis runakunata sarunqa.+
Uraypi willakuykuna
^ Chaypiqa yaqapaschá musicaq imayna uyarikusqanmanta otaq imayna tocakusqanmanta rimashan.
^ Raqrataqa “laqra” nillankutaqmi.
^ Chaypiqa yaqapaschá “juj señalta rikuchirqanki” nillanmantaq.
^ Chaypiqa yaqapaschá “Ch’uya tiyananmantan” nillanmantaq.
^ Hebreo rimaypiqa “allin ruwasqa perqa” ninmi.
^ Chaypiqa yaqapaschá “allin perqasqa llaqtaman” nillanmantaq.
