Salmos 113:1-9
113 ¡Jehová* Diosta jatunchaychis!*
Jehová Diosta serviqkuna, payta jatunchaychis,Jehová Diosta sutinmanta alabaychis.
2 Jehová Diospa sutin jatunchasqa kachun,kunanmanta wiñay-wiñaypaq payqa jatunchasqa kachun.+
3 Inti lloqsimuy ladomanta inti jaykuy ladokama jatunchasqa kachun,Jehová Diospa sutillan alabasqa kachun.+
4 Jehová Diosqa llapa nacionkunamanta aswan altopin kashan;+jatun kayninqa, lliflli kayninqa cielomantapas aswan altopin kashan.+
5 ¿Pin Diosninchis Jehová Dios jina kanman?+
¿Pin janaq pachapi tiyaq* Dios jina kanman?
6 Payqa cielota jallp’a pachatawan qhawarinanpaqmi k’umuykamun,+
7 pampamanta* wajcha runata oqarinanpaqmi k’umuykamun.
Wajcha runatan uspha montonmanta* oqarin,+
8 autoridadkunaq ladonpin tiyaykachin,llaqtanpi umallikunaq ladonpin tiyaykachin.
9 Mana wijsallikuy atiq warmimanmi wawakunata qon,wawakunayoq kusisqa warmimanmi tukuchin.+
¡Jehová* Diosta jatunchaychis!*
Uraypi willakuykuna
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
^ Chaypiqa “¡Aleluya!” nillanmantaqmi.
^ Chaypiqa “janaq pachapi trononpi tiyaq” nillanmantaqmi.
^ Hebreo rimaypiqa “polvomanta” ninmi.
^ Chaypiqa yaqapaschá “q’opa wijch’unamanta” nillanmantaq.
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
^ Chaypiqa “¡Aleluya!” nillanmantaqmi.
