Salmos 107:1-43
107 Jehová Diosta “gracias” niychis,payqa sumaq sonqo Diosmi;+mana tukukuq munakuyninqa* wiñay-wiñaypaqmi.+
2 Chayta nichunku Jehová Diospa librasqankuna,enemigoq makinmanta* kacharichisqankuna,+
3 waj llaqtakunamanta pusamusqankuna,+inti lloqsimuy ladomanta, inti jaykuy ladomanta pusamusqankuna,wichay ladomanta, uray ladomanta apamusqankuna.+
4 Ch’in ladopin, ch’aki jallp’apin kayman jaqayman purirqanku;manan maypichus tiyanankupaq juj llaqtaman apaq ñanta tarirqankuchu.
5 Yarqasqan ch’akisqan purirqanku,sinchi sayk’uska kaspan pisi kallpayarqanku.
6 May llakisqan Jehová Diospa yanapayninta mañakurqanku,+jinan payqa ñak’ariyninkumanta paykunata librarqan.+
7 Allin ñannintan, chanin ñannintan paykunata pusamurqan,+tiyananku llaqtaman apaq ñannintan paykunata pusamurqan.+
8 Llapa runakuna Jehová Diosta “gracias” nichunku,+mana tukukuq munakuyninmanta graciasta qochunku,runakunarayku musphanapaq kaqkunata ruwasqanmanta graciasta qochunku.+
9 Paymi ch’akichikuqpa ch’akiyninta thasnun,paymi yarqachikuqta allin mijunawan sajsachin.+
10 Wakinqa sinchi laqhayaq* ukhupin tiyasharqanku,presochasqan, cadenakunawan watasqan kasharqanku.
11 Paykunaqa Diospa simin contran jatarirqanku,ancha jatun Diospa munaynin* contran sayarirqanku.+
12 Jinan payqa paykunaq sonqonta imaymana llakiwan ñit’irqan;+urmarqankun, manan pipas yanapaqninku karqanchu.
13 May llakisqan Jehová Diospa yanapayninta mañakurqanku,jinan payqa ñak’ariyninkumanta paykunata librarqan.
14 Sinchi laqhayaq ukhumantan paykunata orqorqan,jap’iqninku cadenakunatan lliuta p’itirqan.*+
15 Llapa runakuna Jehová Diosta “gracias” nichunku,mana tukukuq munakuyninmanta graciasta qochunku,+runakunarayku musphanapaq kaqkunata ruwasqanmanta graciasta qochunku.
16 Cobre punkukunatan urmachirqan,fierro trancanakunatan p’akirqan.+
17 Mana yuyayniyoq kayninkupin imaymana ñak’ariypi tarikurqanku,+juchankuraykun, pantasqankuraykun imaymanawan ñak’arirqanku.+
18 Llapa mijunakunatan millakapurqanku,wañuy punkumanmi qayllaykurqanku.
19 May llakisqan Jehová Diospa yanapayninta mañakurqanku,jinan payqa ñak’ariyninkumanta paykunata librarqan.
20 Qhaliyachisqa kanankupaqmi kamachikurqan,+urmaykusqanku t’oqokunamantan orqomurqan.
21 Llapa runakuna Jehová Diosta “gracias” nichunku,mana tukukuq munakuyninmanta graciasta qochunku,runakunarayku musphanapaq kaqkunata ruwasqanmanta graciasta qochunku.
22 Graciasta qonapaq sacrificiota qochunku,+imaymana ruwasqankunamanta may kusisqa willachunku.
23 Lamar-qochanta barcokunapi puriqkunan,manchakuy jatun qochanta llank’aspa puriqkunan,+
24 Jehová Diospa ruwasqankunata rikunku,unu ukhupi musphanapaq ruwasqankunatan rikunku.+
25 Juj rimariyllawan manchay wayra jatarichisqantan rikunku,+juj simillawan lamar-qochata aytichisqantan rikunku.
26 Unun paykunataqa cielokamaraq oqarin,uraykamuspataq may ukhumanraq chinkaykunku.
Mana allinpi tarikunankuta yachaspan manchakuymanta khatatatanku.*
27 Machasqa runa jinan kayman jaqayman wijch’uykachakunku,may yachayniyoqña kanku chaypas yanqan chayqa.+
28 Chhayna llakipi kaspankun Jehová Diospa yanapayninta mañakunku,+jinan payqa ñak’ariyninkumanta paykunata libran.
29 Manchay wayratan llamp’uyachin,lamar-qochaq sinchi aytikusqantan sayachin.+
30 Unuq samp’ayasqanta rikuspan kusikunku;payqa maymanchus chayanankumanmi allillanta chayachin.
31 Llapa runakuna Jehová Diosta “gracias” nichunku,mana tukukuq munakuyninmanta graciasta qochunku,runakunarayku musphanapaq kaqkunata ruwasqanmanta graciasta qochunku.+
32 Payta askha runakuna ukhupi jatunchachunku,+umalliqkunaq* juñukusqan ukhupi alabachunku.
33 Payqa mayukunatan aqo pampaman tukuchin,unu pujyukunatan ch’aki pampaman tukuchin,+
34 sumaq allin jallp’atan q’ara jallp’aman tukuchin;+chaypi tiyaqkuna mana allinkunata ruwasqanraykun chhaynaman tukuchin.
35 Aqo pampakunatan carrizoq* wiñanan unu pampaman tukuchin,ch’aki jallp’akunatan pujyu-pujyuman tukuchin.+
36 Yarqasqakunatan chaypi tiyachin,+llaqtata jatarichinankupaqmi chayman churan.+
37 Paykunan chajrakunata llank’anku,uvas sach’akunatan plantanku;+chay chajrakunataq allinta mijuyta qon.+
38 Diosmi paykunata bendecin, askhamanmi tukuchin;uywankunapas manan pisiyanchu, mirashallanmi.+
39 Chaywanpas wajmantan paykunaqa pisiyapunku,ñak’ariypi, mana allinpi, nanaypi tarikuspan k’umuchisqa kanku.
40 Payqa autoridadniyoq runakunatan pisichan,ch’in pampakunapin, ch’usaq pampakunapin comunta purichin.+
41 Wajchakunatan* ichaqa sarunchaymanta pakaykun;+paykunaq familiantan askhaman tukuchin,mana yupay atiy ovejakunaman jinaraqmi tukuchin.
42 Chanin runakunaqa chaykunata rikuspan kusikunku,+mana chanin ruwaqkunan ichaqa ch’in kapunku.+
43 Yachayniyoq runaqa allintan chaykunapi yuyaykunqa,+may kusikuywanmi Jehová Diospa ruwasqankunata t’aqwinqa,mana tukukuq munakuyninpin t’aqwinqa.+
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “atiyninmanta” nillanmantaqmi.
^ Laqhayaqtaqa “tutayaq” nillankutaqmi.
^ Chaypiqa “yuyaychaynin” nillanmantaqmi.
^ P’itiytaqa “t’ipiy” nillankutaqmi.
^ Khatatataytaqa “kharkatiy” nillankutaqmi.
^ Chaypiqa “kuraq runakunaq” nillanmantaqmi.
^ Carrizotaqa “soqos, caña” nillankutaqmi.
^ Wajchataqa “pobre” nillankutaqmi.
