Romanos 8:1-39
-
Espirituwan kausaypas libre kaypas kasqanmanta (1-11)
-
Diospa espiritun imatachus sut’ita rikuchisqanmanta (12-17)
-
Llapa kamasqakuna Diospa wawankuna jina libre kayta suyashasqankumanta (18-25)
-
Espíritu noqanchispaq mañakusqanmanta (26, 27)
-
Qallariymantapacha pikunatachus Dios ajllasqanmanta (28-30)
-
Diospa munakuyninwan tukuy imatapas atipanamanta (31-39)
8 Chhaynaqa, Cristo Jesuswan jujllachasqa kaqkunaqa manan juchachasqachu kanku.
2 Santo espirituq kamachikuyninmi Cristowan jujllachasqa kaqkunaman kausayta qon, chay kamachikuymi librarqasunkichis+ juchaq kamachikuyninmanta, wañuypa kamachikuyninmantawan.
3 Runakunaqa juchasapa kasqankuraykun kamachikuy simitaqa mana llapantachu junt’ayta atirqanku, chaymi chay kamachikuyqa mana salvayta atirqanchu;+ Diosmi ichaqa kamachikuy simiq mana ruway atisqanta ruwarqan.+ Payqa juchayoq runaman rijch’akuqta+ Churinta kachamuspan+ juchata chinkachirqan, chhaynapin runapi kaq juchata juchacharqan.
4 Chayqa karqan kamachikuy simipi kaq chanin kamachikuykunata junt’ananchispaqmi.+ Chay kamachikuytaqa espirituq munasqanman jina purispan junt’anchis,+ manan aychanchispa munasqanman jina purispachu.
5 Pipas aychaq munasqanman jina kausaqqa aychaq munaynillanmanmi yuyayninta churan,+ espirituq munayninman jina kausaqmi ichaqa espirituq munayninman yuyayninta churan.+
6 Aychaq munayninman yuyayta churayqa wañuymanmi apan,+ espirituq munayninman yuyayta churaymi ichaqa kausayman thaj kayman ima apan;+
7 aychaq munayninman yuyayta churaqkunaqa Diospa enemigonmi kapunku,+ paykunaqa manan Diospa kamachikuyninta kasukunkuchu ni kasukuytapas atinkumanchu.
8 Chhaynaqa aychaq munayninman jina puriqkunaqa manan atinkumanchu Diospa sonqonpaq jina kaytaqa.
9 Diospa espiritunchus qankunapi kashan chayqa, manan aychaq munayninman jinachu purinkichis, aswanpas espirituq munayninman jinan.+ Chaymantapas mayqenpichus Cristoq espiritun mana kan chayqa, manan Cristoqchu.
10 Ichaqa Cristochus qankunawan jujllachasqa kashan chayqa,+ aycha cuerpoykichisña jucharayku wañusqa kashan chaypas, santo espiritun kausayta qosunkichis Diospa ñaupanpi chanin kasqaykichisrayku.
11 Chayrayku, wañusqakuna ukhumanta Jesucristota kausarichimuqpa+ espiritunchus qankunapi kashan chayqa, chay espirituwanmi payqa wañuq cuerpoykichistapas kausarichimunqa.+
12 Chhaynaqa, wayqeykuna,* manan aychanchistaqa kasunanchischu, chhaynapi ama munayninman jina kausananchispaq.+
13 Aychaq munayninman jinachus kausankichis chayqa, wañunkichismi. Ichaqa espirituq yanapayninwanchus cuerpoq ruwayninkunata wañuchinkichis chayqa,+ kausankichismi.+
14 Diospa espiritunwan llapa pusachikuqkunaqa Diospa wawankunan kanku.+
15 Qankunaqa manan kamachi kanaykichispaqchu nitaq wajmanta manchasqa kanaykichispaqchu espiritutaqa chaskirqankichis, aswanpas Diospa wawankuna jina chaskisqa kanaykichispaqmi chay espirituqa qankunaman qosqa karqan. Chay espiritun kallpachawanchis: “¡Aba,* Papáy!”,+ nispa wajakunanchispaqpas.
16 Diospa espiritunmi sonqonchispi* sut’ita rikuchin+ Diospa wawankuna kasqanchista.+
17 Wawankunachus kanchis chayqa, herenciatapas chaskillasuntaqmi, Cristoq chaskisqan herenciatan noqanchispas chaskisun.+ Cristo jinachus ñak’arisun chayqa,+ pay jinan jatunchasqa kallasuntaq.+
18 Chhaynaqa, kunan tiempopi ñak’arisqanchisqa manan imapaschu kanqa jamuq tiempopi Diospa rikuchinan jatun premionchiswan tupanachisqaqa.+
19 Llapa kamasqakunan makillaña suyashanku Diospa wawankuna lliflli kaywan rijurimunanta.+
20 Kamasqakunaqa yanqa kausaymanmi jap’ichisqa karqanku,+ ichaqa manan paykunaq munayninpichu, aswanpas chay jap’ichiqninpa munayninpin, chaywanpas jap’ichiqninqa qorqanmi juj suyakuyta.
21 Kamasqakunaqa ismusqa kayman watasqa kasqankumantan kacharichisqa kanqaku,+ jinaspa Diospa wawankuna jina libre kapunqaku.
22 Yachasqanchis jina, kamasqakunaqa llapankun juj nisqalla khuyayta waqashanku, kunankamataqmi nanaypi kashanku.
23 Manan paykunallachu waqashanku, herencianchismanta ñaupaq kaq parte santo espirituta chaskiqkunapas waqashanchismi,+ Diospa wawankuna jina chaskisqa kananchista suyakunanchiskaman+ khuyayta sonqonchispi waqashanchis. Payqa aycha cuerponchismanta kacharichisqa kananchispaq Cristo preciota pagasqanraykun wawanta jina chaskikapuwasun.
24 Noqanchisqa chay suyakuy yuyaywanmi salvasqa karqanchis; ichaqa ima suyakusqanchistapas rikusunmanña chaskisunmanña chayqa, manan suyakuyñachu kanman. ¿Imaynatan pipas imatapas suyakunman ñataq chaskirunmanña chayqa?
25 Ichaqa manaraqtaq suyakusqanchista+ chaskinchisraqchu chayqa,+ pacienciallawanmi suyakushananchis.+
26 Jinaspapas espirituqa yanapawasunmi kallpanchis pisiyaqtin.+ Mayninpiqa yaqapaschá imamantapas mañakuyta munashaspa mana imaniytapas atisunchu, chay ratukunapin espirituqa sonqonchispi khuyayta waqasqanchista mana imayna willakuyta atiqtinchis noqanchispaq mañapuwasun.
27 Sonqota t’aqwiq Diosqa+ yachanmi imatachus espíritu ch’uya runakunapaq mañakushan chayta, espirituq mañakusqan Diospa munayninman jina kasqanrayku.
28 Yachasqanchis jina, Diosqa munakuqninkunaq allin kanan yuyaywanmi tukuy imatapas ruwan; paykunaqa munayninman jina wajasqakunan kanku.+
29 Diosqa qallariymantapachan yacharqanña wakin runakuna ajllasqa kanankuta; paykunatan ajllarqan Churinman rijch’akuq kanankupaq,+ chhaynapi chay Churi wayqenkuna ukhupi+ phiwi* kananpaq.+
30 Chay ajllasqankunatan+ payqa wajarqan,+ wajasqankunatataq chaninpaq qhawarirqan,+ chaninpaq qhawarisqankunatataq jatuncharqan.+
31 Chhaynaqa, ¿imanisuntaq chaykunamanta? Noqanchiswantaq Dios kashan chayqa, ¿pitaq contranchispiri kanman?+
32 Payqa manan Churintapas jark’arqanchu ñak’arinanmanta, aswanmi llapanchisrayku wañunanpaq entregarqan,+ ¿chaychu wakin cosaskunatapas Churinwan kuska ancha kusikuywan mana qowasunman?
33 ¿Pitaq Diospa ajllasqankuna contrari rimanman?+ Dios kikinmi paykunataqa chaninpaq qhawarin.+
34 ¿Pitaq paykunatari juchachanman? Manan pipas. Cristo Jesusmi paykunarayku wañurqan, jinaspa kausarichisqa karqan; payqa Diospa paña ladonpin kashan,+ chaypin Diosmanta rogapushawanchis.+
35 ¿Imataq Cristoq munakuyninmantari t’aqawasunman?+ ¿Ñak’ariy? ¿Llakisqa kay? ¿Qatikachasqa kay? ¿Yarqay? ¿Mana p’achayoq kay? ¿Wañuy patapi tarikuy? ¿Espadawan amenazasqa kay?+ Manan imapas t’aqawasunmanchu.
36 Qelqasqan kashan: “Qanraykun tukuy tiempo wañuy patapi tarikuyku, ñak’anapaq ovejakuna jinan rikusqa kayku”,+ nisqa.
37 Ichaqa munakuwaqninchispa yanapayninwanmi tukuy chaykunata atipashanchis.+
38 Noqaqa allintapunin yachani: Manan ni wañuypas, ni kausaypas, ni angelkunapas, ni autoridadkunapas, ni kay tiempopi ima kaqpas, ni jamuq tiempopi ima kaqpas, ni atiykunapas,+
39 ni altopi kaqpas, ni ukhupi kaqpas, ni ima kamasqapas Señorninchis Cristo Jesuspi Diospa munakuyninmantaqa t’aqawasunchu.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Aba simiqa yaqapaschá kashan arameo rimaypi otaq hebreo rimaypi, chayqa “papáy” ninantan nin. Chhaynatan wawakuna munakuywan respetowan papankuta niqku.
