Proverbios 3:1-35
3 Churilláy, ama yachachikuyniykunata qonqaychu,kamachikuyniykunatapas tukuy sonqo kasukuy;
2 chhaynapin unayta kausanki,askha watakunan thaj kaypi kausanki.+
3 Mana tukukuq munakuytapas* junt’aq kaytapas* amapuni saqeychu.+
Munay collarta jina kunkaykiman walqakuy.
Sonqoykipi chaykunata qelqay.+
4 Jinan Diospa ñaupanpipas runaq ñaupanpipas sumaq qhawarisqa kanki,+allin reparaq kasqaykimantan allin reqsisqa kanki.
5 Tukuy sonqoykiwan Jehová Diospi confiay,+amataq qan kikiykiq yachasqallaykimanchu jap’ipakuy.*+
6 Tukuy ima ruwasqaykipi payta yuyariy,+paymi allin kaq ñanta reqsichisunki.+
7 Ama yachayniyoqmanqa tukuychu,+Jehová Diosta manchakuy, mana allin kaqmantapas t’aqakuy.
8 Chayqa cuerpoykipaqmi* jampi kanqa,tulluykikunatan kallpachanqa.
9 Valorniyoq kaqniykikunawan Jehová Diosta jatunchay,+chajraykiq ñaupaq kaq* rurusqankunawan payta jatunchay.+
10 Jinan mijuy waqaychanaykikunaqa junt’a kashanqa,+vino waqaychanaykikunapas* mosoq vinowanmi phoqchinqaraq.
11 Churilláy, ama Jehová Diospa wanachisqantaqa pisichaychu,+ama anyasqantapas cheqnikuychu,+
12 Jehová Diosqa munakusqan runakunatan anyan,+imaynan juj taytapas munakusqan churinta anyan jinata.+
13 May kusisqan yachayta tariq runaqa,+may kusisqan allin reparayta yachaq runaqa.
14 Yachayta tariymi aswan allin qolqe tariymantaqa,yachayniyoq kaymi aswan allin qori tariymantaqa.+
15 Yachayqa coralkunamantapas* astawanraqmi valen,manan runaq ima munasqanwanpas igualakunmanchu.
16 Paña makinpin kashan unayta kausay,lloq’e makinpitaq kashan qhapaq kay jatunchay ima.
17 Ñanninkunaqa ancha sumaqmi,lliu purinankunapas thaj kaywanmi junt’a kashan.+
18 Yachayqa kausay sach’an,pipas payman k’askakuqqa kusisqan kausanqa.+
19 Jehová Diosqa yachaywanmi kay jallp’aq cimentacionninta churarqan.+
Allin yuyaywanmi cielotapas tajyachirqan.+
20 Yachayninwanmi ukhu pacha unukunatapas t’aqarqan,yachayninwanmi cielopi phuyukunatapas sullachimurqan.*+
21 Churilláy, ama chaykunata* qonqaychu.
Allin yachayniyoq kaytapas allin yuyaykuq kaytapas waqaychay.
22 Chaykunan kausayta qosunki,kunkaykipaqmi munay collar jina kanqa.
23 Chaypachan mana imata manchakuspa ñanniykita purinki,chakiykipas manan misk’akunqachu.+
24 Puñuykuspaykipas manan imatapas manchakunkichu,+misk’itan puñunkipas.+
25 Manan ima ñak’ariytapas manchakunkichu,+millay runaman chayamuq ñak’ariytapas manan manchakunkichu,manchay wayra jina ñak’ariytapas manan manchakunkichu.+
26 Jehová Diosmi thaj kayta qosunki,+manan munanqachu chakiyki trampaman urmanantapas.+
27 Yanapana kaqkunataqa yanapashallay,+atishaspaqa yanapashallay paykunata.+
28 Kunan qoyta atishaspaqa, ama runamasiykita niychu:
“¡Ripuy! ¡Kutimunkiña! Paqarinña imallatapas qosayki”, nispaqa.
29 Qanpi confiaq runamasiykita mana allinta ruwanaykipaqqa,ama ima mana allintapas yuyaykuychu.+
30 Ama yanqapas qasiqa piwanpas maqanakuychu,+contraykipi mana imatapas ruwashaqtinqa ama maqanakuychu.+
31 Ama millay runata envidiakuychu,+amataq imaynatachus kausasqanta jinaqa kausaychu.
32 Jehová Diosqa cheqnikunmi millay runakunataqa,+chanin runakunawanmi ichaqa sonqota tupachin.+
33 Jehová Diosqa millay runaq wasintan ñakan,+chanin runakunaq wasintan ichaqa bendecin.+
34 Payqa asipayakuqkunamantan asikun,+llamp’u sonqokunatan ichaqa sumaqta qhawarin.+
35 Yachayniyoqkunaqa jatunchaytan tarinqaku,mana yuyayniyoqkunan ichaqa pisichasqa kanqaku.+
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “cheqaq kaqtapas” nillanmantaqmi.
^ Chaypiqa “yachasqallaykipichu confiay” nillanmantaqmi.
^ Hebreo rimaypiqa “puputiykipaqmi” ninmi.
^ Chaypiqa “allin kaq” nillanmantaqmi.
^ Chaypiqa “uvas sarunaykikunapas” nillanmantaqmi.
^ Sullataqa “chhulla” nillankutaqmi.
^ Chaypiqa ñaupaq versiculokunapi willasqan jina Dios imaynachus kasqanmantan rimashanman.
