Proverbios 16:1-33
16 Runaqa sonqonpin yuyaykun* imatapas ninanpaq,Jehová Diosmi ichaqa yanapan allinta kutichinanpaq.+
2 Runapaqqa tukuy ima ruwasqanpas allinkaman* piensasqanman jinaqa,+Jehová Diosmi ichaqa qhawan imaraykus imatapas ruwashan chayta.+
3 Tukuy ima ruwasqaykita Jehová Diospa makinman saqey,+jinan yuyaykusqaykikunaqa junt’akunqa.
4 Jehová Diosqa imaymanatan ruwan munayninta junt’ananpaq,millay runakunatapas chinkachinqapunin.+
5 Jehová Diosqa cheqnikunmi llapa jatunchakuq sonqoyoqkunata,+paykunaqa castigasqapunin kanqaku, manan chaymantaqa iskayanaykichu.
6 Mana tukukuq munakuywan* junt’aq kaywan iman juchaqa perdonakun,+runaqa Jehová Diosta manchakuspan mana allin kaqmanta karunchakun.+
7 Runaq imayna kausasqanwan Jehová Dios kusikun chayqa,enemigonkunawanpas thajpin paytaqa kausachin.+
8 Aswan allinqa chanin kaqta ruwaspa pisillata tariymi,+mana chanin kaqta ruwaspa askhata tariymantaqa.+
9 Runaqa sonqonpin yuyaykun imachus ruway munasqanta,Jehová Diosmi ichaqa maynin purinanta nin.+
10 Reyqa Diospa munayninman jinan imatapas rimanan,+payqa manan jayk’aqpas mana chanintaqa ruwananchu.+
11 Jehová Diospan chanin balanzapas chanin romanapas,bolsapi pesana rumikunapas paypa ruwasqanmi.+
12 Reykunaqa cheqnikunkun mana allin ruwaykunataqa,+chanin kaywan kamachikuqtinkun trononkuqa allin tajyachisqa kanqa.+
13 Chanin rimaykunan reykunataqa kusichin.
Cheqaqllata rimaqkunatan paykunaqa munakunku.+
14 Reypa k’araq phiñakuyninqa wañuymanta willakuq jinan,+yachayniyoq runan ichaqa thasnuykun.*+
15 Reypa sumaq qhawarisqan runaqa kusisqan kausanqa,allinpaq qhawariyninqa tiempollanpi parata chayachimuq phuyu* jinan.+
16 ¡Qorita tariymantaqa yachayta tariymi aswan allinqa!+
Qolqeta tariymantaqa allin reparaq kaymi aswan allinqa.+
17 Allin kaqta ruwaqkunaqa mana allinmantan t’aqakunku.
Imayna kausasqanta qhawakuqqa pay kikintan waqaychakun.+
18 Jatunchakuyqa ch’usaqyachiymanmi apan,uma oqariyqa urmachinmi.*+
19 Aswan allinqa llamp’u sonqo runakuna ukhupi juch’uyaykukuq kaymi+uma oqariqkunawan imachus qechusqakunata rakinakuymantaqa.
20 Allin reparaq runapaqqa ima ruwasqanpas allinmi lloqsinqa,Jehová Diospi confiaq runaqa may kusisqan.
21 Yachayniyoq runaqa allin entiendeq nisqan kanqa,+misk’i simiwan rimaqtaqa astawanmi creenku.+
22 Allin reparaqpaqqa allin reparaq kayninmi kausay pujyu,mana yuyayniyoqkunatan ichaqa mana yuyayniyoq kayninku muchuchin.
23 Yachayniyoq runaqa allin yachaywanmi riman,+rimasqankunaqa creenapaq jinapunin.
24 Sumaq rimasqakunaqa miel misk’i jinan,misk’illañan, tullukunatan qhaliyachin.+
25 Kanmi runaq piensasqanman jina allinman rijch’akuq ñan,chay ñanmi ichaqa wañuyman apan.+
26 Mijunanpaqmi runaqa astawanraq llank’an,yarqay qatirisqanraykun llank’an.+
27 Mana valeq runaqa mana allin ruwaykunatan maskhan,+rimasqankunapas nina rauray jinan.+
28 Ch’aqwata jatarichiq runaqa churanakuykunatan jatarichin,+yanqa tumpaqqa allin amigokunatan t’aqanachin.+
29 Millay runaqa runamasintan pantachin,mana allin ñannintan pusan.
30 Mana allinta ruwananpaq yuyaykuspan ñawinta ch’illmin,mana allin kaqta ruwaspan asikun.
31 Chanin ñanpi puriqpa yuraq chujchanqa+may munay, may sumaq corona jinan.+
32 Kallpasapa runamantaqa pacienciakuq* runan+ aswan allinqa,juj llaqtata jap’ikapuqmantaqa genionta controlakuqmi aswan allinqa.+
33 Runakunaqa Jehová Diostan tapukunku sorteaspanku,*+paytaq imachus yuyaykusqanta sut’inchamun.+
Uraypi willakuykuna
^ Chaypiqa “sonqonpa yuyaykusqantan kamachin” nillanmantaqmi.
^ Hebreo rimaypiqa “ch’uyakaman” ninmi.
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “ayqekun” nillanmantaqmi.
^ Chaypiqa abril killapi jina poqoy tiempo paramantan rimashan. Qhaway “Astawan yachanapaq B15” nisqata.
^ Chaypiqa “misk’achinmi” nillanmantaqmi.
^ Chaypiqa “mana usqhaylla phiñakuq” nillanmantaqmi.
