Proverbios 15:1-33
15 Sumaq simiwan rimayqa phiñakuytan thasnun,+k’araq simin ichaqa phiñakuyta jatarichin.+
2 Yachayniyoqkunaqa allin kaqkunatan yachasqankuwan ruwanku,+mana yuyayniyoqkunan ichaqa comunta rimanku.
3 Jehová Diospa ñawinqa lliutan rikushan,millay runakunatapas allin runakunatapas rikushanmi.+
4 Sumaq simiwan rimayqa kausay sach’an,+yanqa rimaykunan ichaqa sonqota ñit’in.
5 Mana yuyayniyoqqa taytanpa wanachiynintan pisichan,+allin yuyayniyoqmi ichaqa anyayta chaskikun.+
6 Chanin runaq wasinpiqa askhan kan valorniyoq cosaskuna,millay runamanmi ichaqa imachus tarisqankuna sasachakuyta apamun.+
7 Yachayniyoqkunaq siminqa imaymana yachaytan ch’eqerichin,+mana yuyayniyoqkunan ichaqa mana chayta ruwankuchu.+
8 Jehová Diosqa millay runakunaq sacrificio jaywasqantan cheqnikun,+chanin runakunaq mañakusqanwanmi ichaqa anchata kusikun.+
9 Jehová Diosqa cheqnikunmi millay runakunaq imaynachus kausasqanta,+chanin kaqta ruwananpaq kallpachakuqtan ichaqa munakun.+
10 Allin ñanta saqepuqqa wanachiytan cheqnikun,+anyaykusqata llapa cheqnikuqkunan ichaqa wañunqaku.+
11 Jehová Diosqa rikushanmi Sepulturatapas* wañusqakunaq ismusqan ukhutapas,*+¡¿chaychu mana rikunman runakunaq sonqonta?!+
12 Burlakuq runaqa manan anyaqninta munakunchu,+manan yachayniyoq runakunatapas tapukunchu.+
13 Kusisqa sonqoqa uyatan k’anchachin,llakisqa sonqon ichaqa kallpata wañuchin.+
14 Reparaq sonqoqa imaymana yachaytan maskhan,+mana yuyayniyoqkunan ichaqa mana allinta rimaspa kusikunku.+
15 Llakisqa runapaqqa sapa p’unchaypas sasakaman,+kusisqa* sonqoyoqmi ichaqa sapa p’unchaypas kusikun.+
16 Aswan allinqa pisi kaqniyoq kaspa Jehová Diosta manchakuymi,+imaymanayoq kaspa llakisqa kaymantaqa.+
17 Aswan allinqa munakuypa kasqanpi verdurakuna mijuymi,+cheqnikuypa kasqanpi wirayachisqa* toro aycha mijuymantaqa.+
18 Millay genioyoq runaqa ch’aqwatan jatarichin,+pacienciakuq* runan ichaqa ch’aqwata thanichin.+
19 Qellaq ñanninqa kiskawanmi junt’a kashan,+allin kaqta ruwaqkunaq ñanninmi ichaqa pampalla.+
20 Yachayniyoq churiqa taytantan kusichin,+mana yuyayniyoq runan ichaqa mamanta pisichan.+
21 Mana yuyayniyoqqa mana yuyayniyoq kayninwanmi kusikun,+allin yuyayniyoq runan ichaqa allin ñannillanta purin.+
22 Mana rimanakuy* kaqtinqa imachus yuyaykusqakunan qollupun,askha yuyaychaqkuna kaqtinmi ichaqa allin imapas lloqsin.+
23 Runaqa allinta kutichisqanwanmi kusikun,+¡may allinmi tiempollanpi rimasqa simiqa!+
24 Allin reparaqqa kausay ñanpin kashan, chay ñanqa wichaymanmi apan,+Sepulturaman* uraykunamantan pakaykun.+
25 Jehová Diosqa jatunchakuqpa wasintan thuninqa,+viudaq jallp’anpa linderonkunatan* ichaqa pakaykunqa.+
26 Jehová Diosqa millay runaq yuyaykusqankunatan cheqnikun,+sumaq rimaykunan ichaqa paypaqqa ch’uya.+
27 Mana allinkunata ruwaspa qhapaq kayta tariqqa wasintan sasachakuyman* churan,+lluk’iykuyta cheqnikuqmi ichaqa kausashallanqa.+
28 Chanin runaqa manaraq rimashaspan sonqonpi allinta yuyaykun,+millay runakunaq siminmi ichaqa millayta riman.
29 Jehová Diosqa millay runamantan karunchakun,chanin runaq mañakusqantan ichaqa uyarin.+
30 Kusisqa uyawan qhawariyqa sonqotan kusirichin,allin willakuyqa tullukunatan kallpachan.+
31 Kausachiq anyaykuyta uyarikuqqa,yachayniyoq runakuna ukhupin tiyanqa.+
32 Wanachiyta mana chaskikuqqa kausaynintan pisichan,+anyaykuyta uyarikuqmi ichaqa allin reparaq kayta tarin.+
33 Jehová Diosta manchakuyqa yachayniyoq kanaykipaqmi yanapasunki,+humilde sonqo kanki chayqa jatunchasqan kanki.+
Uraypi willakuykuna
^ Hebreo rimaypiqa “Abadontapas” ninmi.
^ Chaypiqa “allin” nillanmantaqmi.
^ Hebreo rimaypiqa “uywa qaranapi mijuchisqa” ninmi.
^ Chaypiqa “mana usqhaylla phiñakuq” nillanmantaqmi.
^ Chaypiqa “Yuyaychayta mana mañakuy” nillanmantaqmi.
^ Linderotaqa “colinda, qorpa” nillankutaqmi.
^ Chaypiqa “p’enqayman” nillanmantaqmi.
