Mateo 17:1-27
17 Soqta p’unchay qhepamantaq Jesusqa Pedrota, Santiagota, Santiagoq wayqen Juantawan juj alto orqoman pusarqan.+
2 Paykunaq ñaupanpin Jesuspa rijch’ayninqa jujnirayman tukurqan, uyanmi inti jinaraq k’ancharirqan, jawa p’achanpas sinchi yuraqmanmi* tukurqan.+
3 Chayllamanmi paykunaqa rikurqanku Moisesta Eliastawan Jesuswan rimashaqta.
4 Jinan Pedroqa Jesusta nirqan: “Señor, noqaykupaqqa ancha allinmi kaypi kasqaykuqa. Munanki chayqa, kinsa karpakunata kaypi ruwarusaq, jujta qanpaq, jujta Moisespaq, jujtataq Eliaspaq”, nispa.
5 Pedro rimashallaqtinraqmi sinchi k’anchashaq phuyu paykunata llanthuykurqan, chayllamantaq chay phuyu ukhumanta juj kunka nimurqan: “Kaymi munakusqay Churiyqa, payqa sonqoypaq jinan,+ payta uyariychis”,+ nispa.
6 Discipulonkunataq chayta uyarispa sinchi manchasqa pampakama k’umuykurqanku.
7 Jesustaq asuykuspa paykunata llamiykurqan, nirqantaq: “Sayariychis, ama manchakuychischu”, nispa.
8 Jinan paykunaqa qhawarispa mana pitapas rikurqankuchu, aswanmi Jesusllata rikurqanku.
9 Orqomanta uraykamushaqtinkun Jesusqa paykunata kamachirqan: “Aman pimanpas willankichischu chay rikusqaykichistaqa runaq Churin wañusqanmanta jatarichisqa kanankama”,+ nispa.
10 Discipulonkunataq tapurqanku: “¿Imaraykutaq kamachikuy simita yachachiqkunari, Eliasraqmi ñaupaqtaqa jamunan, ninku?”,+ nispa.
11 Jesustaq nirqan: “Cheqaqtapunin Eliasqa ñaupaqta jamunqa, paymi tukuy imatapas allichanqa.+
12 Ichaqa niykichismi: Ñan Eliasqa jamurqanña, paykunataq mana reqsirqankuchu, aswanmi tukuy ima munasqankuta payta ruwarqanku.+ Chhaynallataqmi runaq Churinwanpas kanqa, paykunaq makillankupitaqmi ñak’arinqa”,+ nispa.
13 Chaykunawanmi discipulonkunaqa repararqanku bautizaq Juanmanta rimashasqanta.
14 Runakunaq kasqanman riqtinkutaq+ juj runa Jesusman qayllaykurqan, qonqoriykuspataq nirqan:
15 “Señor, churiyta khuyapayay, ataque* onqoyniyoqmi, sinchitataqmi ñak’arinpas; sapa kutillanmi urmaykun ninamanpas unumanpas.+
16 Chaymi discipuloykikunaman pusamurqani, paykunataq mana qhaliyachiyta atinkuchu”, nispa.
17 Jesustaq nirqan: “Yau mana iñiyniyoq juchasapa runakuna,*+ ¿jayk’aqkaman qankunawan kasaq? ¿Jayk’aqkaman aguantasaykichis? Pusamuwaychis chay waynachata”, nispa.
18 Pusamuqtinkutaq Jesusqa chay waynachapi kaq supayta phiñarikurqan, jinan supayqa lloqsipurqan, waynachataq kasqan ratu qhaliyapurqan.+
19 Chaymantataq discipulonkunaqa sapaqllapi payman asuykuspa tapurqanku: “¿Imanaqtintaq noqaykuri mana qarqoyta atirqaykuchu?”, nispa.
20 Chaymi Jesusqa nirqan: “Pisi iñiyniyoq kasqaykichisraykun. Cheqaqtan niykichis: Iñiyniykichischus mostaza muju sayayllapas kanman chayqa, kay orqotan niwaqchis: Kaymanta jaqayman suchuriy, nispa, jinan suchurinman, manataq imapas qankunapaqqa mana atikuqqa kanmanchu”,+ nispa.
21 *——
22 Galileapi juñunasqa kashaqtinkun Jesusqa nirqan: “Runaq Churinqa enemigonkunaq makinmanmi jap’ichisqa kanqa,+
23 paykunan wañuchinqaku, kinsa p’unchaymantataq kausarichisqa kanqa”,+ nispa. Chaymi paykunaqa maytapuni llakikurqanku.
24 Capernaún llaqtaman chayaqtinkun templomanta impuesto* cobraqkunaqa Pedroman qayllaykuspa nirqanku: “¿Paganchu yachachiqniykichis templomanta impuestota?”,+ nispa.
25 Pedrotaq nirqan: “Arí, paganmi”, nispa. Wasiman jaykuqtin jinataq Jesusqa nirqan: “Simón, ¿imaniwaqtaq? ¿Pimantataq kay pacha reykunari impuestokunata* cobranku? ¿Wawankunamantachu icha waj runakunamantachu?”, nispa.
26 Pedrotaq nirqan: “Waj runakunamantan”, nispa. Jinaqtinmi Jesusqa nirqan: “Chhaynaqa wawankunaqa manan paganankuchu ¿riki?
27 Chaywanpas, paykunata ama phiñachinapaq+ qochaman rispa anzuelota wijch’uykamuy, jinaspa ñaupaqta jap’isqayki challwaq siminta kicharinki, chaypin tarinki juj qolqeta.* Chayta paykunaman qomunki noqamanta qanmantawan”, nispa.
Uraypi willakuykuna
^ Griego rimaypiqa “k’anchay jina yuraqmanmi” ninmi.
^ Chaypiqa “epilepsia” nillanmantaqmi.
^ Chaypiqa “kay tiempo runakuna” nillanmantaqmi.
^ Kay versiculoqa manan rijurinchu Westcott, Hort runakunaq ruwasqanku griego rimay qelqapi nitaq wakin allin reqsisqa qelqakunapipas. Qhaway “Astawan yachanapaq A3” nisqata.
^ Griego rimaypiqa “didracma qolqe” ninmi, chayqa karqan iskay p’unchay jornal qolqen. Qhaway “Astawan yachanapaq B14” nisqata.
^ Chaypiqa sapanka runaq paganan impuestomantan rimashallanmantaq.
^ Griego rimaypiqa “juj estater qolqeta” ninmi. Chayqa tetradracma qolqen kanman karqan. Qhaway “Astawan yachanapaq B14” nisqata.
