Lucas 18:1-43
18 Chaymantataq Jesusqa mana sayk’uspa Diosmanta mañakunapuni kasqanta+ yachachinanpaq juj rijch’anachiyta* willarqan,
2 nirqanmi: “Juj llaqtapin karqan juj juez, payqa manan Diosta manchakuqchu nitaq runakunatapas respetaqchu.
3 Chay llaqtapin kallarqantaq juj viuda, paymi rillaqpuni chay juezman: Ama jinachu kay, justiciata ruwapuway contraypi kaqmanta, nispa;
4 chay juezqa manan kasuqchu. Chaymantan ichaqa sonqollanpi nirqan: Manaña Diosta manchakunichu ni pi runatapas respetanichu chaypas,
5 jinatapas kay viudapaq justiciata ruwapusaq, chhaynapi amaña sapa ratu jamuwananpaq, mana chayqa jamushallanqan rogakuyninkunawan sayk’uchiwaqniy,+ nispa”.
6 Chaymantataq Señorqa nirqan: “¿Repararqankichischu chay mana chanin juezpa imachus nisqanta?
7 Chhaynaqa, ¿manachu Diosqa tuta-p’unchay wajakuqnin ajllasqankunapaq justiciata ruwapunqa?+ Chaymantapas payqa pacienciakunqan paykunapaq.+
8 Niykichismi: Payqa mana suyachikuspan justiciata ruwapusunkichis. Ichaqa runaq Churin chayamuspa, ¿tarinqachu chhayna iñiyta kay pachapi?”, nispa.
9 Wakin runakunan chanin runapaq qhawarikuspa jujkunata mana imapaq valeqta jina qhawariqku, paykunata rimapayaspan Jesusqa juj rijch’anachiyta willarqan:
10 “Iskay runakunan temploman wicharqanku Diosmanta mañakuq, jujninmi karqan fariseo jujnintaq impuesto cobraq.
11 Fariseon sayaykuspa sonqollanpi khaynata mañakurqan: Diosníy, graciastan qoyki, manan wakin runakuna jinachu kani suwa, mana chanin, jujwan pantaq, manallataqmi kay impuesto cobraq runa jinapaschu kani.
12 Noqaqa iskay kutitan semanapi ayunani, tukuy adquirisqaymantan diezmotapas qoni,+ nispa.
13 Impuesto cobraqtaq ichaqa karullapi sayaykuspa mana munarqanchu cielota qhawariyllatapas, aswanpas sonqonta takakuspan nirqan: Diosníy, khuyapayaykuway noqa juchasapa runata,+ nispa.
14 Niykichismi: Chay runan wasinman uraykapurqan fariseomanta aswan chaninpaq jap’isqa.+ Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”,+ nispa.
15 Runakunan wawankuta Jesusman apamusharqanku llamiykunanpaq, jinan discipulonkunaqa chayta rikuspa runakunata phiñarikurqanku.+
16 Jesustaq ichaqa wawakunata payman apamunankupaq khaynata nirqan: “Jinalla wawakunaqa noqaman jamuchunku, ama jark’aychischu, Diospa gobiernonqa paykuna jina kaqkunapaqmi.+
17 Cheqaqtan niykichis: Pipas Diospa gobiernonta mana juj wawa jinachu chaskinqa chayqa, manapunin chaymanqa jaykunqachu”,+ nispa.
18 Kamachiq umallikunamanta jujninmi Jesusta tapurqan: “Allin yachachikuq, ¿imatan ruwanay wiñay kausayta chaskinaypaq?”,+ nispa.
19 Jinan Jesusqa nirqan: “¿Imaraykun allin niwanki? Manan pipas allinqa kanchu, aswanpas Diosllan.+
20 Qanqa yachankimá riki: Aman jujwan pantankichu,+ aman pitapas wañuchinkichu,+ aman suwakunkichu,+ aman pitapas yanqamanta tumpankichu,+ tayta-mamaykitapas sumaqtan qhawarinki,+ nisqa kamachikuykunataqa”, nispa.
21 Paytaq nirqan: “Chaykunataqa juch’uychaymantapachan junt’ashani”, nispa.
22 Chayta niqtinmi Jesusqa nirqan: “Kanraqmi juj ruwanayki: Llapa kaqniykikunata vendemuspa wajchakunaman rakimuy, chhaynapin janaq pachapi qhapaq kayniyki kanqa; jinaspa qatikamuway”,+ nispa.
23 Chayta uyarispan payqa sinchitapuni llakikurqan qhapaqllaña kasqanrayku.+
24 Jesustaq payta qhawaykuspa nirqan: “¡May sasapunin qolqesapakunapaqqa Diospa gobiernonman jaykuy kanqa!+
25 Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”,+ nispa.
26 Chayta uyariqkunataq nirqanku: “Chhaynaqa, ¿pillañataq salvasqari kanman?”,+ nispa.
27 Chaymi Jesusqa nirqan: “Runakunapaq mana atikuqqa atikuqmi Diospaqqa”,+ nispa.
28 Jinan Pedroqa nirqan: “Noqaykuqa imaymanaykuta saqespan qatikamushaykiku”,+ nispa.
29 Jesustaq paykunata nirqan: “Cheqaqtan niykichis: Pipas wasintapas, esposantapas, wayqenkunatapas, tayta-mamantapas, wawankunatapas Diospa gobiernonrayku saqeqqa+
30 astawanraqmi kay tiempopi chaskinqa, jamuq tiempopitaq* wiñay kausayta chaskinqa”,+ nispa.
31 Chaymantataq Jesusqa chunka iskayniyoq apostolkunata juj ladoman pusaspa nirqan: “Kunanqa Jerusalén llaqtamanmi wichasunchis, chaypin junt’akunqa runaq Churinmanta profetakunaq llapa qelqasqan.+
32 Waj nacionmanta runakunamanmi entregasqa kanqa;+ paykunan asipayanqaku,+ k’aminqaku, thoqaykunqaku ima;+
33 soq’aykusqanku qhepatataq wañuchinqaku,+ ichaqa kinsa p’unchaymantan kausarimpunqa”,+ nispa.
34 Paykunaqa manan entienderqankuchu chaykunata; paykunapaqqa pakasqan chay simikunaqa kasharqan, chaymi mana chay nisqanta entienderqankuchu.
35 Jericó llaqtaman Jesús qayllaykushaqtinmi juj ñausa runa ñan patapi tiyashasqa limosnata mañakuspa.+
36 Askha runakuna chayninta pasashasqanta uyarispataq chay runaqa tapukurqan: “¿Iman kashan?”, nispa.
37 Jinan nirqanku: “¡Nazaret llaqtayoq Jesusmi kayninta pasashan!”, nispa.
38 Chayta niqtinkun payqa fuerteta wajakurqan: “¡Davidpa Churin Jesús, khuyapayaykuway!”, nispa.
39 Jinan ñaupaqta rishaqkunaqa payta phiñarikurqanku upallananpaq, paytaq ichaqa astawanraq wajakurqan: “¡Davidpa Churin, khuyapayaykuway!”, nispa.
40 Jinan Jesusqa sayaykuspa kamachikurqan chay runata payman pusamunankupaq, payman qayllaykuqtintaq Jesusqa tapurqan:
41 “¿Ima ruwapunaytan munanki?”, nispa. Jinan payqa nirqan: “Señor, ñawiyta kichariway”, nispa.
42 Jesustaq payta nirqan: “Kicharikuchun ñawiyki; iñiyniykin qhaliyachisunki”,+ nispa.
43 Jinan chay runaqa kaq ratu qhawarirqan, jinaspa Diosta jatunchaspa Jesusta qatikurqan.+ Runakunapas chaykuna pasasqanta rikuspan Diosta jatuncharqanku.+
Uraypi willakuykuna
^ Chaypiqa “ejemplota” otaq “tupanachiyta” nillanmantaqmi.
^ Qhaway Explicasqa simikuna nisqapi “Tiempo, pacha” nisqata.
