Job 38:1-41
-
Runaqa mana imapaschu kasqanta Jehová Dios rikuchisqanmanta (1-41)
38 Chaymantataq Jehová Diosqa manchay wayra ukhumanta Jobta nimurqan:+
2 “¿Pin qan kanki ima nisqaytapas* mana valeqman tukuchinaykipaq?
¿Imatan mana yachaspa rimashanki?+
3 Alistakuy, qhari jina sayay,kunanmi noqa tapusayki, qantaq kutichiwanki.
4 ¿Maypin kasharqanki kay pachaq cimentacionninta churashaqtiy?+
Yachanki chayqa willaway chayta.
5 ¿Pin kay pacha imayna sayayniyoqchus kananta nirqan?
¿Pin kay pachata medina waskhawan medirqan? Yachanki chayqa niway.
6 ¿Ima patapin cimentacionnin churasqa kashan?
¿Pin esquina jap’iq rumita churarqan?+
7 Pacha illarimuy ch’askakuna+ kusikuymanta qaparishaqtinku,llapa angelkunapas*+ kusikuymanta t’aqllakushaqtinku, ¿maypin kasharqanki?
8 ¿Pin lamar-qochata punkuwan jina jark’arqan?+
¿Pin manchayta phatamushaqtin* wisq’arqan?
9 Phuyuwan p’achachishaqtiypas,yana phuyuwan walthashaqtiypas,*
10 maykamachus chayamunanta nishaqtiypas,punkunkunata trancanankunata churashaqtiypas,+
11 kaykamallan chayamunki nishaqtiypas,manchay phoqchiqesqaykiqa kayllapin tukunqa nishaqtiypas,+ ¿maypin qan kasharqanki?
12 ¿Jayk’aqllapas illarimuyta kamachirqankichu?
¿Jayk’aqllapas nirqankichu mayninta rijurimunanta?+
13 ¿Qanchu illarimuyta kamachirqanki kay pachaq k’uchunkunaman chayananpaq?
¿Qanchu kamachirqanki mana allin ruwaqkunata qatinanpaq?+
14 K’anchaywanmi kay pachaqa t’uruta sellowan nit’iyusqa jina munayman tukun,p’achapi adorno churasqa jinan munayman tukun.
15 Millay runakunaq k’anchayninqa qechusqan kapun,mana allin ruwayninkunapas tukuchisqan kapun.
16 ¿Jayk’aqllapas jaykurqankichu lamar-qocha unuq phullpumusqanman?
¿Jayk’aqllapas jaykurqankichu lamar-qocha tutayaq ukhuman?+
17 ¿Pillapas rikuchirqasunkichu wañuypa punkunkunata?+
¿Rikurqankichu sinchi laqhayaqpa* punkunkunata?+
18 ¿Yachankichu may jatunchus kay pacha chayta?+
Chaykunata yachanki chayqa niway.
19 ¿Maynintan rikun k’anchaypa wasinman?+
¿Maypin laqhayaq tiyan?
20 ¿Qan payta pusawaqchu wasinman?
¿Reqsinkichu wasinman riq ñanta?
21 ¿Paykunaq ñaupantaraqchu qan nacerqanki?
¿Unay watakunañachu qan kausashanki chaykunata yachanaykipaq?
22 ¿Jaykurqankichu qan rit’i waqaychanayman?+
¿Rikunkichu qan chijchi waqaychanayta?+
23 Chaykunatan noqaqa sinchi llakikuy tiempopaq waqaychashani,chaykunatan maqanakuy p’unchaypaq, guerra p’unchaypaq waqaychashani.+
24 ¿Maymantan k’anchay paqarimun?
¿Maymantan inti lloqsimuymanta jamuq wayra paqarimun?+
25 ¿Pin yarqhata* kicharqan para jich’akamunanpaq?
¿Pin ñanta ruwarqan manchay phuyupas rayo t’ojaypas lloqsimunanpaq?+
26 ¿Pin mana piqpa tiyasqanman parachimun?
¿Pin runaq mana tiyasqan ch’in pampaman parachimun?+
27 ¿Pin ch’aki pampata unuwan sajsachin?
¿Pin chayta qarpaspa pastokunata wiñachin?+
28 ¿Taytayoqchu para?+
¿Pin sullata* churiyarqan?+
29 ¿Pin chullunkuq maman?
¿Pin cielomanta jamuq rit’ita wachakurqan?+
30 ¿Pin lamar-qocha unuta rumiman jina tukuchin?
¿Pin lamar-qocha patatapas chullunkuman tukuchin?+
31 ¿Atiwaqchu Kimá nisqa ch’askakunaq waskhanta watayta?
¿Atiwaqchu Kesil nisqa ch’askakunaq waskhantapas paskayta?+
32 ¿Atiwaqchu Ash* nisqa ch’askakunata wawakunantinta pusayta?
¿Atiwaqchu juñu-juñu ch’askakunata tiempollanpi lloqsichimuyta?
33 ¿Yachankichu cielopi kaqkunapaq* ima kamachikuykuna kasqanta?+
¿Atiwaqchu chay kamachikuykunatapas kay pachapi churayta?
34 ¿Atiwaqchu phuyukunata kamachiyta?
¿Atiwaqchu qan pataman parachimuyta?+
35 ¿Atiwaqchu rayo t’ojachimuyta?
¿Jayk’aqllapas nisunkikumanchu: Kaypin kashayku, nispa?
36 ¿Pin yachayta qorqan phuyukunaman?+
¿Pin yachayta qorqan cielopi kaqkunaman?+
37 ¿Pin yachayniyoq kanman phuyukunata yupananpaq?
¿Pin atinman cielopi kaq unu p’uyñukuna jich’aykamuyta?+
38 ¿Pin ñut’u jallp’ata t’uruman tukuchinman?
¿Pin chaykunata paykunapurata k’askanachinman?
39 ¿Atiwaqchu leonpaq mijuna jap’iyta?
¿Atiwaqchu malta leonkuna sajsachiyta?+
40 ¿Atiwaqchu paykunaman mijuchiyta t’oqonkupi kumparayashaqtinku,imatapas jap’inankupaq pakallapi suyakushaqtinku?
41 ¿Pin cuervoman* mijunata qon+ chiuchinkuna Diospa yanapayninta mañakuqtinku?
¿Pin paykunata mijuchin mijunata maskhaspa kayman jaqayman puriqtinku?
Uraypi willakuykuna
^ Chaypiqa “ima ruwasqaytapas” nillanmantaqmi.
^ Hebreo rimaypiqa “Diospa llapa wawankunapas” ninmi.
^ Hebreo rimaypiqa “nacemushaqtin” ninmi.
^ Chaypiqa “p’istushaqtiypas, qatashaqtiypas” nillanmantaqmi.
^ Laqhayaqtaqa “tutayaq” nillankutaqmi.
^ Yarqhataqa “larqha, sanja” nillankutaqmi.
^ Sullataqa “chhulla” nillankutaqmi.
^ Chay sutikunaqa juñu-juñu ch’askakunaq sutinmi. Kay jallp’amanta qhawariqtinchismi chay ch’askakunaqa rikukun animal formapi, imaymana formakunapi ima.
^ Chaypiqa intimanta, killamanta, ch’askakunamanta iman rimashan.
^ Cuervoqa yana anka jinan. Sayayninmi kuskan metro jina, rafran kicharisqataq juj metro más.
