Job 2:1-13
2 Chaymantan angelkunaqa*+ Diosman qayllaykunanku p’unchaypi Jehová Diospa ñaupanman jaykurqanku,+ Satanaspas Jehová Diospa ñaupanmanmi paykunawan kuska jaykullarqantaq.+
2 Jinan Jehová Diosqa Satanasta tapurqan: “¿Maymantan jamushanki?”, nispa. Satanastaq Jehová Diosta nirqan: “Kay jallp’a pachaq k’uchun-k’uchunta purimusqaymantan jamushani”,+ nispa.
3 Chaymantataq Jehová Diosqa Satanasta nirqan: “¿Rikumurqankichu kamachiy Jobta? Manan pipas pay jinaqa jallp’a pachapi kanchu. Payqa mana juchachanatan, chanintan kausan,+ payqa Dios manchakuq runan, manataqmi ima mana allintapas ruwanchu. Qanqa maytan munashanki Jobta mana juchanmanta wañunankama ñak’arichinayta,+ chaywanpas payqa junt’aq sonqollan kashan”,+ nispa.
4 Satanasmi ichaqa Jehová Diosta nirqan: “Runaqa payllapin piensan,* kausayninta salvananraykuqa imatapas ruwallanmanmi.
5 Sichus kunan aychantapas tulluntapas makiykiwan k’iriwaq chayqa uyaykipipunin ñakasunki”,+ nispa.
6 Chaymi Jehová Diosqa Satanasta nirqan: “Payqa makiykipin kashan. ¡Ichaqa aman wañuchinkichu!”, nispa.
7 Jinan Satanasqa Jehová Diospa ñaupanmanta ripurqan, jinaspa Jobta sinchi millay ch’upu onqoywan tukuchirqan.+ Chay onqoyqa chaki puntanmanta uma patankama Jobta jap’irqan.
8 Jinan Jobqa manka p’akisqa k’arpata* jap’ispa chaywan k’irinta qhetukurqan, jinaspa uspha patapi tiyaykurqan.+
9 Chaymantataq esposanqa nirqan: “¿Chhaynaña kashaspapas junt’aq sonqollapunichu Diospaq kashanki? ¡Diosta ñakay, jinaspa wañuy!”, nispa.
10 Jobmi ichaqa nirqan: “Mana yuyayniyoq warmikuna jinan rimashanki. Diosmantaqa allin kaqtapas chaskikunchistaq chayqa, ¿manachu mana allinkunatapas chaskikunanchis?”,+ nispa. Chhaynaña kashaspapas Jobqa manapunin rimaspaqa juchallikurqanchu.+
11 Jobpa kinsa amigonkunan* yacharusqaku sinchi ñak’ariykunapi tarikushasqanta, jinan sapankanku payta watukuq jamurqanku. Paykunan karqanku Temán llaqtamanta Elifaz,+ Shúa llaqtamanta+ Bildad,+ Namá llaqtamanta Zofarpiwan.+ Paykunan llaqtankumanta jamurqanku Jobta llakipayanankupaq kallpachanankupaq ima.
12 Jobta rikuspaqa manan paykunaqa reqsiytapas atirqankuchu, qayllaykuspankutaq waqayta qallarirqanku, p’achankutapas llik’ikurqanku, jallp’atapas janaqman jach’ispan umankuta jallp’achakurqanku.+
13 Chay kinsantin amigonkunan Jobta qanchis p’unchay qanchis tuta tiyapayarqanku, paykunaqa manan imaniytapas atirqankuchu sinchi nanaypi Job tarikusqanrayku.+
