Deuteronomio 3:1-29
3 ”Chaymantan noqanchisqa kutirimuspa Basanman riq ñanninta rirqanchis. Jinan Basán llaqta rey Ogqa llapa soldadokunantin Edréi llaqtaman lloqsimurqan noqanchiswan maqanakuq.+
2 Chay kutipin Jehová Diosqa niwarqan: Ama manchakuychu, makiykimanmi entregasayki chay reytapas, soldadonkunatapas, jallp’antapas. Imaynan Esbón llaqtapi tiyaq amorreo runakunaq reynin Sehonta ruwarqanki chhaynatan paykunatapas ruwallankitaq, nispa.
3 Chhaynatan Jehová Diosninchisqa Basán rey Ogtapas llapa soldadokunantinta noqanchisman entregawarqanchis. Llapantan paykunatapas wañuchipurqanchis, manan jujtapas kausashaqtaqa saqemurqanchischu.
4 Llaqtankutapas llapantan qechumurqanchis, manan jujtapas jinallataqa saqemurqanchischu. Llapanpiqa soqta chunka llaqtakunan karqan, chay llaqtakunaqa Argofpin kasharqan, chayqa Ogpa kamachisqan Basán jallp’apin kasharqan.+
5 Chay llaqtakunaqa llapanmi jatun perqakunawan allin muyuchisqa karqan, punkunkunapas trancanakunawan trancasqa karqan. Campokunapipas askhapunin llaqtachakunaqa karqan.
6 Chaywanpas llapantan chay llaqtakunataqa chinkachirqanchis,+ imaynan Esbón rey Sehontapas ruwarqanchis chhaynatan chaypipas ruwamurqanchis. Llapantan chaypi tiyaq runakunatapas warmikunantinta wawakunantinta chinkachimurqanchis.+
7 Uywankunata cosasninkunatawanmi ichaqa jap’ikampurqanchis.
8 ”Chay kutipin amorreo runakunaq iskaynin reyninkuq jallp’ankunata jap’ikapurqanchis.+ Llapantan Jordán mayu qaylla jallp’akunata Arnón wayq’omanta Hermón orqokama jap’ikapurqanchis.+
9 (Chay orqotan Sidón runakunaqa niqku Sirión nispa, amorreo runakunataq niqku Senir nispa).
10 Llapantan jap’ikapurqanchis pata pampapi llaqtakunata, Galaad pampakunata, Basán wichaykunata, Salecá llaqtata, Edréi llaqtata+ ima. Basán rey Ogpa kamachisqan llaqtakunaqa llapanmi noqanchispa kapurqan.
11 Basán rey Ogqa refaín runakunamanta último kaqmi karqan. Payta p’ampanapaq cajonpas fierromanta ruwasqan karqan, largonmanmi karqan tawa metro,* anchonmantaq karqan yaqa iskay metro.* Chay cajonqa Anmón runakunaq llaqtanpin kunankamapas kashan.
12 Chay kutipin chay jallp’akunata llapanta jap’ikapurqanchis. Arnón wayq’o patapi Aroer llaqtamanta+ kuskan Galaad orqo-orqokama, chaypi llaqtakunatan qopurqani Rubén ayllu runakunaman Gad ayllu runakunamanwan.+
13 Wakin Galaad wichayta, rey Ogpa kamachisqan Basán wichaykunata imataq llapanta qorqani kuskan Manasés aylluman.+ Basanpi Argof ladokunataqa refaín runakunaq jallp’an nispan niqku.
14 ”Manasespa churin Jairmi+ Argof ladopi jallp’akunataqa jap’ikapurqan,+ Guesur runakunaq linderonkama,* Macaj runakunaq linderonkama.+ Basanpi chay jap’ikapusqan ayllukunatan payqa sutinwan suticharqan Avoj-Jaír*+ nispa, kunankaman chay sutiyoq kashan.
15 Galaadtataq Makirman qopurqani.+
16 Rubén ayllu runakunaman Gad ayllu runakunaman+ imataq Galaadmanta Arnón wayq’okama qopurqani, paykunaq linderonqa wayq’o chaupimantan kashan. Chay linderon rishan Jaboc wayq’okama, chay wayq’omantapachan kashallantaq Anmón runakunaq linderonpas.
17 Paykunaq linderonkun kashallantaq Arabá ladoman, chay linderon jaykumushan Jordán mayu patantakama Kinéret qochamanta Arabá qochakama, Kachi qochakama.* Chay linderon Pisgá orqoq uranta muyuykamushan inti lloqsimuy ladoman.+
18 ”Chaymantan noqaqa paykunata nirqani: Diosniykichis Jehová Diosmi kay jallp’ata qopushasunkichis qankuna chayta jap’ikapunaykichispaq. Llapa mana manchakuq qharikunan armaykichista alistakuspa wayqeykichiskunaq ñaupanta Canaán jallp’aman chimpankichis.+
19 Warmiykichiskuna, wawaykichiskuna, uywaykichiskuna imallan kay qosqay llaqtakunapiqa qhepakunqaku. (Noqaqa yachanin askha uywakunayoq kasqaykichista).
20 Jehová Diosniykichis wayqeykichiskunatapas qankunata jina thajpi tiyachinankama, Jehová Diosniykichis Jordán mayu chimpapi jallp’ata paykunaman qonankaman qankunaqa riysinkichis. Chaymantan ichaqa sapankaykichis kutimpunkichis maypichus jallp’ata qorqaykichis chayman,+ nispa.
21 ”Chay kutipin noqaqa Josueta+ nirqani: Rikunkin Diosninchis Jehová Dios imatachus kay iskaynin reykunata ruwasqantaqa ¿riki? Chhaynatan Jehová Diosqa ruwallanqataq maytachus rishanki chaypi reykunatapas.+
22 Aman chay runakunataqa manchakunkichischu, Diosniykichis Jehová Diosmi qankunamanta maqanakunqa,+ nispa.
23 ”Chay kutipin noqaqa Jehová Diosta rogakurqani:
24 Tukuy munayniyoq Señorníy Jehová, jatun kasqaykita atiyniykitawanmi*+ kay kamachiykiman rikuchiyta qallarishawanki. ¿Ima diosmi qan jina khayna jatun ruwaykunata ruwanman? Manan pipas qan jinaqa kanchu janaq pachapipas ni kay pachapipas.+
25 Ama jinachu kay, chimpachiway Jordán mayu chimpaman, chay sumaq jallp’ata, chay munay orqo-orqokunata, Líbano ladokunatawan rikumunaypaq,+ nispa.
26 Jehová Diosmi ichaqa qankunaq causaykichispi phiñasqalla noqawan kashasqa,+ manan payqa uyariwarqanpaschu. Chay kutipin Jehová Diosqa niwarqan: ¡Amaña astawan rimapayawaychu! Aman jayk’aqpas chaymantaqa rimankiñachu.
27 Pisgá orqo pataman wichay,+ jinaspa chaymanta qhawariy inti jaykuy ladota, wichay ladota, uray ladota, inti lloqsimuy ladotawan. Jordán mayutaqa manan chimpankichu, aswanmi chay jallp’ataqa qhawarillanki.+
28 Josueta+ churay umalli kananpaq, allinta kallpachay payta. Paymi Israel runakunaq ñaupanta Jordán mayuta chimpanqa,+ paymi Israel runakunata pusanqa kunan rikumunki chay jallp’aman, chaypin paykunaqa tiyapunqaku, nispa.
29 Tukuy chaykunan pasarqan Bej-Peorpa+ chimpan wayq’opi tiyashaqtinchis.
Uraypi willakuykuna
^ Hebreo rimaypiqa “isqon codo” ninmi. Qhaway “Astawan yachanapaq B14” nisqata.
^ Hebreo rimaypiqa “tawa codo” ninmi. Qhaway “Astawan yachanapaq B14” nisqata.
^ Linderotaqa “colinda, qorpa” nillankutaqmi.
^ Avoj-Jaír sutiqa “Jairpa llaqta-llaqta karpankuna” ninantan nin.
^ Chay qochataqa “mar Muerto” nikullantaqmi.
^ Hebreo rimaypiqa “atiyniyoq makiykitawanmi” ninmi.
