Deuteronomio 27:1-26
27 Chaymantataq Moisesqa Israelpi umalliqkunapiwan* llaqtantin runakunata nirqan: “Kay qosqay kamachikuykunatan llapanta kasukunkichis.
2 Jordán mayuta chimpaspa Jehová Diosniykichispa qonan jallp’aman jaykuspan jatun rumikunata sayarichinkichis, chaytataq lliuta yesowan llut’ankichis.+
3 Chay rumikunapin qelqankichis llapa kay kamachikuy simikunata. Chhaynapin qankunaqa Jehová Diosniykichispa qonan jallp’aman jaykunkichis, lechepas mielpas askha kasqan jallp’aman. Ñaupa taytaykichiskunaq Diosnin Jehová Diospa prometesqanman jinan qankunaqa chay jallp’ata jap’ikapunkichis.+
4 Jordán mayuta chimpaspaykichismi Ebal orqopi chay rumikunata sayarichinkichis+ jinaspa yesowan llut’ankichis. Kunan kamachisqayman jinan chaytaqa ruwankichis.
5 Chaypin ruwallankichistaq Jehová Diosniykichispaq juj altarta, rumikunawanmi chaytaqa perqankichis. Ichaqa aman chay rumikunataqa fierromanta imawanpas ch’eqtankichischu nitaq thupankichispaschu.+
6 Enteron rumikunallawanmi Jehová Diosniykichispaqqa chay altartaqa perqankichis, chaypin Jehová Diosniykichispaq ruphachina ofrendakunata jaywankichis.
7 Chaypin jaywankichis sumaq kausay sacrificiotapas,+ chaypitaqmi chay sacrificiotaqa mijunkichis.+ Jinaspa Jehová Diosniykichispa ñaupanpi q’ochukunkichis.+
8 Sut’i reparaytan kay kamachikuykunataqa chay rumikunapi qelqankichis”,+ nispa.
9 Chaymantataq Moiseswan Leví ayllu sacerdotekunapiwan llapa Israel runakunata nirqanku: “Israel runakuna, ch’inyaychis, uyariychis kayta: Kunanmi Jehová Diosniykichispa llaqtan kapunkichis.+
10 Jehová Diosniykichispa simintan kasukunkichis, kasukunkichismi kunan qosqay kamachikuyninkunatapas+ leyninkunatapas”, nispa.
11 Chay p’unchaymi Moisesqa llaqtantin runakunata nillarqantaq:
12 “Jordán mayuta chimpaqtiykichisqa Simeón ayllu, Leví ayllu, Judá ayllu, Isacar ayllu, José ayllu, Benjamín ayllu iman Guerizin orqopi sayaykunqaku+ llaqtata bendecikunanpaq.
13 Rubén ayllu, Gad ayllu, Aser ayllu, Zabulón ayllu, Dan ayllu, Neftalí ayllu imataq Ebal orqopi sayaykunqaku+ ñakay simikunata rimakunanpaq.
14 Leví runakunataq* llapa Israel runakunata kunkayoqta ninqaku:+
15 ”Ñakasqa kachun thupasqa idolotapas,+ metal idolotapas ruwaqqa,+ chayta pakaqpas. Artesano runakunaq chaykuna ruwasqantaqa Jehová Diosqa cheqnikunmi,+ nispa. Llaqtantin runakunataq ninqaku: ¡Amén!,* nispa.
16 ”Leví runakunan nillanqakutaq: Ñakasqa kachun taytantapas mamantapas pisichaqqa,+ nispa. Llaqtantin runakunataq ninqaku: ¡Amén!, nispa.
17 ”Leví runakunan nillanqakutaq: Ñakasqa kachun runamasinpa linderonta* suchuykuchiqqa,+ nispa. Llaqtantin runakunataq ninqaku: ¡Amén!, nispa.
18 ”Leví runakunan nillanqakutaq: Ñakasqa kachun ñausa runata ñanmanta pantachiqqa,+ nispa. Llaqtantin runakunataq ninqaku: ¡Amén!, nispa.
19 ”Leví runakunan nillanqakutaq: Ñakasqa kachun waj llaqtayoqta, mana taytayoqta, viuda warmitapas+ mana chaninta ruwaqqa,+ nispa. Llaqtantin runakunataq ninqaku: ¡Amén!, nispa.
20 ”Leví runakunan nillanqakutaq: Ñakasqa kachun taytanpa warminwan kaspa taytanta p’enqayman churaqqa,+ nispa. Llaqtantin runakunataq ninqaku: ¡Amén!, nispa.
21 ”Leví runakunan nillanqakutaq: Ñakasqa kachun animalwan t’inkikuqqa,+ nispa. Llaqtantin runakunataq ninqaku: ¡Amén!, nispa.
22 ”Leví runakunan nillanqakutaq: Ñakasqa kachun taytanpa ususinwanpas mamanpa ususinwanpas kaq runaqa,+ nispa. Llaqtantin runakunataq ninqaku: ¡Amén!, nispa.
23 ”Leví runakunan nillanqakutaq: Ñakasqa kachun suegranwan kaq runaqa,+ nispa. Llaqtantin runakunataq ninqaku: ¡Amén!, nispa.
24 ”Leví runakunan nillanqakutaq: Ñakasqa kachun runamasinta suyapaspa* wañuchiq runaqa,+ nispa. Llaqtantin runakunataq ninqaku: ¡Amén!, nispa.
25 ”Leví runakunan nillanqakutaq: Ñakasqa kachun mana juchayoq runata wañuchinanpaq pagota chaskiq runaqa,+ nispa. Llaqtantin runakunataq ninqaku: ¡Amén!, nispa.
26 ”Leví runakunan nillanqakutaq: Ñakasqa kachun pipas kay kamachikuykunata mana respetaqqa mana kasukuqpas,+ nispa. Llaqtantin runakunataq ninqaku: ¡Amén!, nispa.
Uraypi willakuykuna
^ Chaypiqa “kuraq runakunapiwan” nillanmantaqmi.
^ Chaypiqa yaqapaschá Leví ayllu sacerdotekunamanta rimashan.
^ Chaypiqa “¡Chhayna kachun!” nillanmantaqmi.
^ Linderotaqa “colinda, qorpa” nillankutaqmi.
^ Suyapaytaqa “suyaykuy” nillankutaqmi.
