Deuteronomio 21:1-23
21 ”Jehová Diosniykichispa qonasuykichis jallp’api tiyashaqtiykichischus campopi juj runa wañusqa rijurinman, manataq yachawaqchischu pichus wañuchisqanta chayqa,
2 umalliqkuna* juezkuna+ iman lloqsimuspanku maypichus wañusqa runa kashan chaymantapacha chay muyuriqpi llaqtakunakama medinqaku.
3 Mayqen llaqtachus wañusqa runaq qayllanpi kashan chay llaqtapi umalliqkunan wakakunamanta juj malta wakata apamunqaku, manaraq llank’aq, manaraq yugo churasqa malta wakata.
4 Chay wakatan llaqtapi umalliqkunaqa wayq’oman apaykunqaku, may wayq’otachus askha unu jaykushan, maypichus mana yapurqankuchu* ni tarpurqankupaschu chayman, chaypin chay wakaq kunkanta p’akinqaku.+
5 ”Chaymanmi jamunqaku Leví ayllu sacerdotekuna, paykunatan Jehová Diosniykichisqa churan payta servinankupaq,+ Jehová Diospa sutinpi bendicionta qonankupaqwan.+ Paykunan nisunkichis maqanakuypas wañuchinakuypas kaqtin imatachus ruwanaykichis chayta.+
6 Chaymantataq wañusqa runaq qayllanpi kaq llaqtapi umalliqkunaqa kunkanta p’akisqanku malta waka patapi llapanku makinkuta maqchikunqaku,+
7 ninqakutaq: Manan noqaykuchu chay runataqa wañuchiyku, manan rikuykuchu pichus chayta ruwarqan chaytapas.
8 Diosniyku Jehová, amayá Egiptomanta libramusqayki Israel llaqtaykitaqa juchachankichu,+ amayá chay mana juchayoq runaq yawarnin jich’asqa kasqanmantaqa llaqtaykitaqa juchachankichu,+ nispa. Chhaynapin paykunaqa mana juchayoqchu kanqaku chay runaq wañusqanmanta.
9 Chhaynatan qankunaqa Jehová Diospa imachus munasqanta ruwaspa llaqta ukhumanta chinkachinkichis mana juchayoq runa wañuchisqa kasqanmanta juchata.
10 ”Enemigoykichiskunawan maqanakuq rispachus Jehová Diospa yanapayninwan paykunata atipankichis jinaspa presota apamunkichis,+
11 chay presokuna ukhupitaqchus rikuwaqchis juj munay rijch’ayniyoq warmita, chay warmitataqchus warmichakapuyta munawaqchis chayqa,
12 atiwaqchismi wasiykichisman apakapuyta. Ichaqa llapantan chujchanta k’isukunqa, k’utuchikunqan sillunkunatapas,
13 ch’utikapunqan preso kasqan p’achatapas, jinaspa wasiykipi tiyanqa. Juj killa junt’an payqa taytanmanta mamanmantawan waqanqa,+ chaymantan ichaqa paywan puñupunki. Qanmi qosan kanki paytaq warmiyki kanqa.
14 Manachus munapunkiña chayqa kacharipunkin may munasqanmanpas ripunanpaq.+ Ichaqa munayniykiman jinataq paywan casarakurqanki chayqa, aman paytaqa vendenkichu, aman ima mana allintapas ruwankichu.
15 ”Pipas iskay warmiyoq kaspa jujninta anchata munakunman juj kaqtataq pisita munakunman,* iskayninpitaq wawankunapas kanman, pisi munasqa kaqpitaq phiwi* churin kanman chayqa,+
16 herenciankuta t’aqanan kaqtinqa aman pisi munasqa warmiq wawanta pisichaspachu aswan munasqa warmiq wawanta phiwi churinta jina rikunqa.
17 Aswanmi payqa pisi munasqa warmiq wawanman iskay t’aqa herenciata qopunqa phiwi churin kasqanrayku, payta ñaupaqta churiyasqanrayku. Phiwi wawa kaynintaqa manan pipas qechunqachu.+
18 ”Juj runaq churinchus mana kasukuq k’ullu kanman, manachus taytantapas mamantapas kasukunman,+ maytaña wanachiqtinkupas manachus kasukunman chayqa,+
19 tayta-mamanmi jap’ispa llaqta punkupi umalliqkunaman apanqa.
20 Jinaspan llaqtapi umalliqkunata ninqa: Kay wawaykun mana kasukuq k’ullullaña, manapunin ima nisqaykutapas kasuwankuchu, payqa rajrapun,*+ machaqmi,+ nispa.
21 Jinan llaqtanpi llapa runakuna rumiwan ch’aqespa wañuchinqaku. Chhaynatan qankuna ukhumanta mana allin kaqta chinkachinkichis, chayta yachaspaqa llapa Israel runakunapas manchakunqakun.+
22 ”Pitapas wañuyman apaq juchata ruwasqanrayku wañuchiwaqchis,+ jinaspa k’aspipi warkuwaqchis chayqa,+
23 aman chay ayataqa tutantinchu chaypi warkurayachinkichis,+ aswanmi chay kikin p’unchay p’ampankichis, pipas k’aspipi warkusqaqa Diospa ñakasqan runa kasqanrayku.+ Aman qhellichankichischu Jehová Diosniykichispa qosqasuykichis jallp’ataqa.+
Uraypi willakuykuna
^ Chaypiqa “kuraq runakuna” nillanmantaqmi.
^ Yapuytaqa “chajmay, aray” nillankutaqmi.
^ Hebreo rimaypiqa “jujninta munakunman juj kaqtataq cheqnikunman” ninmi.
^ Rajraputaqa “sinchi mijuq” nillankutaqmi.
