Deuteronomio 13:1-18
-
Diospa contranpi jatariqkunata imachus ruwanamanta (1-18)
13 ”Qankuna ukhupi rijurinqa ima profetapas, qhepaman ima pasananta mosqoypi rikuqpas, jinaspa ima señaltapas rikuchisunkichisman qhepaman ima pasanantapas willasunkichisman,
2 chay señal rikuchisqantaq qhepaman ima pasananpas willasqantaq junt’akunman, jinaspa mana reqsisqaykichis dioskunata servinaykichispaq nisunkichisman: Jaku waj dioskunata yupaychamusun, nispa chayqa,
3 aman uyarinkichischu chay profetataqa ni mosqokuq runatapas.+ Jehová Diosmi qankunataqa pruebaman churashasunkichis+ tukuy sonqochus tukuy almachus* Jehová Diosta munakushankichis icha manachus chayta yachananpaq.+
4 Diosniykichis Jehová Diosllatan yupaychankichis, payllatan manchakunkichis, paypa kamachikuyninkunata, paypa siminta imallan kasukunkichis, payllatan servinkichis, paymanmi k’askakunkichispas.+
5 Chay profetatapas mosqokuq runatapas wañuchinkichismi.+ Jehová Diosniykichis contra, Egiptopi esclavo kasqaykichismanta orqomuq Diosniykichis contra sayarinaykichispaq tanqasqasuykichisraykun paytaqa wañuchinkichis. Jehová Diospa kamachisqan ñanpi purinaykichismanta t’aqayta munasqasuykichisraykun wañuchinkichis, chhaynatan qankuna ukhumanta mana allin kaqta chinkachinkichis.+
6 ”Wayqeykipas, qhari wawaykipas, warmi wawaykipas, munakusqayki warmiykipas, munakusqayki amigoykipas pakallapi nisunkiman: Jaku juj dioskunata yupaychamusun,+ nispa, chhaynata mana reqsisqayki dioskunaman, ñaupa taytaykikunaq mana reqsisqan dioskunaman,
7 llaqtayki muyuriqpi dioskunaman aysasunkiman chayqa, chaykuna karupiña qayllapiña kanman chaypas, maypiña chay pasanman chaypas,
8 aman paytaqa kasunkichu, aman uyarinkipaschu.+ Aman paytaqa khuyapayankichu nitaqmi paymanqa sayapakunkichu,
9 aswanmi paytaqa wañuchinki.+ Qanmi paytaqa ñaupaqta rumiwan ch’aqenki, chaymantataq llaqtantin runakuna ch’aqenqaku.+
10 Wañunankaman paytaqa rumiwan ch’aqenki.+ Egiptopi esclavo kasqaykimanta orqomuqniyki Jehová Diosmanta t’aqayta munasqasuykiraykun paytaqa wañuchinki.
11 Chay pasasqanta yachaspaqa llapa Israel runakunan manchakunqaku, chhaynapin paykunaqa manaña jayk’aqpas ruwanqakuñachu chay mana allin ruwaytaqa.+
12 ”Jehová Diosniykichispa qosqan mayqen llaqtapipas uyariwaqchis:
13 Llaqtaykichispin rijurimun mana imapaq serviq runakuna, chay runakunan nishanku: Jaku juj dioskunata servimusun, nispa. Mana reqsisqaykichis dioskunamanmi runakunata apayta munashanku, nispa rimaqta chayqa,
14 allintan chaymanta tapuykachakunkichis cheqaqpunichus icha manachus chayta yachanaykichispaq.+ Cheqaqpuni chay sinchi mana allin ruway kashan chayqa,
15 chay llaqtapi tiyaq runakunatan llapanta wañuchinkichis.+ Llapantan chay llaqtata chinkachinkichis, uywakunatapas chinkachinkichismi.+
16 Chaymantataq llapa cosaskunata plaza pampaman juñunkichis, jinaspa chay llaqtata kanaykapunkichis. Chay cosaskunaqa ruphachina ofrenda jinan Jehová Diospaq kanqa. Chay llaqtaqa rumi montonllañan kapunqa, manan jayk’aqpas jatarichisqañachu kanqa.
17 Aman apakunkichischu imatapas chinkachinapaq kaqtaqa,+ chhaynapin Jehová Diosqa manaña phiñasqachu kanqa, aswanmi ñaupa taytaykichiskunaman promesa ruwasqanman jina llakipayasunkichis, khuyapayasunkichis, askhayachisunkichis ima.+
18 Qankunaman qosqay Jehová Diosniykichispa kamachikuyninkunataqa llapantan junt’ankichis, chayta ruwaspan rikuchinkichis payta kasukusqaykichista,* chhaynapin Jehová Diosniykichispa ñaupanpipas allillanta imatapas ruwankichis.+
Uraypi willakuykuna
^ Chaypiqa “paypa kunkanta uyarisqaykichista” nillanmantaqmi.
