Deuteronomio 11:1-32
11 ”Diosniykichis Jehová Diosta munakuychis,+ paypaq imachus ruwanaykichiswan junt’aychis, kasukushallaychispuni kamachikuyninkunata leyninkunatapas.
2 Qankunatan noqaqa rimapayashaykichis, manan wawaykichiskunatachu, paykunaqa manan yachankuchu imaynachus Jehová Diospa wanachiynin* chaytaqa,+ manan rikurqankuchu jatun atiynintapas+ kallpantapas.+
3 Paykunaqa manan rikurqankuchu Egipto rey faraón contra llaqtan contra imaymana milagrokuna imaymana señalkuna ruwasqantapas.+
4 Paykunaqa manan rikurqankuchu Egipto soldadokunata, faraonpa caballonkunata, carretankunata imachus ruwasqantapas. Jehová Diosqa qatimushasuqtiykichismi Puka lamar-qochawan paykunata millp’uchipurqan, chhaynatan jujpaqkama chay runakunata chinkachipurqan.+
5 Manan rikurqankuchu ch’inneq ladokunapi qankunarayku imakunachus ruwasqanta, kayman chayamunaykichiskama imakunachus ruwasqantapas.
6 Manan rikurqankuchu Rubén ayllumanta Eliabpa churin Datanta Abiramtawan imachus ruwasqantapas. Llapa Israel runakunaq rikushasqanmi paykunataqa jallp’a millp’upurqan llapa familiantinta karpakunantinta ima; millp’upurqanmi paykuna partemanta kaq runakunatapas.+
7 Qankunan ichaqa rikurqankichis Jehová Diospa ancha jatun ruwaykuna ruwasqanta.
8 ”Qankunaqa kay qosqay llapa kamachikuykunatan kasukunkichis, chhaynapin kallpasapa llaqta kankichis, prometesqa jallp’ata jap’ikapuqpas chimpankichis.
9 Chhaynapin ñaupa taytaykichiskunaman Jehová Diospa prometesqan jallp’apipas unayta kausankichis.+ Chay jallp’atan Diosqa paykunaq miraynin runakunaman qopunanpaq prometerqan.+ Chaypiqa lechepas mielpas askhan kashan.+
10 ”Maymanchus jaykunkichis chay jallp’aqa manan lloqsimusqaykichis Egipto jallp’a jinachu. Egiptopiqa imatapas tarpuspaqa huertata jinan chakiykichiswan* qarpaq kankichis.
11 Jap’ikapunaykichis jallp’aqa orqokunayoq wayq’okunayoqmi kashan.+ Chay jallp’aqa parawanmi kausan.+
12 Chay jallp’ataqa Diosniykichis Jehová Diosmi waqaychashan, Jehová Diosniykichispa ñawillanpin kashan, paymi cuidashan wata qallariymanta wata tukuykama.
13 ”Sichus kay qosqay kamachikuykunata kasukunkichis, Jehová Diosniykichistapas munakunkichis, tukuy sonqowan tukuy almawantaq* servinkichispas chayqa,+
14 tiempollanpin jallp’aykichisman parachimunqa,* tiempollanpin ñaupaq paratapas qhepa paratapas chayachimunqa, chhaynapin mijuyniykichisqa mana faltasunkichischu, kallanqan mosoq vinoykichispas aceiteykichispas.+
15 Campokunapipas askhatan pastota wiñachinqa uywaykichiskuna mijunanpaq. Qankunaq mijunaykichispas askhan kanqa.+
16 Sonqoykichistan allinta cuidankichis, paqtataq waj dioskunaman aysasunkichisman jinaspa chaykunaman k’umuykuwaqchis.+
17 Chaytachus ruwankichis chayqa Jehová Diosmi qankunapaq nishuta phiñakunqa jinaspa manaña parachimunqachu,+ chajrakunapas manañan rurunqañachu chhaynapin qankunaqa Jehová Diospa qosqan jallp’api manaraq imapi wañupunkichis.+
18 ”Kay kamachisqay simikunatan sonqoykichispi yuyayniykichispi ima waqaychankichis, makiykichispi mat’iykichispi iman watakunkichis, chhaynapi chaykunata yuyarinaykichispaq.+
19 Sapa kutillanmi chaykunataqa wawaykichiskunaman yachachinkichis, rimapayashallankichispunin wasipi kashaspapas, ñanpi purishaspapas, puñuykushaspapas, jatarishaspapas.+
20 Wasiykichis punku k’aspikunapi, llaqtaykichis punkukunapi iman chaykunataqa qelqankichis.
21 Chhaynapin qankunapas wawaykichiskunapas unayta kausankichis+ Jehová Diospa ñaupa taytaykichiskunaman prometesqan jallp’api.+ Maykamachus kay pachaq jawanpi cielo kanqa chaykaman kausankichis.
22 ”Qankunachus llapanta kay kamachisqay simikunata kasukunkichis, chayman jinachus kausankichis, munakunkichischus Jehová Diosniykichistapas,+ paypa ñannillanpichus purinkichis, payllamanchus jap’ipakunkichispas chayqa,+
23 chay jallp’api llapa nacionkunatan Jehová Diosqa ñaupaykichismanta qarqonqa,+ chhaynapin qankunaqa qankunamanta aswan kallpasapa, aswan jatun nacionkunata jap’ikapunkichis.+
24 Maymanña chakiykichis saruykunqa chaypas qankunaqmi chayqa kapunqa.+ Linderoykichisqa* ch’inneq ladomanta Libanokaman kanqa, Éufrates jatun mayumanta inti jaykuy ladopi lamar-qochakaman* kanqa.+
25 Manan pipas qankuna contraqa sayariyta atinqachu.+ Jehová Diosniykichismi prometesqanman jina llapa purisqaykichis llaqtakunata manchachinqa q’aqchanqa ima.+
26 ”Kunanmi qankunaq ñaupaykichisman churashani allin simita ñakay simitawan,+ qankuna mayqentapas ajllakuychis.
27 Qankunaman willasqay Jehová Diosniykichispa kamachikuyninkunata kasukunkichis chayqa allillanmi kankichis,+
28 ichaqa manachus Jehová Diosniykichispa kamachikuyninkunata kasukunkichis,+ pantankichischus rikuchisqay ñanmantapas, mana reqsisqaykichis dioskunatachus adorankichispas chayqa, ñakasqan kankichis.
29 ”Jehová Diosniykichis jap’ikapunaykichis jallp’aman jaykuchisuqtiykichisqa, Guerizin orqopin bendición simikunata rimankichis, Ebal orqopitaq ñakay simikunata rimankichis.+
30 Yachasqaykichis jinapas chay orqokunaqa Jordán mayuq inti jaykuy ladonpin kashan, Arabapi tiyaq Canaán runakunaq jallp’anpi, Guilgal llaqtaq chimpanpi, Moré nisqapi sach’akunaq ladonpi.+
31 Jordán mayuta chimpaspan Jehová Diospa promestesqan jallp’akunata jap’ikapuq jaykunkichis.+ Chay jallp’akunata jap’ikapuspa chaypi tiyaspaqa
32 kunan kamachisqay llapa kamachikuykunata leykunatawanmi makilla kasukunkichis,+ chayman jinataqmi kausankichispas.
Uraypi willakuykuna
^ Egiptopiqa yaqapaschá chakinkuwan imatapas muyuchiqku unuta orqonankupaq otaq chakinkuwan yarqhakunata ruwaqku. Yarqhataqa “larqha, sanja” nillankutaqmi.
^ Hebreo rimaypiqa “parachimusaq” ninmi, chaypiqa Diosmantan rimashan.
^ Linderotaqa “colinda, qorpa” nillankutaqmi.
^ Chaypiqa Jatun lamar-qochamantan rimashan, chay lamar-qochataqa “mar Mediterráneo” nikullantaqmi.
