Deuteronomio 10:1-22
10 ”Chay kutipin Jehová Diosqa niwarqan: Iskay p’alta rumikunata ruwakuy ñaupaq p’alta rumikunata jina,+ chaymantataq kay orqo pataman wichamunki. Ruwallankitaqmi maderamanta rimanakuyniy arcatapas.*
2 Chay p’alta rumikunapin qelqasaq p’akisqayki rumikunapi kasharqan chay simikunata, chay p’alta rumikunatan rimanakuyniy arcaman churanki, nispa.
3 Jinan noqaqa ruwarqani acacia sach’amanta Diospa rimanakuynin arcata, iskay p’alta rumikunatawan. Chaymantataq chay rumikuna apaykusqa orqo pataman wicharqani.+
4 Chay rumikunapin Jehová Diosqa qelqamurqan ñaupaq qelqamusqan simikunata,+ chunka kamachikuykunata.+ Jehová Diosqa orqoq chakinpi juñusqa kashaqtiykichis+ nina ukhumanta rimamusqan simikunatan qelqamurqan,+ chaytataq qomuwarqan.
5 Chaymantataq kutirimuspa uraykamurqani chay orqomanta,+ jinaspa Jehová Diospa kamachiwasqanman jina iskaynin p’alta rumikunata ruwasqay Diospa rimanakuynin arcaman churarqani, chaypin kunanpas chay rumikunaqa kashan.
6 ”Chaymantataq Israel runakunaqa Beroj Bene-Jacán ladomanta lloqsimuspanku Moserá ladoman rirqanku. Chaypin Aaronqa wañupurqan, chaypin p’ampasqapas karqan.+ Paypa rantintataq churin Eleazar sacerdote kapurqan.+
7 Chaymantataq Gujgoda ladoman rirqanku, Gujgodamantataq Jojbatá ladoman rirqanku,+ chaypiqa askhan mayukuna kasqa.
8 ”Chay tiempopin Jehová Diosqa Leví aylluta ajllarqan+ Jehová Diospa rimanakuynin arcata apanankupaq,+ Jehová Diospa ñaupanpi servinankupaq, paypa sutinpi Israel runakunaman bendicionta qonankupaqwan.+ Chaytan paykunaqa kunankamapas ruwashanku.
9 Chaymi Leví runakunaqa mana ima herenciatapas chaskirqankuchu Israel runakuna ukhupiqa. Jehová Diospa nisqan jina, Jehová Diosmi paykunaq herenciankuqa karqan.+
10 Noqaqa ñaupaqpi jinan tawa chunka p’unchayta tawa chunka tutatawan chay orqopi kamurqani.+ Jehová Diosqa chay kutipipas uyariwarqanmi.+ Chaymi Jehová Diosqa manaña chinkachiyta munarqasunkichisñachu.
11 Chaymantataq Jehová Diosqa niwarqan: Kaymanta lloqsinaykichispaq alistakuy, qanmi runakunaq ñaupanta rinki, qanmi kay runakunata pusanki ñaupa taytankuman prometesqay jallp’ata jap’ikapunankupaq,+ nispa.
12 ”Kunanqa Israel llaqta, ¿ima ruwanaykitataq Jehová Diosniykiri munashan?+ Jehová Diosniykiqa munashan payta manchakunaykitan,+ ñanninkunapi purinaykitan,+ payllata munakunaykitan. Chaymantapas Jehová Diosniykiqa munashan payllata tukuy sonqowan, tukuy almawan* servinaykitan.+
13 Chaymantapas Jehová Diosqa kay qosqay kamachikuyninkunata leyninkunatapas kasukunaykitan munashan. Chaykunata kasukuspaqa allillanmi kanki.+
14 Qhawariy, Jehová Diospan cielopas chaypi tukuy ima kaqkunapas, paypan kay pachapas chaypi tukuy ima kaqkunapas.+
15 Chaywanpas Jehová Diosqa qankunaq ñaupa taytaykichiskunallatan munakurqan. Chaymi llapa llaqtakunamantapas qankunallata ajllakurqasunkichis, paykunaq miraynin runakuna kasqaykichisrayku.+ Chhaynapin kunanqa paypa kaqnin kapunkichis.
16 Chayrayku sonqoykichista ch’uyanchakuychis,+ amaña mana kasukuq k’ulluqa kaychischu.+
17 Diosniykichis Jehová Diosqa dioskunaq Diosninmi,+ señorkunaq Señorninmi. Payqa jatun Diosmi, atiyniyoqmi, manchakuna Diosmi. Payqa manan pimanpas sayapakunchu,+ manataqmi pagotapas chaskinchu juiciopi pimanpas sayapakunanpaqqa.
18 Payqa chanintan juzgan mana taytayoqtapas viudatapas,+ munakunmi forastero runatapas,+ chaymi p’achatapas mijunatapas qon.
19 Qankunapas munakunaykichismi forastero runataqa, qankunapas Egipto llaqtapin forastero kamurqankichis.+
20 ”Diosniykichis Jehová Diostaqa manchakunkichismi, paytan servinkichis,+ paymanmi k’askakunkichis, paypa sutinpin jurankichis,
21 payllatan jatunchankichispas.+ Paymi Diosniykichisqa, paymi qankunarayku imaymana jatun ruwaykunatapas, admiranapaq ruwaykunatapas ruwarqan, rikushaqtiykichismi chaykunataqa ruwarqan.+
22 Egiptoman jaykuq ñaupa taytaykichiskunaqa qanchis chunka runakunallan karqanku,+ kunantaq ichaqa Jehová Diosniykichis askhaman tukuchipusunkichis, janaq pachapi ch’askakuna jinaraqmi kashankichis.+
Uraypi willakuykuna
^ Qhaway Explicasqa simikuna nisqapi “Rimanakuy arca” nisqata.
