Jeremías 6:1-30
6 Benjaminpa churinkuna, Jerusalenmanta karupi pakakunata maskhaychis.
Tecoa llaqtapi+ waqrata tocaychis.+
¡Bej-Akerenpi señalta jina ninata jap’ichiychis!
Wichay ladomantan llakikuy jamushan, manchay ñak’ariymi jamushan.+
2 Sion llaqtaqa munay warmi jinan, mana tupaykuna warmi jinan.+
3 Michiqkunan uywakunantin jamunqaku,Jerusalenpa muyuriqninpin karpakunqaku,+sapankankun uywankuta chaypi michinqaku.+
4 Paykunan ninqaku: “¡Jerusalenwan maqanakuq rinanchispaq alistakuychis!*
¡Jaku! ¡Chaupi p’unchayta phawaykusunchis!”, nispa.
Jujkunataq ninqaku: “¡Imanasunmi tardeyaykushanñan!
¡Imanasunmi tutayaykushanñan!”, nispa.
5 Jinan paykunaqa nillanqakutaq: “¡Jaku! Tuta horasta phawaykusunchis,allin perqasqa torrenkunata thunimusunchis”,+ nispa.
6 Ejercitokunata kamachiq Jehová Diosmi nin:
“Jerusalenman phawaykunaykichispaq k’ullukunata wit’uychis,chaykunata perqa k’uchuman montonaychis.+
Chay llaqtaqa castigasqan kanan,chaypiqa sarunchayllan kashan.+
7 Imaynan unuqa ujanapaq pozopi kashallan,chhaynan kay llaqtapipas mana allin ruwaykunaqa kashallan.
Chay llaqtapiqa maqanakuyllamantan, mana allin ruwayllamantan uyarikushan,+onqoykunallatan, ñak’ariyllatan rikushani.
8 Jerusalén llaqta, uyariy anyasqayta,mana chayqa millakuspan wijch’upusayki,+mana chayqa ch’usaqmanmi tukuchisayki,mana runaq tiyananmanmi tukuchisayki”,+ nispa.
9 Ejercitokunata kamachiq Jehová Diosmi nin: “Imaynan uvasta pallapanku,*chhaynatan Israelmanta llapa puchuqkunata juñunqaku.
Uvas pallapaq jina wajmanta uvas sach’akunaman makiykita jaywariy”, nispa.
10 Jinan noqaqa nirqani: “¿Pitan rimapayasaq?
¿Pimanmi willasaq? ¿Pin uyariwanman?
Ninrinkupas tapasqan kashan, manan uyarikunkuchu.+
Jehová Diospa simintaqa pisichankun,+manan uyariytapas munankuchu.
11 Jehová Diospa phiñakuyninmi noqapi raurarishanraq,sayk’usqañan kashani, manañan aguantayta atinichu”,+ nispa.
“Callepi erqeman phiñakuyniymanta willay,*+juñunasqa waynakunaman phiñakuyniymanta willay.
Llapankun jap’isqa kanqaku, qharintin warmintinmi jap’isqa kanqaku,Machukunapas nishu machukunapas jap’isqan kanqaku.+
12 Wasinkutapas jallp’ankutapas warminkutapas jujkunan jap’ikapunqaku.+
Noqan kay suyu runakunaman makiyta jaywarisaq” ninmi Jehová Dios.
13 “Juch’uypas jatunpas llapankun jujkunata engañaspa qhapaqyanku,+profetakunapas sacerdotekunapas llapankun llullakuspa suwakunku.+
14 Llaqtaypa k’irinkunatapas* patallantan jampipayanku.
¡Thaj kaypin kashanchis! ¡Thaj kaypin kashanchis!, nispanku.
Manataqmi thaj kayqa kanchu.+
15 ¿P’enqarikunkuchu millakunapaq kaqkunata ruwasqankumanta?
Manan chhikallantapas p’enqarikunkuchu,manan yachankuchu imachus p’enqakuy kasqanta,+chayraykun paykunapas jujkuna jina urmanqaku,muchuchisqaywanmi paykunaqa urmanqaku” ninmi Jehová Diosqa.
16 Jehová Diosmi khaynata nillantaq:
“Ñankuna tupaypi sayaykuspa allinta qhawariychis,tapurikuychis ñaupa tiempo ñankunamanta,tapurikuychis mayqenchus allin ñan chayta, jinaspa chayninta puriychis,+chaypin thaj kayta tarinkichis”, nispa.
Paykunan ichaqa ninku: “Manan chay ñannintaqa puriykumanchu”,+ nispa.
17 Diosmi nin: “Qhawaqkunatan churarqani,+waqra tocayta uyariychis, ninankupaq”,+ nispa.
Paykunan ichaqa nirqanku: “Manan uyariykumanchu”,+ nispa.
18 Diosmi nin: “Nacionkuna uyariychis,juñunasqa runakuna yachaychis,imakunas paykunawan pasanqa chayta yachaychis.
19 ¡Kay pacha runakuna uyariychis!
Kay suyumanmi ñak’ariyta chayachimusaq,+mana allinkuna yuyaykusqankumantan chayta ruwasaq,manan rimapayasqayta kasukurqankuchu,kamachikuyniykunatan* pisicharqanku.
20 ¿Imapaqñan Saba ladomanta yuraq inciensota* apamuwankichis?
¿Imapaqñan karu llaqtamantaraq sumaq q’apaq plantata apamuwankichis?
Ruphachina ofrendaykichistapas manan munanichu,sacrificio jaywamuwasqaykichistapas manan chaskiykichismanchu”,+ nispa.
21 Chayraykun Jehová Diosqa nin:
“Kunanmi misk’anakunata churaspa kay llaqtata urmachisaq,chay misk’anakunawanmi taytantin churintin urmanqaku,chaywanmi wasimasintin amigontin urmanqaku,llapankun wañunqaku”,+ nispa.
22 Jehová Diosmi khaynata nin:
“¡Qhawariychis! Wichay ladomantan juj nación jamushan,sinchi karumantan juj atiyniyoq nación jatarimushan.+
23 Flechana arconkutan, lanzankutan jap’inqaku,paykunaqa millaymi kanku, mana khuyapayakuqmi kanku,lamar-qocha jinaraqmi qaparinqaku,caballo sillapikaman jamunqaku.+
Sion llaqta, guerrapi maqanakuqkuna jinan kashanku,phawaykamunankupaqmi listo kashanku”, nispa.
24 Chay willakuyta uyarisqanchisraykunmanaña makinchiskunapi kallpa kapunchu,+manchakuymi atipashawanchis,nanaywan jap’ichikuq onqoq warmi jinan kashanchis.+
25 Ama jawata lloqsiychu,ama ñankunapi puriychu,enemigon espadantin kashan,tukuy ladopin manchakuy kashan.
26 Llaqtalláy,*qhasqa pach’awan churakuy,+ usphapi qhospay.
Sapallan wawaykimanta jina khuyayta waqay,+thuniqqa qonqayllan phawaykamuwasun.+
27 Diosmi nin: “Qantan* qorita qolqeta ch’uyanchaqta jina llaqtaypi churayki,allin ch’uyanchaqta jinan churayki,allintan qhawanayki imayna kausasqankuta.
28 Llapallankun mana kasukuq, k’ullu runakuna kanku,+yanqamanta tumpaspan purishanku.+
Cobre jina, fierro jina mana sienteqmi kanku,llapallankun mana allin ruwaqkuna kanku.
29 Phukunan rupharapun,ninamantaqa plomollan* lloqsimun,yanqapaqmi ch’uyanchaqqa llank’an,+millay runakunaqa kashallankun.+
30 Noqa Jehová Dios paykunata mana chaskisqayraykun+
runakunaqa mana valeq qolqe, nispa ninqaku”, nispa.
Uraypi willakuykuna
^ Chaypiqa “ch’uyanchakuychis” nillanmantaqmi.
^ Pallapaytaqa “qhellapay” nillankutaqmi. Qhaway Explicasqa simikuna nisqapi “Pallapakuy” nisqata.
^ Hebreo rimaypiqa “phiñakuyniyta jich’aykuy” ninmi.
^ Chaypiqa “p’akisqa tullunkunatapas” nillanmantaqmi.
^ Chaypiqa “yachachikuyniykunatan” nillanmantaqmi.
^ Chaypiqa “olibanota” nillanmantaqmi.
^ Hebreo rimaypiqa “Llaqtaypa ususin” ninmi.
^ Chaypiqa Jeremiasmantan rimashan.
^ Plomotaqa “titi” nillankutaqmi.
