Jeremías 38:1-28
38 Matanpa churin Sefatías, Pasjurpa churin Guedalías, Selemiaspa churin Jucal,+ Malkiyaq churin Pasjur+ iman uyarirqanku llapa llaqta runakunaman Jeremiaspa kay nisqanta:
2 “Jehová Diosmi khaynata nin: Kay llaqtapi qhepakuqqa espadawan wañuchisqan kanqa, yarqaywan millay onqoywan wañuchisqan kanqa.+ Caldea runakunaman entregakuqmi ichaqa kausashallanqa; vidallantan salvakunqa, payqa kausashallanqan,+ nispa.
3 Jehová Diosmi nin: Kay llaqtaqa Babilonia reypa ejercitonmanmi entregasqa kanqa, paymi jap’ikapunqa,+ nispa”.
4 Jinan autoridadkunaqa reyta nirqanku: “Ama jinachu kay, kamachiy kay runata wañuchinankupaq,+ rimasqanwanmi kay llaqtapi qhepaq soldadokunata llapa llaqta runakunatapas pisi kallpayachishan. Kay runaqa manan thaj kaytachu kay llaqtapaq munan, aswanpas ñak’ariytan”, nispa.
5 Rey Sedequiastaq nirqan: “Makiykichispin kashan, ima munasqaykichista paywan ruwaychis, manan reyqa jark’asunkichismanchu”, nispa.
6 Jinan Jeremiasta jap’ispa Guardiakunaq Pation+ nisqapi reypa churin Malkiyaq t’oqonman wijch’uykurqanku, waskhawanmi uraykachirqanku. Chay t’oqopiqa manan unu karqanchu, t’urullan kasharqan, chaymi Jeremiasqa t’uruman chinkaykusharqan.
7 Reypa wasinpi* umalli Ébed-Mélec+ Etiopía runan yacharurqan Jeremiasta t’oqoman wijch’uykusqankuta. Benjamín Punku nisqapin reyqa tiyasharqan.+
8 Chaymi Ébed-Melecqa reypa wasinmanta lloqsispa reyta nirqan:
9 “¡Señorníy, reyníy, chay runakunaq profeta Jeremiasta ruwasqankuqa sinchi mana allinpunin! T’oqomanmi wijch’uykusqaku, chaypiqa yarqaymantan wañupunqa, manañan llaqtapiqa t’antapas kanñachu”,+ nispa.
10 Jinan reyqa Etiopía runa Ébed-Melecta nirqan: “Phaway kaymanta kinsa chunka runata aparikuspa profeta Jeremiasta t’oqomanta orqomuy manaraq wañurushaqtin”, nispa.
11 Chaymi Ébed-Melecqa runakunata pusarikuspa reypa wasinman rirqan, valorniyoq cosaskunata waqaychana cuartoq ukhunman,+ chaymantan thanta trapokunata mauk’a telakunatawan aparikurqanku, jinan waskhapi uraykachirqanku Jeremiaspa kasqanman.
12 Etiopía runa Ébed-Melectaq Jeremiasta nirqan: “Chay trapokunata telakunatawan wallak’uykiman churakuy, chay patamantaq waskhata”, nispa. Jeremiastaq chayta ruwarqan.
13 Jinan paykunaqa waskhawan aysaspa t’oqomanta orqomurqanku. Chaymantan Jeremiasqa Guardiakunaq Pation nisqapi qhepakurqan.+
14 Rey Sedequiasmi profeta Jeremiasta wajachimurqan Jehová Diospa wasinpi kinsa kaq jaykunaman, chaypin reyqa Jeremiasta nirqan: “Tapuytan munashayki, aman imatapas pakawankichu”, nispa.
15 Jeremiastaq Sedequiasta nirqan: “Willaqtiyqa wañuchiwankimanchá. Yuyaychaqtiypas manan uyariwankimanchu”, nispa.
16 Chaymi rey Sedequiasqa pakallapi Jeremiasman jurarqan: “Wiñaypaq kausaq Jehová Diospa sutinpin, kausayta qowaqninchispa sutinpin jurani, manan noqaqa wañuchisaykichu, manan wañuchiyta munasuqniyki runakunamanpas entregasaykichu”, nispa.
17 Jinan Jeremiasqa Sedequiasta nirqan: “Ejercitokunata kamachiq Jehová Diosmi, Israelpa Diosninmi khaynata nin: Sichus Babilonia reypa autoridadninkunaman entregakunki chayqa kausashallankin, kay llaqtapas manan kanasqachu kanqa, qanpas familiaykipas manan wañunkichischu.+
18 Manachus Babilonia reypa autoridadninkunaman entregakunki chayqa, kay llaqtan Caldea runakunaman entregasqa kanqa, paykunan kanaykunqaku,+ qanpas manan makinkumanta ayqeyta atinkichu,+ nispa”.
19 Rey Sedequiastaq Jeremiasta nirqan: “Caldea runakuna ladomanta kaq judío runakunatan manchakushani. Paykunaman entregawaqtinkuqa imatapasraqchá ruwawankuman”, nispa.
20 Jeremiastaq nirqan: “Manan paykunaman entregasqachu kanki. Jehová Diospa siminta kasukuy, imachus nisqayta ruway, chhaynapin allillan kanki, kausashallankitaqmi kanpas.
21 Manachus entregakunki chayqa, Jehová Diosmi willawan kay pasananta;
22 Judá reypa wasinpi qhepaq llapa warmikunatan Babilonia reypa autoridadninkunaman entreganqaku,+ chay warmikunataq ninqaku:
Confiasqayki* runakunaqa traicionaspan atiparqasunkiku.+
Chakiykikunatan t’uruman chinkaykachirqanku.
Kunanqa kutirispan ripunku, nispa.
23 Llapa esposaykikunatapas wawaykikunatapas Caldea runakunamanmi entreganqaku. Qanpas manan makinkumanta ayqeyta atinkichu, Babilonia reymi jap’isunki,+ causaykipin kay llaqtata kanaykunqaku”,+ nispa.
24 Chaymantan Sedequiasqa Jeremiasta nirqan: “Aman kaymantaqa pimanpas willankichu, mana chayqa wañunkin.
25 Sichus autoridadkuna yacharunqaku qanwan rimasqayta, jamuspataq nisunkiku: Reywan rimasqaykita willawayku, ama imatapas pakawaykuchu, mana chayqa wañuchisaykikun.+ ¿Imatan rey nirqasunki?, nispa chayqa
26 khaynatan ninki: Reytan valekurqani ama Jehonatanpa wasinman kutichiwananpaq, ama chaypi wañunaypaq,+ nispa”.
27 Chay qhepamanmi llapa autoridadkunaqa jamurqanku Jeremiasta tapunankupaq. Paytaq kutichirqan reypa nisqanman jina, chaymi paykunaqa manaña imatapas tapurqankuchu, manan mayqenninkupas uyarisqakuchu reywan rimasqanta.
28 Jeremiasqa Guardiakunaq Pation+ nisqallapin kasharqan Jerusalenta atipananku p’unchaykama, chaypiraqmi payqa kasharqan Jerusalenta atipaqtinkuqa.+
