Jeremías 35:1-19
-
Recab runakuna kasukuq kasqankumanta (1-19)
35 Josiaspa churin Judá rey Jehoiaquinpa+ tiemponpin Jehová Diosqa Jeremiasta nirqan:
2 “Phaway Recab runakunawan+ rimamuy, noqa Jehová Diospa wasiyman paykunata pusay, jinaspa juj kaq mijuna cuartopi vinota jaywariy”, nispa.
3 Chaymi Abaziniaspa churin Jeremiaspa churin Jazaniasta, wayqenkunata, llapa wawankunata, llapa Recab runakunata pusarqani
4 Jehová Diospa wasinman. Igdaliaspa churin profeta* Jananpa churinkunaq mijunan cuartomanmi pusarqani, chayqa Salumpa churin punku qhawaq Maseyaq mijunan cuarto patapin, autoridadkunaq mijunan cuartoq ladonpin kasharqan.
5 Jinan Recab runakunaq ñaupanman vinota vasokunapi, copakunapi junt’ata churaspa nirqani: “Kay vinota ujaykuychis”, nispa.
6 Paykunan ichaqa niwarqanku: “Manan vinotaqa ujaykumanchu, Recabpa churin Jehonadab*+ ñaupa taytaykun khaynata kamachiwarqanku: Aman vinotaqa jayk’aqpas ujankichischu qankunapas ni wawaykichiskunapas.
7 Aman wasikunata ruwakunkichischu, aman imatapas tarpunkichischu, aman uvas chajrakunata ruwankichischu ni maskhankichispaschu, aswanpas karpakunallapin tiyankichis, chhaynapi waj llaqtayoq jina tiyasqaykichis jallp’api unayta kausanaykichispaq, nispa.
8 Chaymi noqaykuqa ñaupa taytayku Recabpa churin Jehonadabpa llapa kamachiwasqankuta kasukushallayku, manan noqaykupas, esposaykupas, churiykupas ni ususiykupas vinotaqa ujaykuchu.
9 Manan wasikunatapas tiyanaykupaq ruwakuykuchu, manan uvas chajraykupas kanchu, manan campoykupas mujuykupas kanchu.
10 Noqaykuqa karpakunallapin tiyayku, ñaupa taytayku Jehonadabpa* llapa kamachiwasqankutan kasukuyku.
11 Babilonia rey Nabucodonosor kay suyu contra jamuqtinmi+ ichaqa ninakurqayku: Jaku, Jerusalenta Caldea runakunaq, Siria runakunaq soldadonkunamanta pakakunanchispaq, nispa. Chaymi kunanqa Jerusalenpi tiyashayku, nispa”.
12 Jinan Jehová Diosqa Jeremiasta nirqan:
13 “Noqa ejercitokunata kamachiq Jehová Diosmi, Israelpa Diosninmi nini: Phaway Judá runakunata, Jerusalenpi tiyaq runakunata nimuy: ¿Manachu sapa kutilla nirqaykichis simiyta kasukunaykichispaq?,+ ninmi Jehová Dios.
14 Recabpa churin Jehonadabmi miraynin runakunata kamachirqan vinota ama ujanankupaq, paykunaqa chay kamachikuyninta kasukuspan kunankamapas mana vinota ujankuchu, chhaynatan ñaupa taytankuq kamachikusqanta junt’arqanku.+ Noqaqa sapa kutillanmi rimapayarqaykichis, qankunan ichaqa mana kasukurqankichischu.+
15 Sapa kutillanmi kamachiy profetakunata kachamuspa+ nichirqaykichis: Ama jinachu kaychis, mana allin ñanta saqepuychis,+ allin kaqta ruwaychis, amaña yanqa dioskunata qatikuychischu ni serviychispaschu. Chhaynapin ñaupa taytaykichiskunaman qankunamanpas qosqay jallp’api kausashallankichis,+ nispa. Qankunan ichaqa mana uyarikurqankichischu ni kasukurqankichispaschu.
16 Recabpa churin Jehonadabpa miraynin runakunaqa ñaupa taytankuq kamachisqantan junt’anku,+ kay llaqtan ichaqa mana uyariwanchu, nispa.
17 ”Chaymi noqa ejercitokunata kamachiq Jehová Dios, Israelpa Diosnin nini: Judaman, Jerusalenpi tiyaqkunamanwanmi nisqay ñak’ariyta chayachisaq,+ rimapayashaqtiypas manan paykunaqa kasukurqankuchu, wajashaqtiypas manan uyarikurqankuchu,+ nispa”.
18 Chaymantan Jeremiasqa Recabpa miraynin runakunata nirqan: “Ejercitokunata kamachiq Jehová Diosmi, Israelpa Diosninmi nin: Ñaupa taytaykichis Jehonadabpa kamachisqanta kasukusqaykichisraykun, kunanpas llapa imachus nisqanta junt’ashasqaykichisraykun
19 ejercitokunata kamachiq Jehová Diosqa, Israelpa Diosninqa nin: Recabpa churin Jehonadabpa* mirayninmantaqa kallanqapunin ñaupaypi noqata serviwaqqa, nispa”.
Uraypi willakuykuna
^ Hebreo rimaypiqa “cheqaq Diospa runan” ninmi.
^ Hebreo rimaypiqa “Jonadab” ninmi. Jonadab sutiqa Jehonadab sutimantan jamun.
^ Hebreo rimaypiqa “Jonadabpa” ninmi. Jonadab sutiqa Jehonadab sutimantan jamun.
^ Hebreo rimaypiqa “Jonadabpa” ninmi. Jonadab sutiqa Jehonadab sutimantan jamun.
