Jeremías 33:1-26
33 Guardiakunaq Pation nisqapi+ preso kashaqtinmi Jehová Diosqa Jeremiasta wajmanta rimapayarqan, nirqanmi:
2 “Kay jallp’ata ruwaq Jehová Diosmi, kay jallp’ata allinta tajyachiq Jehová sutiyoq Diosmi, arí, Jehová Diosmi nin:
3 Wajakamuway, noqan kutichimusayki mana entiendey atina kaqkunatan, jatun musphanakunatan willasayki, mana yachasqaykikunatan willasayki,+ nispa.
4 ”Noqa Jehová Diosmi, Israelpa Diosninmi, kay llaqtapi wasikunamanta, Judá reykunaq thunisqa wasinkunamanta, jallp’a montosqa patanta jaykumuspa espadawan thunisqa wasinkunamanta,+
5 Caldea runakunawan maqanakuq jamuqkunamanta, coleraypi wañuchisqay runakunata wasipi astawan yapaqkunamanta, mana allin ruwasqankuwan kay llaqtamanta uyayta pakachiwaq runakunamanta ima nini:
6 Jampispan qhaliyachipusaq,+ paykunata qhaliyachispan mana tukurikuq thaj kayta qosaq, manan imatapas manchakunqakuñachu.+
7 Judamanta preso apasqakunatan, Israelmanta preso apasqakunatan kutichimpusaq,+ qallariypi jinan sayarichipusaq.+
8 Noqa contra juchallikusqankumantan ch’uyanchasaq,+ mana allinkunata ruwaspa noqa contra llapa juchallikusqankutan perdonapusaq.+
9 Kay llaqtaq sutinmi kusichiwanqa, kay llaqta jawan alabasqa sumaq qhawarisqa kasaq, pachantinpi nacionkunan allin kaqkuna qosqayta yachanqaku.+ Allin kaqkunata, thaj kayta kay llaqtaman qosqayraykun+ nacionkunaqa manchakunqaku qhatatatanqaku+ ima, nispa.
10 ”Jehová Diosmi khaynata nin: Kay jallp’aqa ch’usaqmi kashan, mana runakunayoqmi, mana uywakunayoqmi kashan, nispa nisqaykichis jallp’apin, arí, ch’usaqyachisqa mana runakunayoq, mana uywakunayoq, mana piqpa tiyanan Judapa llaqtankunapin Jerusalenpa callenkunapin wajmanta uyarikunqa
11 kusikuypas q’ochukuypas,+ casarakuq qhariq kusikuyninpas casarakuq warmiq kusikuyninpas. ¡Ejercitokunata kamachiq Jehová Diosta gracias niychis, Jehová Diosqa sumaq sonqon;+ mana tukukuq munakuyninqa* wiñay-wiñaypaqmi!,+ niqkunaq kunkanpas wajmantan uyarikunqa, nispa.
”Paykunan graciasta qonapaq ofrendakunata noqa Jehová Diospa wasiyman apanqaku,+ kay jallp’amanta preso apasqakunatan kutichimpusaq, qallariypi jinan imapas kapunqa, ninmi Jehová Dios.
12 ”Ejercitokunata kamachiq Jehová Diosmi nin: Kay ch’in mana runakunayoq mana uywakunayoq jallp’apin, llapa llaqtankunapi iman wajmanta pasto wiñanqa michiqkuna chayman ovejankuta apanankupaq.+
13 ”Orqo-orqo lado llaqtakunapi, urayniraq llaqtakunapi, uray lado llaqtakunapi, Benjamín ayllupi, Jerusalenpa muyuriqninkunapi,+ Judapa llaqtankunapi+ iman michiqkunaqa wajmanta ovejakunata yupanqaku, ninmi Jehová Dios.
14 ”Israelpa mirayninman Judapa mirayninmanwan promesa ruwasqayta junt’anaypaqmi p’unchaykuna chayamushanña,+ ninmi Jehová Dios.
15 Chay p’unchaykunapin, chay tiempopin Davidpaq juj chanin ch’ijchita* ch’ijchichimusaq,+ paymi kay jallp’api chanin kaqta, allin kaqta ruwanqa.+
16 Chay p’unchaykunapin Judaqa salvasqa kanqa,+ Jerusalenpas thajpin tiyanqa,+ Jehová Diosmi justiciata ruwapuwaqninchisqa, nispan sutichakunqa.+
17 ”Jehová Diosmi khaynata nillantaq: Davidpa mirayninmanta Israelpa trononpi tiyaykuqqa kashallanqapunin,+
18 Leví ayllu sacerdotekunamantan juj qhari kallanqapuni ruphachina ofrendakunata, jak’u ofrendakunata, sacrificiokunata ima ñaupaypi jaywananpaq, nispa”.
19 Jehová Diosmi Jeremiasta nillarqantaq:
20 “Noqa Jehová Diosmi nini: ¿Qankuna p’akiyta atiwaqchischu p’unchaywanpas tutawanpas rimanakusqayta? ¿Atiwaqchischu jark’ayta p’unchaypas tutapas tiempollanpi chayamunanta?+
21 Manan. Chhaynallataqmi kamachiy Davidwan rimanakusqaypas mana p’akikunqachu,+ mirayninmanta trononpi kamachikuq reypas manan chinkanqachu,+ Leví ayllu kamachiy sacerdotekunawan rimanakusqaypas manan p’akikunqachu.+
22 Imaynan cielopi ch’askakunata* mana yupayta atikunmanchu, lamar-qochapi aqotapas mana mediyta atikunmanchu, chhaynatan kamachiy Davidpa miraynintaqa askhayachisaq, serviwaqniy Leví ayllutapas askhayachisaqmi, nispa”.
23 Jehová Diosmi Jeremiasta nillarqantaq:
24 “¿Manachu kay runakunaq nisqanta uyarirqanki? Nishankun: Jehová Diosqa ajllakusqan iskaynin familiakunatan saqepunqa, nispa. Manan llaqtayta respetankuchu, manan juj nacionta jinañachu qhawarinku.
25 ”Jehová Diosmi nin: Noqan p’unchaywanpas tutawanpas rimanakurqani,+ noqan cielopaqpas kay pachapaqpas kamachikuykunata churarqani,+
26 manan jayk’aqpas saqesaqchu Jacobpa mirayninta kamachiy Davidpa miraynintapas, mirayninmantan kamachikuqkunata ajllashallasaq Abrahanpa, Isaacpa, Jacobpa mirayninpaq. Preso apasqakunatan kutichimpusaq,+ paykunatan khuyapayasaq,+ nispa”.
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “herencia chaskiqta” nillanmantaqmi.
^ Hebreo rimaypiqa “janaq pachapi kaq ejercitota” ninmi.
