Jeremías 3:1-25
3 Runakunan tapukunku: “Sichus juj runa esposanta saqepunman, esposantaq jujwan casarakapunman chayri, ¿atinmanchu esposanta saqepuq runa jujmanta chay warmiwan kutinakapuyta?”, nispa.
¿Manachu chay jallp’aqa lliu qhellichasqaña kashan?+
“Qanqa munakuqniykikunawanmi ramera warmi jina purirqanki,+¿chhayna kashaspachu kunan noqaman kutimuwankiman?” ninmi Jehová Dios.
2 “Qhawariy jaqay q’ara orqokunata.
¿Maypiraqmi mana violachikurqankichu?
Paykunaraykun ñan patakunapi tiyaq kanki,Arabia runakuna jinan ch’in pampakunapi tiyaq kanki,ramera warmi jina purispa, mana allinkunata ruwaspa iman kay jallp’ata qhellichashanki.+
3 Chayraykun parapas mana paramunñachu,+qhepa kaq parapas manan chayamunñachu.
Mana p’enqarikuq qhelli juchapi puriq esposa jinan kanki,manan chhikallantapas p’enqarikuyta munankichu.+
4 Kunantaq valekushawanki:
¡Taytalláy, sipas kashaspa reqsinakuqmasilláy!+
5 ¿Wiñaypaqchu sintikunki?
¿Wiñaypaqchu phiñasqalla kashanki?, nispa.
Chaytaña nishaspapas,mana sayk’uspan qanqa mana allin kaqta ruwashallanki”+ ninmi Diosqa.
6 Rey Josiaspa kamachikusqan tiempopin+ Jehová Diosqa niwarqan: “¿Rikurqankichu qhelli juchapi puriq Israelpa ruwasqanta? Llapa alto orqokunapin ramera warmi jina purirqan, jatun raphisapa sach’a-sach’a ukhukunapin chayta ruwarqan.+
7 Chaykunataña ruwarqan chaypas, noqaqa kutimpuy nishallarqanin,+ paymi ichaqa mana kutimurqanchu. Judapas rikusharqanmi traicionera ñañanpa chay ruwasqanta.+
8 Chayraykun qhelli juchapi puriq Israelta saqepurqani, jujwan pantasqanraykun+ t’aqanakuy papelta ruwaspa saqepurqani.+ Traicionera Judá ñañanpas manan manchakurqanchu chhayna castigasqa kaytaqa, kaqtan paypas ramera warmi jina purillarqantaq.+
9 Manan imapas qokurqanchu ramera warmi jina purisqanmanta, rumikunawan sach’akunawan pantay juchata ruwaspan kay jallp’ata qhellichashallarqan.+
10 Chaykunataña rikushaspapas traicionera Judaqa manan tukuy sonqochu noqaman kutirikamuwarqan, yanqallan kutimuq tukurqan, ninmi Jehová Diosqa”, nispa.
11 Jehová Diosmi niwarqan: “Traicionera Judamantaqa wasanchaq Israelraqmi aswan chanin kasqanta rikuchirqan.+
12 Wichay ladota riy, jinaspa kay simikunata willamuy:+
”Mana kasukuq Israel, noqaman kutimpuy, ninmi Jehová Dios.+ Noqaqa junt’aqmi kani, manan phiñasqachu qhawasayki,+ manan tukuy tiempochu sintisqalla kashasaq, ninmi Jehová Dios.
13 Juchaykita reqsikuy, Diosniyki Jehová Dios contran juchallikurqanki. Llapa raphisapa sach’a-sach’a ukhukunapin waj llaqtayoqkunawan* qhelli juchata ruwarqanki, manataqmi rimapayasqayta uyarikuyta munarqankichu, ninmi Jehová Diosqa”, nispa.
14 “Mana kasukuq runakuna* kutirikamuwaychis, noqan dueñoykichisqa kani,* sapanka llaqtamantan jujta ajllasaykichis, sapanka familiamantan iskayta ajllasaykichis, jinaspan Sionman apampusaykichis”+ ninmi Jehová Dios.
15 “Munasqayman jina* ruwaq michiqkunatan qosaykichis,+ paykunaqa yachaywan allin yuyaywan iman michisunkichis.
16 Chay p’unchaykunapin suyuntinpi askhallaña kankichis,+ qankunaqa manañan, ¡Jehová Diospa rimanakuynin arca!,* ninkichisñachu. Manan yuyarinkichisñachu, manan watukunkichisñachu, qonqapunkichismi, manañataqmi mosoq rimanakuy arcatapas ruwakunqañachu” ninmi Jehová Dios.
17 “Chay p’unchaykunapin Jerusalenta Jehová Diospa tronon ninqaku,+ llapa nacionkunan juñukamunqaku Jerusalenpi Jehová Diospa sutinta jatunchanankupaq,+ manañan mana kasukuq k’ullu sonqoykichispa munasqanman jinañachu ruwankichis” ninmi Diosqa.
18 Diosmi nin: “Chay p’unchaykunapin Judá llaqtawan Israel llaqtawan kuska purinqaku, kuskan kashanqaku.+ Ñaupa taytankuman herencianku kananpaq qosqay jallp’amanmi wichay lado jallp’amanta kuska jamunqaku.+
19 Noqaqa ancha kusisqan ajllakurqayki churiykunawan kuska kanaykipaq, sumaq jallp’atan qorqayki, llapa nacionkunamanta aswan munay kaq jallp’atan qorqayki.+ ¡Taytáy!, niwanqan, manan karunchakuwanqachu, nispan nirqani.
20 Ichaqa, imaynan juj warmi qosanta jujwan engañaspa wijch’upun chhaynatan qanpas Israel llaqta engañawarqanki,+ ninmi Jehová Dios”, nispa.
21 Q’ara orqokunapin waqay uyarikun,Israel llaqtaq waqasqanmi uyarikun,mañakusqanmi uyarikun,paykunaqa mana allin ñankunapin purirqanku,Jehová Diosninkutan qonqapurqanku.+
22 Diosmi nin: “Mana kasukuq runakuna* noqaman kutimuychis,noqan mana kasukuq sonqoykichista qhaliyachisaq”,+ nispa.
Israel runakunataq ninqaku: “Kaypin kashayku, qanmanmi kutimpushayku,Jehová, qanmi Diosniykuqa kanki.+
23 Orqokunapi qaparisqaykuqa yanqan,moqokunapi ch’aqwasqaykuqa yanqan.+
Qanllan Israel llaqtata salvaq Jehová Diosniykuqa kanki.+
24 Wayna kasqayku tiempomantapachan p’enqaypi qhepachiq idoloqa ñaupa taytaykuq sasawan llank’akusqankuta tukurqan,+chay tiempomantapachan wakankutapas ovejankutapas tukurqan,tukullarqantaqmi churinkutapas ususinkutapas.
25 P’enqaypin puñusaqku, llakikuyniykutaq qataykuwanqaku,Jehová Diosniyku contran juchallikurqayku,+ñaupa taytaykumantapachan juchallikurqayku,wayna kasqayku tiempomantapachan juchallikurqayku,+manan Jehová Diosniykuq rimapayawasqankuta kasukurqaykuchu”, nispa.
Uraypi willakuykuna
^ Chaypiqa “waj dioskunawan” nillanmantaqmi.
^ Chaypiqa yaqapaschá “qosaykichisqa kani” nillanmantaq.
^ Hebreo rimaypiqa “wawaykuna” ninmi.
^ Hebreo rimaypiqa “Sonqoypaq jina” ninmi.
^ Qhaway Explicasqa simikuna nisqapi “Rimanakuy arca” nisqata.
^ Hebreo rimaypiqa “wawaykuna” ninmi.
