Isaías 62:1-12
-
Sionpa mosoq sutinmanta (1-12)
62 Sionraykun mana ch’inllachu kasaq,+Jerusalenraykun mana jinallachu kasaq.
Chanin kaynin k’ancharinankama,+salvasqa kaynin nina jina raurarinankaman mana upallakusaqchu.+
2 “Yau warmi,+ nacionkunan chanin kasqaykita rikunqaku,llapa reykunan may jatun kasqaykita rikunqaku.+
Mosoq sutiwanmi sutichasqa kanki,+Jehová Dios kikinmi chay sutita churasunki.
3 Jehová Diospa makinpin munay corona jina kanki,Diosniykiq makinpin reypa munay uma k’uyunan jina kanki.
4 Manan wijch’usqa warmi nisqañachu kanki,+llaqtaykipas manan qonqasqa llaqta nisqañachu kanqa.+
Aswanmi Payqa Kusikunaymi+ nispa nisunkiku,llaqtaykitapas Casarasqa Warmi nispan ninqaku.
Jehová Diosmi qanwan mayta kusikunqa,llaqtaykipas casarasqa warmi jinan kanqa.
5 Imaynan juj wayna juj doncella sipaswan* casarakun,chhaynatan chaypi tiyaqkunapas qanwan casarakunqa.
Imaynan casarakuq waynaqa esposanwan kusikun,chhaynatan Diosniykipas qanwan kusikunqa.+
6 Jerusalén, perqayki patakunamanmi qhawaqkunata churani,paykunaqa manan tutapas p’unchaypas ch’inllachu kanqaku.
Jehová Diosmanta willaqkuna, ama samaychischu,
7 paymanta wajakushallaychis Jerusalenta allinta sayachinankama,Jerusalenta kay pacha runakunawan jatunchachinankama”.+
8 Paña makinta oqarispan, kallpasapa makinta oqarispan Jehová Diosqa juj juramentota ruwan:
“Manañan jayk’aqpas mijuyniykitaqa enemigoykikunaqa mijunqañachu,manañan waj llaqtayoq runakunapas sasawan llank’asqayki vinoykitaqa ujanqañachu.+
9 Aswanpas llank’aqmi mijuytaqa mijunqa, jinaspa noqa Jehová Diosta jatunchawanqa.
Uvas pallaqmi vinotapas ch’uya patioypi ujanqa”,+ nispa.
10 Jamuychis, punkunta jaykuychis.
Llaqtaq purinan ñanta allichaychis.+
Apuraylla ñankunata ruwaychis.
Llapa rumikunata chaymanta wijch’uychis.+
Llaqtakunapaq juj señalta* sayachiychis.+
11 Jehová Diosmi jallp’aq k’uchunkunakamaraq willachimun:
“Sionpa ususinta niychis:
Salvasqa kanaykiqa ñan chayamushanña.+
Payqa premio apaykusqan jamushan,pagota qonan aysarisqan jamushan,+ nispa”.
12 Paykunatan “ch’uya llaqta, Jehová Diospa rantikusqan llaqta” nispa ninqaku.+
Qantataq “Diospa Maskhasqan Llaqta, Mana Wijch’usqa Llaqta” nispa sutichasunkiku.+
Uraypi willakuykuna
^ Doncella sipastaqa “qhariwan mana jayk’aq puñuq sipas” nillankutaqmi.
^ Chaypiqa “k’aspita señalpaq” nillanmantaqmi.
