Isaías 53:1-12
53 ¿Pitaq iñirqan imachus willasqaykupi?+
¿Pimanmi Jehová Diospa atiyninta*+ rikuchikurqan?+
2 Payqa ch’ijchimuq k’allmacha jinan paypa* ñaupanpi wiñamunqa,+ch’aki pampapi saphi jinan rijurimunqa.
Payqa manan allin rijch’ayniyoqpaschu ni respetanapaq jinapaschu kanqa;+qhawarisqapas manan k’askakunapaq jinachu ni munakunapaq jinachu kanqa.*
3 Payqa pisichasqan, mana reparasqan karqan,+nanayman yachasqan karqan, onqosqa runakuna ukhupin purirqan.
Pakasqa jinan uyanqa karqan.*
Pisichasqan karqan, mana valeqta jinan qhawarirqanchis.+
4 Paymi onqoyninchiskunataqa apapurqan,+paymi nanayninchiskunatapas q’epipurqan.+
Noqanchismi ichaqa payta rikurqanchis Diospas castigashanman, paypas k’irishanman, ñak’arichishanman jinata.
5 Juchanchisraykun+ paytaqa lanzawan winarqanku,+juchanchisraykun sinchita ñak’arichirqanku.+
Thaj kananchisraykun imaymana castigota aguantarqan,+k’irisqa kasqanwanmi qhaliyachisqa karqanchis.+
6 Chinkasqa oveja jinan purisharqanchis,+sapankan maychus purinanchista purisharqanchis.
Jehová Diosmi llapa runakunaq juchanta payman q’epirichirqan.+
7 Sarunchasqan+ ñak’arichisqan karqan,+chaywanpas payqa manan imanispapas nirqanchu.
Oveja jinan ñak’anaman apasqa karqan,+willmanta rutuchikuq oveja jinan ch’inlla karqan,manan imatapas rimarirqanchu.+
8 Comunta jap’ispan, mana chaninta juzgaspan aparqanku.
¿Pitaq maymantachus jamusqanta* yachayta munarqan?
Llaqtaypa juchanraykun payqa p’anasqa* karqan,+kausaqkunamantapas t’aqasqa karqan.+
9 Manaña ima millay kaqtapas ruwarqanchu chaypas,manaña siminpipas engaño karqanchu chaypas,+mana allin kausaq runakunawan kuskan sepulturata chaskirqan,+qhapaq runakunawan kuskan p’ampasqa karqan.+
10 Jehová Diospa munayninmi karqan ñak’arinanpas sufrinanpas.*
Qanchus paypa vidanta juchaman urmasqamanta ofrendata jina jaywanki chayqa,+rikunqan payqa miraynin runakunata, wiñaypaqmi kausanqapas;+paywanmi Jehová Diospas munayninta junt’anqa.+
11 Payqa kusisqan kanqa ñak’arisqanmanta imakunachus kasqanta rikuspa.
Chanin kamachiypa+ imakunachus yachasqanwanmi jujkunapas chaninpaq jap’isqa kanqaku;+paykunaq juchankutapas paymi apapunqa.+
12 Chayraykun jujkuna ukhupi payman tupaqta qosaq.
Payqa atiyniyoqkunawanmi guerrapi imakunachus qechusqanta t’aqanakunqa.
Payqa wañuymanmi vidanta entregarqan,+juchasapakunawan kuskan yupasqa karqan,+askha runakunaq juchantan apapurqan,+juchasapakunaq favorninpin sayarirqan.+
Uraypi willakuykuna
^ Hebreo rimaypiqa “makinta” ninmi.
^ Kaypi “paypa” nispaqa yaqapaschá rimashan pipas chayta qhawaqmanta otaq Diosmanta.
^ Chaypiqa “manan imapas paypiqa rikukunchu k’askakunapaq jinaqa” nillanmantaqmi.
^ Chaypiqa yaqapaschá “Paymantan uyankuta kutiriqku” nillanmantaq.
^ Chaypiqa “piqpa miraynin kasqanmanta” nillanmantaqmi.
^ Chaypiqa “wañuqpaq k’irisqa” nillanmantaqmi.
^ Chaypiqa “Jehová Diosqa munarqanmi ñak’arinantapas sufrinantapas” nillanmantaqmi.
