Isaías 37:1-38
37 Chayta uyarispa jinan rey Ezequiasqa p’achanta llik’ikurqan, jinaspa qhasqa p’achawan churakuspa Jehová Diospa wasinman jaykurqan.+
2 Chaymantataq Ezequiasqa reypa wasinmanta* encargakuq Eliaquinta, secretario Sebnata, sacerdotekunaq umalliqninkunatawan kacharqan Amozpa churin profeta Isaiaspa kasqanman;+ paykunataqa qhasqa p’achawan churasqatan kacharqan.
3 Paykunan profeta Isaiasta nirqanku: “Rey Ezequiasmi nin: Kunan p’unchaymi sinchi llakisqa kashayku, sinchitan k’amishawanku, nishutan pisichashawanku. Imaynan juj onqoq warmi onqokunan patapi kashaspa onqokunanpaq kallpan mana kanchu,+ chhaynan kashayku.
4 Asiria reymi kamachin rafsaqueta kachamusqa Jehová Diosta k’aminanpaq.+ Yaqapaschá Jehová Diosqa k’amisqanta uyarimushan, chhaynapi cuentata mañananpaq. Ama jinachu kay, kaypi qhepaq llapa runakunapaq+ Diosmanta mañapuy,+ nispa”.
5 Jinan rey Ezequiaspa kamachinkunaqa rirqanku, jinaspa Isaiaspa kasqanman jaykurqanku.+
6 Jinan Isaiasqa paykunata nirqan: “Wiraqochaykichis Ezequiastan ninkichis: Jehová Diosmi nin: Ama manchakuychu+ Asiria reypa kamachin+ k’amiwaspa noqa contra rimasqantaqa.
7 Noqan payman juj yuyayta churasaq, jinan payqa llaqtanpi imachus pasasqanta uyarispa llaqtanman kutipunqa,+ jinaspan chaypi wañuchisaq,+ nispa”.
8 Rafsaquemi yacharurqan Lakís llaqtamanta Asiria rey ripusqanta, chaymi rafsaqueqa paywan tupaq rirqan, jinan Asiria reyta tarirqan Lifná llaqta runakunawan maqanakushaqta.+
9 Chaypin Asiria reyman willarqanku Etiopía rey Tiracá imatachus ruwashasqanta, nirqankun: “Qan contra maqanakuqmi jamushan”, nispa. Chayta uyarispan Asiria reyqa jujmanta rey Ezequiasman+ willachimurqan:
10 “Judapi rey Ezequiasta khaynata nimuychis: Ama confiasqayki Dioswanqa engañachikuychu. Payqa yanqan nishasunki: Asiria reyqa manan atipanqachu Jerusalén llaqtataqa,+ nispa.
11 Qanqa allintamá riki yachanki Asiria reykuna juj llaqtakunata imaynatachus ch’usaqyachirqan chayta,+ ¿chaychu qan salvakuwaq?
12 Ñaupa taytaykunaqa askha nacionkunatan thunirqanku, ¿atirqanchu chay nacionkunaq diosninku paykunata salvayta?+ ¿Maytaq Harán llaqtari?+ ¿Maytaq Gozanri? ¿Maytaq Rezefri? ¿Maytaq Tel-Asar ladopi tiyaq Edenmanta runakunapasri?
13 ¿Maytaq Amaj llaqtaq, Arpaj llaqtaq reyninkunari? ¿Maytaq Sefarvain llaqtaq,+ Ená llaqtaq, Ivá llaqtaq reyninkunari?, nispa”.
14 Ezequiastaq Asiria reypa kachamusqan runakunamanta cartakunata chaskispa leerqan. Chaymantataq Jehová Diospa wasinman rispa chay cartakunata Jehová Diospa ñaupanpi kicharirqan.+
15 Jinaspa Jehová Diosmanta mañakuyta+ qallarirqan:
16 “Israelpa Diosnin, ejercitokunata kamachiq Jehová Diosníy,+ qanqa querubín angelkuna patapi* kaq tronoykipin tiyashanki. Qan sapallaykin cheqaq Diosqa kanki, qanllan llapa nacionkunaq Diosninqa kanki. Qanmi janaq pachatapas kay pachatapas kamarqanki.
17 ¡Diosníy Jehová, k’umuykamuy, uyariway mañakusqayta!+ ¡Jehová Diosníy, ñawiykita kichariy, qhawariy kayta!+ Diosníy, uyariy Senaquerib imaynatachus qan kausaq Diosta k’amishasunki chayta.+
18 Diosníy Jehová, noqaqa yachanin Asiria reykunaqa llapa llaqtakunata, llaqtankutapas ch’usaqyachisqanta.+
19 Chay llaqtakunaq diosninkutapas ninapin kanaykurqanku.+ Chay dioskunaqa yanqa dioskunan karqan, rumimanta maderamanta runakunaq ruwasqallanmi karqan,+ chaychá chinkachipurqankupas.
20 Jehová Diosniyku, Asiria reypa makinmanta salvawayku, chhaynapin kay pachapi llapa kamachikuqkuna yachanqaku qan Jehová Dioslla cheqaq Dios kasqaykita”,+ nispa.
21 Jinan Amozpa churin profeta Isaiasqa Ezequiasman willachimurqan: “Israelpa Diosnin Jehová Diosmi khaynata nin: Asiria rey Senaquerib jawa mañakamusqaykiraykun noqa nini,+
22 arí, noqa Jehová Diosmi Asiria rey contra nini:
Sion llaqtan millakusunki, asipayasunki.
Jerusalén llaqtan qhawarispasuyki asikuspa umanta chhafchirin.
23 ¿Yachankichu pitachus k’amishanki chayta,+ pi contrachus rimashanki chayta?
¿Yachankichu pitachus qaparisparaq rimapayashanki chayta,+pitachus jatunchakusparaq qhawarishanki chayta?
¡Noqa Israelpa ch’uya Diosnintan chaytaqa ruwashawanki!+
24 Kamachiykikunawanmi Jehová Diosmanta burlakurqanki:+
Guerrapaq carretaykunawanmi jatun orqo patakunaman wichasaq,+Líbano orqo patakunamanraqmi wichasaq.
Jatun cedro sach’akunatan, allinnin enebro sach’akunatan wit’usaq.
Altopi kaq pakakunankumanmi, monte sach’a-sach’akunamanmi jaykusaq.
25 Unu pozokunatan t’oqosaq, chay unutan ujasaq.
Egiptopi mayukunatan* chakiywan saruspa ch’akichisaq, nispa.
26 ¿Manachu chayta uyarirqanki? Unayñan chhayna kanantaqa nirqani.
Chaykuna nisqaymantaqa unayñan pasarun,+kunantaqmi chaykunata junt’asaq.+
Chaymi qanqa allin perqayoq llaqtakunata rumi montonman tukuchinki.+
27 Chaypi tiyaqkunaqa manan imanakuytapas atinqakuchu,sinchi manchasqa, p’enqasqan kanqaku.
Campopi pasto jinan, q’omer q’achu jinan kanqaku,wasi patapi inti lloqsimuy lado wayraq ruphasqan qora jinan kanqaku.
28 Noqaqa allintan yachani imay ratuchus tiyanki chayta,imay ratuchus lloqsinki chayta, imay ratuchus kutimunki chayta,+imay ratutaqchus noqapaq phiñasqa kashanki chaytapas.+
29 Uyarinin noqa contra sinchi phiñasqa rimasqaykita,+ qaparkachaspa rimasqaykitapas.+
Chaymi senqaykiman ganchota churasaq, simiykimantaq frenota churasaq,+jinaspa maynintachus jamurqanki chayninta kutichipusayki, nispa.
30 ”Rey Ezequías, qanpaqmi kay señal kanqa; kunan watan kikillanmanta wiñaq trigota mijunkichis, jamuq watapas kikillanmanta wiñaq trigotan mijullankichistaq. Kinsa kaq watapin ichaqa qankuna t’akankichis, jinaspa chayta cosechankichis. Uvas chajrakunatan ruwankichis, chaykunaq rurusqantataq mijunkichis.+
31 Judá runakunamanta qhepaqkunan+ planta jina jallp’a ukhupi saphichakunqaku, jinaspa wiñaspa rurunqaku.
32 Jerusalén llaqtamantan puchuq runakuna lloqsimunqa, Sion orqomantan kausashaqlla qhepaqkuna lloqsimunqa.+ Ejercitokunata kamachiq Jehová Diosmi ancha sienteq kasqanrayku chayta ruwanqa.+
33 ”Chaymi Jehová Diosqa Asiria reymanta khaynata nin:+
Manan kay llaqtamanqa jaykumunqachu,+manan ni juj flechatapas flechamunqachu.
Manan jark’apakunan escudotapas oqarinqachu,manan jaykumunanpaq jallp’a montontapas sayarichinqachu,+ nispa.
34 Jehová Diosqa nillantaqmi:
Maynintachus jamurqan chaynintan kutipunqa,manapunin kay llaqtamanqa jaykumunqachu.
35 Noqan kay llaqtata waqaychasaq,+ noqan salvasaq,chaytan ruwasaq sutiyrayku+ kamachiy Davidrayku+ ima, nispa”.
36 Jinan Jehová Diospa angelninqa 185.000 Asiria runakunata karpakusqankupi wañuchirqan. Qhepantin p’unchay jatarimunankupaqqa lliumi wañusqa kasharqanku.+
37 Jinan Asiria rey Senaqueribqa Nínive llaqtaman kutipurqan,+ jinaspa chaypi qhepakurqan.+
38 Juj kutinmi Nisroc diosninman templonpi k’umuykushaqtin, churin Adramelecwan churin Sarezerpiwan espadawan payta wañuchipurqanku,+ wañurachispataq Ararat ladoman ayqekurqanku.+ Chay qhepamantaq churin Esar-Adón+ rey kapurqan.
Uraypi willakuykuna
^ Chaypiqa “palacionmanta” nillanmantaqmi.
^ Chaypiqa yaqapaschá “chaupipi” nillanmantaq.
^ Chaypiqa “Nilo mayumanta lloqsimuq yarqhakunatan” nillanmantaqmi. Yarqhataqa “larqha, sanja” nillankutaqmi.
