Isaías 30:1-33
30 Jehová Diosmi nin:
“¡Ay imaraqmi mana kasukuq churikunamanta kanqa!+
Paykunaqa mana kamachisqaykunatan ruwanku,+jujkunawanmi rimanakunku, ichaqa manan espirituywan* pusasqayman jinachu.
Chhaynapin astawanraq juchankuta montoshanku.
2 Mana tapuriwaspan+ Egiptoman jaykunku,+faraonpa* yanapaynintan maskhanku,Egiptoq llanthuntan maskhanku.
3 Faraonpa yanapayninqa p’enqaymanmi paykunata churanqa,Egiptoq llanthunpas astawanmi sarunchachinqa.+
4 Umalli runankunan Zoan llaqtapi kashanku,+willaqnin runakunapas Janeskaman chayanku.
5 Llapankun p’enqaypi tarikunqaku,mana valeq llaqtan p’enqayman churanqa,mana imapi yanapaq llaqtan mana allinta rikuchinqa”,+ nispa.
6 Kay willakuyqa uray ladopi manchay animalkuna contran:
Llaki jallp’antan, khuyay jallp’antan,qapariq leonkunaq tiyasqan jallp’antan,kanikuq mach’aqwaypa, picaq mach’aqwaypa purisqan jallp’antan,paykunaqa asnoq wasanpi qhapaq kaykunata apanku,camellokunaq wasanpitaq mijuykunata apanku.
Chaykunaqa manan servinqachu llaqta runakunapaqqa.
7 Egiptoq yanapayninqa yanqan,+chaymi sutichani: “Mana kuyuriy atiq Rahab animal”,*+ nispa.
8 Diosmi niwan: “Phaway, juj tablapi qelqamuy,paykuna rikushaqtin juj qelqapi churamuy,+chayqa jamuq tiempokaman kanqa,paykunaman willasqayqa wiñaypaqmi kanqa.+
9 Mana kasukuq llaqtan kanku,+ engañaq wawakunan kanku,+Jehová Diosninkuq kamachikuyniyta mana kasukuqkunan kanku.+
10 Rijuriy rikuqkunatan ninku: Amaña imatapas qhawaychischu, nispa.
Profetakunatataq ninku: Ama imatapas cheqaq kaq rijuriytaqa willawaykuchu.+
Aswanpas sumaq simikunata willawayku, jujniraymanta rimapayawayku.+
11 Cheqaq ñanmanta lloqsiychis, chanin ñanmanta karunchakuychis.
Amaña Israelpa ch’uya Diosninmanqa pusawaykuchu,+ nispa”.
12 Chayraykun Israelpa ch’uya Diosninqa nin:
“Manataq rimasqay simikunata uyarikuyta munankichischu chayqa,+engañaq yanqa rimaykunapitaq confiankichis chayqa,chaykunamantaq jap’ipakunkichis chayqa,+
13 chay ruwasqaykichisqa raqra-raqra* perqa jinan kanqa,kumpakushaq jatun perqa jinan kanqa.
Qonqaymi chayqa wijch’ukamunqa, qonqaymi kumpakamunqa.
14 Jatun p’uyñu jinan chhallukunqa,nishu ñut’un kapunqa;k’arpankunaqa* manan sansa apanapaqpas valenqachu,manan unu wisinapaqpas servinqachu”, nispa.
15 Tukuy munayniyoq Señormi, Israelpa ch’uya Diosnin Jehová Diosmi nin:
“Noqamanchus kutirikamuwankichis,mana kuyurispataq sayankichis chayqa salvasqan kankichis;thajlla kaspan, noqapi confiaspallan kallpayoqqa kankichis”,+ nispa.
Qankunan ichaqa mana munarqankichischu.+
16 Aswanmi nirqankichis: “¡Noqaykuqa caballopin ayqekusaqku!”, nispa.
Chhaynaqa ayqekuychis.
Nillarqankichistaqmi: “¡Allin phawaq caballopin ayqekusaqku!”,+ nispa.
Phawallaychis, qatiqniykichisqa astawanraqmi phawamunqa.+
17 Juj runallawanmi waranqa mancharikunqa,+pisqa runa jamuqtinmi manchasqa ayqerikunkichis;qankunamanta qhepaqqa orqo patapi juj k’aspi jinallañan kanqa,moqo patapi señal sayachina k’aspi jinallañan kanqa.+
18 Jehová Diosqa pacienciawanmi suyakushan,pacienciakushanmi yanapayninta rikuchinasuykichispaq,+jatarispan khuyapayayninta rikuchisunkichis.+
Jehová Diosqa chanin Diosmi.+
Paypi suyakuqkunaqa kusisqan kanku.+
19 Llaqta Sion orqopi tiyapunqa chayqa, Jerusalenpi tiyapunqa chayqa,+ manañan qanqa waqankichu.+ Yanapayta mañakuqtiykipas payqa yanapasunkin, uyarisunkin mañakusqaykitapas.+
20 Llakikuytaña t’antata jina qosunki chaypas, ñak’ariytaña unuta jina ujachisunki chaypas,+ ancha allin yachachiqniykiqa,+ Jehová Diosniykiqa manañan pakakunqachu, ñawiykiwanpunin paytaqa rikunki.
21 Pañamanña lloq’emanña pantawaq chaypas,+ qhepaykimantan uyarinki: “Kayninmi ñanqa.+ Kayninta puriy”, nimuqta.
22 Jinan qolqewan forrasqa thupasqa idoloykikunata, qoriwan forrasqa metalmanta idoloykikunatapas qhellita jina qhawaripunki.+ Qhelli thantata* jinan wijch’upunki: “¡Ripuy kaymanta!”,+ nispa.
23 Chaymantataq payqa llank’asqayki chajraman parata parachimunqa,+ jinan chajraykiqa askhata mijuyta qonqa.+ Chay tiempoqa uywaykikunapas jatun pampakunapin mijunqa.+
24 Chajra llank’aq wakaykikunapas asnoykikunapas allin mijusqan kanqaku, wayrachisqa allin pajakunatan forrajewan chhaqrusqata mijunqaku.
25 Wañuchinakuy p’unchaypiqa, torrekuna urmaykunan p’unchaypiqa, orqokunamantan unu jaykumunqa alto moqokunamantan mayu jaykumunqa.+
26 Jehová Dios llaqtanpa k’irinta jampisqan p’unchayqa,+ k’irisqanta watasqan p’unchayqa;+ inti jinaraqmi killaqa k’anchanqa, intitaq qanchis kuti mastaraq k’anchanqa,+ qanchis p’unchay juñusqata jinan k’anchanqa.
27 ¡Qhawariychis! Jehová Diosqa karumantan jamushan,phiñakuymantan raurashanraq, phuyu sonqopin jamushan.
Siminqa phiñakuywanmi junt’a kashan,qallunpas nina jinaraqmi raurarishan.+
28 Diospa samayninqa phoqchirishaq mayu jinaraqmi kunkamanraq chayashan.
Payqa llapa nacionkunatan chinkanankama suysunqa.
Llapa llaqtakunamanmi frenota churanqa+ purisqanku ñanmanta pantanankupaq.
29 Qankunaq takiykichisqa, tutapi takiy jinan kanqa,fiestapaq alistakushaspa takiy jinan kanqa,+chaykunawanmi sonqoykichis kusikunqa;flauta* tocaypi puriqpa takiynin jinan kanqa,Jehová Diospa orqonman, Israelpa qaqanman riqpa takiynin jinan kanqa.+
30 Jehová Diosmi manchakuy kunkanta uyarichinqa.+
Sinchi phiñakuyninpin+ makinta uraykachimunqa,+ninawan,+ parawan,+ rayo t’ojaywan, chijchiwan iman uraykachimunqa.+
31 Jehová Diospa kunkanta uyarispan Asiriaqa sinchita mancharikunqa,+k’aspiwanmi Diosqa payta waqtanqa.+
32 Jehová Dios castiganan k’aspiwan sapa waqtaqtinmitambor tocay arpa tocay uyarikunqa,+Asiria contra makinta oqariqtinmi chay tocaykuna uyarikunqa.+
33 Paypaqqa listoñan kashan maypichus chinkachisqa kananqa,*+reypaqpas listoñan kashan.+
Paypaq preparasqa t’oqoqa jatunmi, ukhun kashan,llant’apas askhan kashan manchakuytaraq raurananpaq.
Jehová Diospa samayninqa azufre mayu jinan,chay samayninmi ninata jap’iykachinqa.
Uraypi willakuykuna
^ Egipto reykunatan “faraón” nispa niqku.
^ Raqrataqa “laqra” nillankutaqmi.
^ K’arpataqa “k’analla, k’arpi” nillankutaqmi.
^ Chaypiqa “Killanwan kashaq warmiq yawarchasqan trapota” nillanmantaqmi.
^ Flautaqa qenaman rijch’akuqmi.
^ Chaypiqa “listoñan kashan Tofetninqa” nillanmantaqmi. Tófet nisqa cheqaspiqa ninawanmi ruphachikuq, chaymi kaypiqa chinkachiywan tupanachishan.
