2 Timoteo 1:1-18
1 Noqa Pablon Diospa munayninpi Cristo Jesuspa apostolnin* kani, Cristo Jesuswan jujllachasqa kaqkunaman prometesqa kausaymanta willanaypaq.+
2 Munasqa wawáy+ Timoteo:
Qanwan kachun Taytanchis Diospa, jinallataq Señorninchis Cristo Jesuspa ancha sumaq sonqo kaynin, khuyapayakuynin, thaj kayninpas.
3 Diostan gracias nini, paytan ñaupa taytaykuna jina ch’uya concienciawan servishani. Noqaqa yuyarillaykipunin tuta-p’unchay Diosmanta rogakuspay;
4 waqasqaykita sapa yuyarispaymi maytapuni rikuyta munayki, chhaynapi kusisqa kanaypaq.
5 Chaymantapas yuyarillanipunin tukuy sonqo iñiq kasqaykita,+ chhayna iñiqmi karqan abuelayki Loidapas mamayki Eunicepas, noqaqa allintan yachani qanpas chhayna iñiq kasqaykita.
6 Chaymi yuyarichiyki qanman makiyta churaykuqtiy+ imatachus Dios qorqasunki chayta ninata jina kausarichinaykipaq.
7 Diosqa manan manchapakuy espiritutachu qowarqanchis,+ aswanpas atiyta,+ munakuyta, allin yuyaytawan qoq espiritutan qowarqanchis.
8 Chhaynaqa, aman p’enqakunkichu Señorninchismanta willaytaqa,+ aman noqamantapas p’enqakunkichu, noqaqa payraykun presopas kashani; aswanpas listollapuni kashay Diospa atiyninpi confiaspa+ allin willakuykunarayku ñak’arinaykipaq.+
9 Paymi salvawarqanchis, ch’uya kananchispaqpas paymi wajawarqanchis;+ ichaqa manan imapas ruwasqanchisraykuchu chaytaqa ruwarqan, aswanpas paypa munayninman jina kasqanrayku, ancha sumaq sonqo kasqanrayku iman+ chaytaqa ruwarqan. Ñaupa tiempomantapachan payqa Cristo Jesuswan chay ancha sumaq sonqo kayninta rikuchiwarqanchis.
10 Kunanqa salvawaqninchis Cristo Jesuspa rijurimusqanwanmi+ allinta chay sumaq sonqo kayninta rikuchiwanchis. Criston* wañuytaqa chinkachipurqan,+ allin willakuykunawantaq+ allinta rikuchiwarqanchis+ imaynatas mana jayk’aq ismuyta atiq kausayta chaskisunman+ chayta.
11 Chay allin willakuykunata willanaypaqmi Diosqa willaqta, apostolta, yachachiqta ima churawarqan.+
12 Chayraykun noqaqa ñak’arishanipas,+ ichaqa manan p’enqakunichu.+ Noqaqa allintan reqsini pipichus iñisqaytaqa, allintataqmi yachani imachus payman jap’ichisqayta señalasqa p’unchaykama allinta cuidanantapas.+
13 Jap’ipakushallay noqamanta uyarisqayki ancha allin yachachikuykunaman,+ rikuchishallaytaq iñiytapas munakuytapas Cristo Jesuswan jujllachasqa kasqaykirayku.
14 Noqanchispi kaq santo espirituq yanapayninwan+ allinta waqaychay qanman jap’ichisqa kaq qhapaq kayta.
15 Yachasqayki jinapas, Asia provinciamanta+ kaqkunaqa llapankun saqerpariwanku, Figelowan Ermogenespiwanpas pasakapunkun.
16 Ichaqa Señor khuyapayachun Onesiforoq+ wasinpi kaqkunata, payqa askha kutipin kallpachawarqan, manataqmi p’enqakurqanchu carcelpi cadenasqa kasqaymantapas.
17 Aswanmi payqa kay Roma llaqtapi kashaspa tariwanankamapuni maskhamuwasqa.
18 Señor Jehová* paytaqa khuyapayachun señalasqa p’unchaypi. Qanpas allintamá riki yachashanki imakunatachus ruwarqan Éfeso llaqtapi chaytaqa.
Uraypi willakuykuna
^ Qhaway “Astawan yachanapaq A5” nisqata.
