2 Pedro 2:1-22
2 Ichaqa llaqtapiqa kallarqantaqmi falso profetakunapas, chhaynatan qankuna ukhupipas kallanqataq yanqa yachachiqkuna.+ Paykunan mana reparaylla t’aqanakuyman apasunkichis, chaywanmi iñiyniykichista chinkachinqaku. Paykunaqa rantiqninku dueñonkutapas cheqnikunqakun,+ chhaynapin paykunallataq usqhaylla chinkachisqa kanqaku.
2 Askhan paykunaq mana p’enqarikuspa juchallikusqankuta* qatikunqaku,+ paykunaq causanpin runakunaqa cheqaq ñanmantapas millayta rimanqaku.+
3 Chaymantapas, sinchi munapayaq kasqankuraykun yanqa rimaykunawan engañasunkichis. Ichaqa ñaupaqmantañan paykunaqa juchachasqa karqanku,+ chay juchachasqa kasqankuqa usqhamushanmi, chinkachisqa kanankupas chayamunqapunin.*+
4 Diosqa castigarqanmi juchallikuq angelkunatapas,+ chaymi payqa paykunata Tártaro* nisqaman wijch’uykuspa+ chay sinchi laqhayaq* ukhupi cadenakunawan jap’iykachirqan, chaypin wisq’arayanqaku juzgasqa kanankukama.+
5 Ñaupa tiempopi runakunatapas* castigarqanmi,+ payta mana manchakuq runakunatan unuwan millp’uchirqan,+ chanin kaqmanta willaq Noetataq+ qanchis runakunatawan+ kuskata librarqan.
6 Sodoma llaqtata Gomorra llaqtatapas castigarqanmi,+ usphamanmi chay llaqtakunataqa tukuchipurqan, chaywanmi payqa rikuchirqan payta mana manchakuq runakunata imachus qhepaman pasanqa chayta.+
7 Chaninta kausaq Lot-tan ichaqa librarqan,+ payqa maytan llakikuq millay kausaq runakunaq mana p’enqarikuspa juchallikusqankuta rikuspa.
8 Arí, chay chanin runaqa chay sinchi millay runakunawan tiyasqanpin paykunaq imayna kausasqanta rikuq imakuna rimasqankutapas uyariq, chaywanmi payqa sapa p’unchay sinchi llakisqa kaq.
9 Rikusqanchis jina, Jehová* Diosqa yachanmi pay sonqo runakunata pruebamanta librayta,+ mana chanin runakunatataq juicio p’unchaypi chinkachisqa kanankupaq waqaychayta.+
10 Astawanqa waqaychan jujkunaq cuerponkuta qhellichaspa puriqkunatan,+ paykunaqa autoridadtapas pisichankun.+
Chaymantapas chay mana manchakuq, gustollankuta ruwaq runakunaqa* sinchi millaytan rimanku Diospa jatunchasqan runakunamantapas.
11 Angelkunan ichaqa paykunamanta aswan kallpayoqña aswan atiyniyoqña kanku chaypas, Jehová* Diosta respetasqankurayku mana paykunata k’aminkuchu.+
12 Chay runakunan ichaqa animalkuna jina mana yuyayniyoq kanku, animalkuna jinan imatapas ruwanku, animalkuna jina jap’isqa kaspa wañunankupaqtaqmi nacenkupas. Mana yachasqankumantan paykunaqa millayta rimanku,+ chhayna kasqankumantan chinkachisqapas kanqaku,
13 arí, mana allin ruwasqankumantan paykunaqa mana allinllawantaq pagasqa kanqaku.
Paykunaqa may allinpaqmi rikunku p’unchaypiwanpas aychankuq munasqanman jina kausayta.+ Chaymantapas paykunaqa p’achapi qhelli jinan kanku, uyapi k’irikuna jinan kanku; qankunawan mijushaspankuqa may kusikuywanmi pantasqa yachachiyninkutapas yachachinku.+
14 Paykunaqa ima jinallañan munashanku jujwan pantayta,*+ manan aguantakunkuchu jucha ruwaytapas, iñiypi pisi kallpakunaq sonqontapas suwankun. Sonqonkupas imaymana munapayayman yachasqan kashan; ñakasqa wawakunan paykunaqa kanku.
15 Paykunaqa allin ñanmantan mana allin ñanman pantapunku, Beorpa wawan Balaampa ñanninmanmi jaykupunku.+ Payqa pagota chaskiytapuni munaspan mana allinkunata ruwarqan,+
16 ichaqa anyasqan karqan mana allin ruwasqanmanta.+ Asnonmi chay profetata runa jina rimapayarqan mana yuyaywan ruwashasqanta jark’ayta munaspa.+
17 Paykunaqa mana unuyoq pujyukunan kanku, sinchi wayraq apakachasqan phuyun kanku. Sinchi laqhayaq tutan paykunapaqqa waqaychasqa kashan.+
18 Paykunaq rimasqankuqa admirakunapaq jinaraqmi, ichaqa ch’usaq simikunatan rimanku. Aychaq munayninta antojachispa,+ mana p’enqarikuspa imatapas ruwaspanku iman paykunaqa pantasqapi kausaq runakuna ukhumanta chayraq lloqsimuq runakunaq sonqonta suwanku.+
19 Paykunaqa “libren kankichis” nispan runakunataqa ninku, ichaqa paykuna kikinkun mana allin kausaypa kamachin kanku.+ Yachasqaykichis jina, pipas piwanpas* vencechikuspaqa, chay venceqninpa kamachinmi kapun.+
20 Pipas salvaq Señor Jesucristota allinta reqsisqanrayku kay pachapi millay kausaymanta lloqsipushaspa+ wajmanta chayman kutispa chaywan vencechikuqqa, ñaupaqpi imayna kasqanmantapas aswan mana allinpiraqmi tarikushanman.+
21 Allinchá paykunapaqqa kanman karqan chay chanin ñanta ch’uya kamachikuytawan mana reqsiy, chaykunata reqsishaspaña chaykunamanta karunchakunankumantaqa.+
22 Paykunapin junt’akun “alqoqa aqtusqantan mijukapun, bañasqa khuchipas wajmantan t’urupi qhospan”+ nisqa rimay.
Uraypi willakuykuna
^ Qhaway Explicasqa simikuna nisqapi “Mana p’enqarikuspa juchallikuy” nisqata.
^ Griego rimaypiqa “manan puñunqachu” ninmi.
^ Laqhayaqtaqa “tutayaq” nillankutaqmi.
^ Griego rimaypiqa “kay pachatapas” ninmi.
^ Qhaway “Astawan yachanapaq A5” nisqata.
^ Chaypiqa “k’ullu runakunaqa” nillanmantaqmi.
^ Qhaway “Astawan yachanapaq A5” nisqata.
^ Griego rimaypiqa “Ñawinkuqa pantay juchawanmi junt’a kashan” ninmi.
^ Chaypiqa “imawanpas” nillanmantaqmi.
