2 Crónicas 4:1-22
4 Chaymantataq Salomonqa cobremanta altarta ruwarqan,+ chay altarpa largonpas anchonpas iskay chunka codon* karqan, altontaq karqan chunka codo.
2 Chaymantapas ruwallarqantaqmi cobremanta unu waqaychana jatun muyu puruñata,*+ chaytan sutichakurqan Jatun Qocha nispa. Chay puruñaq lliu muyuriqninmi karqan kinsa chunka codo, juj cantonmanta juj cantonkamataq karqan chunka codo, sayaynintaq karqan pisqa codo.+
3 Puruñaq siminpa uranpitaq muyuriqninpi iskay fila calabaza adornokuna kasharqan. Sapanka codopin karqan chunka calabaza+ adornokuna, chay adornokunaqa puruñawan kuska ruwasqan karqan, manan sapaqtachu k’askachirqanku.
4 Chay jatun puruñaqa cobremanta ruwasqa chunka iskayniyoq torokuna+ patapin kasharqan. Chay torokunan qhawarqan kinsa wichay ladota, kinsa uray ladota, kinsa inti lloqsimuy ladota, kinsataq inti jaykuy ladota. Chhaynapin llapa torokunaqa wasapura kasharqanku.
5 Puruñaq rakhunmi karqan maki ancho sayay.* Simintaq karqan lirio t’ika jina, copaq simin jina. Chay puruñamanqa jaykurqan soqta chunka soqtayoq waranqa litro* unun.
6 Chaymantapas Salomonqa unu apanapaqmi chunka tajsa puruñakunata ruwarqan, chaykunatan pisqata wasiq paña ladonman churarqan, pisqatataq wasiq lloq’e ladonman.+ Chay puruñakunapin ruphachina ofrendakunata jaywanankupaq utilizasqanku serviciokunata maqchiqku ch’uyanaqku ima.+ Jatun Qocha nisqa puruñan ichaqa karqan sacerdotekuna maqchikunankupaq.+
7 Chaymantapas ruwallarqantaqmi qorimanta chunka candelerokunata,+ chaytaqa ruwarqan planoq nisqanman jinan,+ chay candelerokunatan templo ukhuman churarqan, pisqatan churarqan paña ladoman pisqatataq lloq’e ladoman.+
8 Ruwallarqantaqmi chunka mesakunata, chaykunatapas templo ukhumanmi churarqan, pisqata paña ladoman pisqatataq lloq’e ladoman.+ Chaymantapas qorimanta pachaj jatun p’ukukunatan ruwallarqantaq.
9 Chaymantataq Salomonqa ruwarqan sacerdotekunaq+ pation nisqata,+ jatun patio nisqata,+ jatun patioq punkunkunatapas. Chay punkukunataqa lliutan cobrewan forrarqan.
10 Jatun Qocha nisqa puruñatataq churarqan wasiq paña ladonman, inti lloqsimuy ladoman.+
11 Chaymantapas Hirammi ruwarqan juj puruñakunata, palakunata, jatun p’ukukunatapas.+
Chhaynatan Hiramqa Diospa wasinpaq tukuy imaymanata ruwayta tukurqan. Payqa rey Salomonpa nisqanman jinan ruwarqan:+
12 iskay columnakunata;+ jatun p’uku jina columnakunaq umankunata; sapanka columnaq umanta adornaq mallakunata;+
13 mallakuna pataman iskay filapi churanapaq tawa pachaj granadakunata,+ chaykunan columnakunaq umanta adornarqan;+
14 chunka carretakunata;* carreta patakunapi kaq chunka puruñakunata;+
15 Jatun Qocha nisqa puruñata; chay puruñata churanapaq cobremanta ruwasqa chunka iskayniyoq torokunatapas.+
16 Chaymantapas ruwallarqantaqmi: uspha apana mankakunata, palakunata, trinchekunata,+ imaymana serviciokunatawan. Chaykunatan Hiram-Abivqa+ Jehová Diospa wasinpaq ruwarqan cobremanta munay llusk’ata, chaytaqa ruwarqan rey Salomonpa nisqanman jinan.
17 Tukuy chaykunatan rey Salomonqa cobreta unuyachispa t’uru moldekunapi ruwachirqan. Chaykunataqa ruwarqanku Jordán jallp’apin, Sucojwan+ Zeredawan tupaypi.
18 Salomonpa ruwachisqan serviciokunaqa askhapunin karqan. Jayk’a kilo cobremantachus ruwasqankuqa manan yachakurqanchu.+
19 Salomonqa Diospa wasinpaqmi ruwachirqan: qori altarta;+ Diospaq t’aqasqa t’antata churanapaq+ qori mesakunata;+
20 ch’uya qorimanta candelerokunata; candeleroq ch’uya qorimanta mecheronkunata,*+ chay candelerokunatan kamachikuypi nisqanman jina k’anchachiqku ch’uyay-ch’uya cuartoq ñaupanpi.
21 Chaymantapas ch’uya qorimantan ruwarqan t’ikakunata, mecherokunata, mecha jap’inakunata,*
22 mecha wañuchinakunata, jatun p’ukukunata, copakunata, sansa apanakunata ima. Chaymantapas qorimantan ruwallarqantaq aswan ukhupi kaq ch’uyay-ch’uya cuartoq punkunkunatapas+ temploq punkunkunatapas.+
Uraypi willakuykuna
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
^ Chay cobre puruñaqa jatun manka jinan karqan.
^ Chayqa karqan 7,4 centímetro jinan. Qhaway “Astawan yachanapaq B14” nisqata.
^ Hebreo rimaypiqa “kinsa waranqa bato” ninmi. Juj bato medidamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Chaypiqa “unu apana carretakunata” nillanmantaqmi.
^ Chaypiqa “lamparankunata” nillanmantaqmi.
^ Chaypiqa “pinzakunata” nillanmantaqmi.
