2 Crónicas 3:1-17
3 Chaymantataq Salomonqa Jerusalén llaqtapi Moria orqo+ patapi Jehová Diospa wasinta ruwayta qallarirqan.+ Chay patapin karqan Jebús runa Ornanpa+ eran,* chaytan Davidqa t’aqarqan Diospa wasinta ruwanankupaq, chaypin Jehová Diosqa Davidman rijurirqan.+
2 Salomonqa tawa wataña kamachikushaspan Diospa wasinta ruwayta qallarirqan, iskay kaq killapi iskay kaq p’unchaypi.
3 Diospa wasinpa cimentacionnintan Salomonqa ruwarqan soqta chunka codo largoyoqta, anchontataq ruwarqan iskay chunka codota,+ ñaupa medidaman jina.*
4 Ch’uya cuartoq ñaupanpi kaq sala jina jatun punkuqa temploq anchon jinan karqan iskay chunka codo, altontaq karqan pachaj iskay chunka.* Chay ukhutataq ch’uya qoriwan forrarqan.+
5 Jatun cuartotataq* Salomonqa enebro maderawan lliuta k’askachirqan, chaymantataq ch’uya qoriwan forrarqan,+ chaytataq adornarqan palmera figurakunawan+ cadena figurakunawan ima.+
6 Chay qoriqa+ Parvaimmanta apamusqanku qorin karqan. Chaymantapas chay wasitaqa ancha valorniyoq munay rumikunawanmi adornarqan.+
7 Chay wasitaqa lliutan qoriwan forrarqan: qoriwanmi forrarqan vigakunatapas, punkukunatapas, punkuq marconkunatapas,+ perqakunatapas. Chay wasiq perqankunapitaq querubín angelkunata thuparqan.+
8 Chaymantapas Salomonqa ch’uyay-ch’uya cuartotan ruwallarqantaq,+ chay cuartoq anchonpas largonpas iskay chunka codon karqan. Chay cuartotan lliuta forrarqan soqta pachaj talento* pesaq ch’uya qoriwan.+
9 Clavokunatataq bañarqan pisqa chunka siclo* pesaq qoriwan, wasi patapi kaq cuartokunatapas llapantan qoriwan forrarqan.
10 Chaymantapas ch’uyay-ch’uya cuartopin iskay querubinkunata ruwarqan, chaykunatapas qoriwanmi forrarqan.+
11 Chay querubinkunaq sapanka rafranqa+ pisqa codon medirqan, chaymi iskaynin querubinkunaq rafranqa juj kaq puntamanta juj kaq puntakama iskay chunka codo medirqan. Ñaupaq kaq querubinpa rafranpa puntanmi perqaman tuparqan, juj kaq rafrantaq iskay kaq querubinpa rafranwan tupanakurqan.
12 Iskay kaq querubinpa sapanka rafranpas pisqa codon medirqan, juj kaq rafranmi perqaman tuparqan, jujnin kaq rafrantaq ñaupaq kaq querubinpa rafranwan tupanakurqan.
13 Chay querubinkunaq rafranqa mast’arisqan kasharqan, jinan iskaynin querubinkunaq rafranqa juj kaq puntamanta juj kaq puntakama iskay chunka codo medirqan. Chay querubinkunaqa sayasharqankun, ch’uya cuarto ladomantaq qhawamusharqanku.
14 Chaymantapas Salomonqa cortinatan ruwallarqantaq+ azul hilomanta, azulniraq puka q’aytumanta, rauraq puka hilomanta, munay telamanta ima. Chay cortinapitaq querubinkunata bordarqan.+
15 Chaymantataq Diospa wasinpa ñaupanpi ruwarqan iskay columnakunata.+ Sapanka columnakunaq largonmi medirqan kinsa chunka pisqayoq codo, columnakunaq umantaq medirqan pisqa codo.+
16 Chay columnakunaq umanpaqtaq cadenakunata ruwarqan, jinaspa chay columnakunaq umanman churarqan. Jinaspapas ruwallarqantaqmi pachaj granadakunata, jinaspa chay cadenakunaman churarqan.
17 Chay columnakunatataq sayachirqan temploq ñaupanpi. Juj kaq columnatan sayachirqan temploq paña ladonpi,* jujnin kaqtataq lloq’e ladonpi.* Paña ladopi kaqtan suticharqan Jakín* nispa, lloq’e ladopi kaqtataq suticharqan Boaz* nispa.
Uraypi willakuykuna
^ Era patataqa “wayrachina pata” nillankutaqmi.
^ Juj codoqa yaqa kuskan metro jinan karqan (44,5 cm), wakin runakunan ichaqa ninku, ñaupa medida codoqa kuskan metro masmi karqan nispa (51,8 cm). Qhaway “Astawan yachanapaq B14” nisqata.
^ Chaypiqa manan yachakunchu ima medidachus kasqanta.
^ Hebreo rimaypiqa “Jatun wasitataq” ninmi. Chaypiqa yaqapaschá ch’uya cuartomanta rimashan.
^ Juj talentoqa 34,2 kilotan pesaq. Qhaway “Astawan yachanapaq B14” nisqata.
^ Juj sicloqa 11,4 gramostan pesaq. Qhaway “Astawan yachanapaq B14” nisqata.
^ Chaypiqa “uray ladonpi” nillanmantaqmi.
^ Chaypiqa “wichay ladonpi” nillanmantaqmi.
^ Jakín sutiqa “Jehová Dios allinta tajyachichun” ninantan nin.
^ Boaz sutiqa yaqapaschá “kallpawan” ninanta nin.
