1 Timoteo 1:1-20
1 Salvawaqninchis Diospa munayninpi, suyakuy qowaqninchis+ Cristo Jesuspa munayninpi ima Cristo Jesuspa apostolnin* noqa Pablon
2 qanman qelqamushayki, Señorpi iñiq cheqaq wawáy+ Timoteo:*+
Qanwan kachun Taytanchis Diospa, jinallataq Señorninchis Cristo Jesuspa ancha sumaq sonqo kaynin, khuyapayakuynin, thaj kayninpas.
3 Imaynan Macedonia provinciaman rinay kashaqtin Éfeso llaqtapi qhepakunaykipaq valekurqayki, chhaynatan kunanpas valekullaykitaq wakin runakunata anyanaykipaq, chhaynapi ama pantasqa yachachikuykunata mast’arinankupaq,
4 ama yanqa cuentokunata uyarinankupaq,+ ni ñaupa taytakunaq sutinkumanta listakunatapas t’aqwishanankupaqwan. Chaykunaqa manan imapaqpas valenchu,+ manataqmi iñiypi kallpachasqa kanapaq Diospa qosqanpaschu, aswanpas yanqa rimaykunallatan chaykunaqa jatarichin.
5 Chaykunataqa nimushayki* llapanchis ch’uya sonqowan, allin concienciawan, tukuy sonqo iñiywan+ ima munakuq kananchispaqmi.+
6 Chaykunata mana kasukuspankun wakinkunapas yanqa rimaykunaman urmarqanku.+
7 Paykunaqa Diospa kamachikuyninta yachachiqkunamanraqmi tukunkupas,+ ichaqa manan entiendellankupaschu imachus rimasqankuta, ni sayapakusqanku yachachikuykunatapas.
8 Ichaqa, yachasqayki jina, kamachikuy simiqa allinmi pipas allinta chayta junt’an chayqa;
9 chaymantapas kamachikuy simiqa manan chanin runakunapaqchu, aswanmi mana allinkunata ruwaqkunapaq,+ mana kasukuqkunapaq, Diosta mana manchakuqkunapaq, juchasapakunapaq, mana junt’aq kaqkunapaq,* imachus ch’uya kaqta mana respetaqkunapaq, taytankuta wañuchiqkunapaq, mamankuta wañuchiqkunapaq, runa wañuchiqkunapaq,
10 qhelli juchapi* puriqkunapaq, warmiwan jina qharimasinwan kaqkunapaq, runa suwaqkunapaq, llullakunapaq, rimasqankuta mana junt’aqkunapaq, allin yachachikuypa contranpi kaqkunapaq ima;+
11 chay allin yachachikuyqa kusisqa Diosmanta jamuq ancha allin willakuykunaman jinan kashan, chaykunata willanaypaqmi noqaqa churasqa karqani.+
12 Atiy qowaqniy Señorninchis Cristo Jesustan “gracias” nini; paymi junt’aq runapaq qhawariwaspa juj llank’anata qowarqan+
13 ñaupaqpi Diosta pisichaspa rimaqña karqani, jujkunata qatikachaqña karqani, millay k’amiqña karqani chaypas.+ Arí, khuyapayasqan noqaqa karqani, mana yachaspa mana iñispa imatapas ruwasqayrayku.
14 Señorninchismantan chaskirqani ancha sumaq sonqo kayninta, chaskillarqanitaqmi iñiyta Cristo Jesuspa munakuynintapas.
15 Cristo Jesusqa juchasapakunata salvaqmi kay pachaman jamurqan,+ chay nisqayqa cheqaqmi tukuy sonqowan chaskinapaq jinataqmi kanpas. Noqataqmi chay juchasapakunamanta aswan juchasapaqa kanipas.+
16 Ichaqa khuyapayasqan karqani, chhaynapi chhaynaniraq juchasapa kashaqtiy noqawan Cristo Jesús tukuy paciencianta rikuchinanpaq, wiñay kausayta suyakuspa paypi iñiqkunapaq ejemplo kanaypaqwan.+
17 Wiñay-wiñay reypaq,+ arí, mana jayk’aq ismuyta atiq,+ mana rikuna+ sapallan Diospaq+ kachun wiñay-wiñaypaq jatunchaypas qhapaq kaypas. Amén.*
18 Chay yachachikuykunatan* qanman saqeshayki, wawáy Timoteo, imaynachus qanmanta profetizasqa karqan chayman jina; chay profeciakunaq nisqanman jina maqanakushallaypuni allin kaq guerrapi,+
19 iñiypi allinta sayaspa allin concienciawan purispa ima;+ chaytan wakinqa mana valeqpaq jina qhawaripurqanku, chhaynapin iñiyninku chinkapurqan, imaynan barcopas unuman chinkaykapun chhaynata.
20 Paykunamanta wakinmi kashanku Himeneowan+ Alejandrowan, paykunatan noqaqa Satanasman entregapuni,+ chhaynapi wanachisqa* kaspanku amaña Diosta pisichaspa rimashanankupaq.
Uraypi willakuykuna
^ Timoteo sutiqa “Diosta jatunchaq” ninantan nin.
^ Chaypiqa “kamachimushayki” nillanmantaqmi.
^ Chaypiqa “mana tukukuq munakuyta mana rikuchiqkunapaq” nillanmantaqmi. Qhaway Explicasqa simikuna nisqapi “Mana tukukuq munakuy” nisqata.
^ Qhaway Explicasqa simikuna nisqapi “Qhelli jucha” nisqata.
^ Chaypiqa “Chhayna kachun” nillanmantaqmi.
^ Chaypiqa “kamachikuykunatan” nillanmantaqmi.
