1 Samuel 7:1-17
7 Jinan Quiryaj-Jearin llaqta runakunaqa jamuspanku Jehová Diospa rimanakuynin arcata Abinadabpa+ wasinman apapurqanku, payqa moqo patapin tiyarqan. Churin Eleazartataq ch’uyancharqanku Jehová Diospa rimanakuynin arcata cuidananpaq.
2 Diospa rimanakuynin arcaqa ñan iskay chunka wataña Quiryaj-Jearin llaqtapi kasharqan, jinan Israel runakunaqa Jehová Diosta maskhayta qallarirqanku.*+
3 Samuelmi Israel runakunata nirqan: “Tukuy sonqowanchus Jehová Diosman kutirikuyta munankichis+ chayqa, qankuna ukhumanta orqoychis waj llaqta runakunaq yanqa diosninkunata,+ Astoret* idolokunatawan.+ Jinaspa Jehová Diosllata tukuy sonqoykichiswan yupaychaychis.+ Chayta ruwankichis chayqa Filistea runakunamantan salvasunkichis”,+ nispa.
4 Jinan Israel runakunaqa paykuna ukhumanta Baal* idolokunata Astoret idolokunatawan ch’usaqyachirqanku, jinaspa Jehová Diosllata yupaycharqanku.+
5 Chaymantataq Samuelqa nirqan: “Llapa Israel runakunata Mizpá llaqtaman juñumuychis,+ noqataq Jehová Diosmanta mañapusaykichis”,+ nispa.
6 Jinan Israel runakunaqa Mizpá llaqtapi juñukurqanku, jinaspa unuta orqospa Jehová Diospa ñaupanpi jich’arqanku ayunarqanku+ ima. Chaypin nirqanku: “Jehová Dios contran juchallikunchis”,+ nispa. Chaypin Samuelpas Israel runakuna ukhupi juez jina serviyta qallarirqan.+
7 Filistea runakunan yacharurqanku Israel runakuna Mizpá llaqtapi juñukusqankuta, jinan Filisteapi umallikunaqa+ paykunawan maqanakuq wichamurqanku. Chayta yacharuspan Israel runakunaqa mancharikurqanku.
8 Jinan paykunaqa Samuelta nirqanku: “Jehová Diosninchismanta mañakushallay yanapawananchispaq+ Filistea runakunamantapas salvawananchispaq”, nispa.
9 Chaymi Samuelqa uña ovejachata Jehová Diosman jaywarqan ruphachina ofrendata+ jina, jinaspa Jehová Diospa yanapayninta mañakurqan. Jehová Diosqa uyarirqanmi mañakusqanta.+
10 Ofrendata Samuel jaywashanankaman Filistea runakunaqa qayllaykamusharqankuña Israel runakunawan maqanakuq. Chayllamanmi Jehová Diosqa Filistea runakuna contra cielomantapacha fuerteta rayota t’ojachimurqan,+ jinan paykunaqa sinchita mancharikurqanku.+ Chhaynapin Israel runakunaqa paykunata atiparqanku.+
11 Israel runakunaqa Mizpá llaqtamanta lloqsimuspankun Filistea runakunata qatipaspa wañuchirqanku, Bej-Car llaqtachaq uray ladonkaman qatiykurqanku.
12 Chaymantataq Samuelqa juj rumita churaykurqan+ Mizpá llaqtawan Jesaná llaqtawan tupaypi. Chay rumitan suticharqan Ebenézer* nispa, paymi nirqan: “Jehová Diosqa yanapashawanchisraqmi”,+ nispa.
13 Chhaynapin Filistea runakunaqa atipasqa kapurqanku, manañan Israel runakunaq jallp’anta qechupakurqankuñachu.+ Jehová Diosqa Samuelpa tukuy kausasqan tiempon Filistea runakuna contra kasharqan.+
14 Filistea runakunaq qechusqan llaqtakunatapas kaqtan Israel runakunaqa qechukapurqanku, Ecrón llaqtamanta Gaj llaqtakama. Chay llaqtakunaman tupaq jallp’akunatawanmi Israel runakunaqa qechukapurqanku.
Chaymantapas Israel runakunaqa thajpin kausasharqanku amorreo runakunawan.+
15 Samuelqa wañukapunan p’unchaykaman Israel runakunata juzgarqan.+
16 Sapa watanmi payqa Betel+ llaqtata, Guilgal+ llaqtata, Mizpá+ llaqtatawan riq, chay llaqtakunapin Israel runakunata juzgaq.
17 Chaymantataq kutimuq Ramá+ llaqtaman, chaypin paypa wasinqa kasharqan. Chaypipas juzgaqmi Israel runakunataqa. Ramá llaqtapin Samuelqa Jehová Diospaq juj altarta ruwapurqan.+
