Wakin nacionkunan kay pachata thuninapaq jina bombakunayoq kashanku, chaytan bomba nuclear nispa ninku. Astawantaqmi chay bombakunata ruwashanku, chaymi runakunaqa manchasqa kashanku qonqay ima ratupas chay bombakunawan pachantinpi guerra nuclear kananmanta. Wakinpas ninkun: “Juj nacionlla chay bombata kachariqtinqa wakin nacionkunapas chay bombakunatan kacharillankumantaq”, nispa. Chaymanta yachaq cientificokunapas nillankutaqmi: “Chay jina guerraqa qonqayllan kanman”, nispa (Boletín de Científicos Atómicos).

 ¿Kanmanpunichu chay bombakunawan guerra? Chay pasaqtin, ¿iman kanqa jallp’anchismanta? ¿Iman yanapawasunman ama nishuta chaykunamanta llakikunapaq? ¿Biblia chaykunamanta rimashanmanchu?

Kaypin kaykunamanta yachasun:

•  ¿Bibliapi willanchu jatun bombakunawan guerra kananmanta?

•  ¿Diosninchis permitinqachu chay bombakunawan guerra kananta?

•  ¿Chinkapunqachu jallp’anchis?

•  ¿Iman yanapawasunman chaymanta ama nishuta llakikunapaq?

•  ¿Chay bombakunata t’ojachiqtinkuchu Armagedón qallarinqa?

•  Bibliaq nisqan jina, ¿pillan guerrakunata tukuchinqa?

•  ¿Jatun bombakunawan guerra kananmantachu Apocalipsis libropi rimashan?

 ¿Bibliapi willanchu jatun bombakunawan guerra kananmanta?

 Bibliapiqa manan ninchu chay bombakunawan guerra kanqachus manachus chaytaqa. Ichaqa willarqanmi tukukuy tiempopi runakuna millay kanankuta, imaymanakuna pasanantapas. Chaymi runakunaqa manchakushanku chay bombakunawan qonqay guerra kananmanta.

 ¿Imakuna pasanantan Bibliapi willarqanña? ¿Chaykuna junt’akushanchu kay tiempopi? Chayta qhawarisun:

 Bibliapin nishan: Jesustan discipulonkuna tapurqanku: “Niwayku, ¿jayk’aqmi chaykuna kanqa? ¿Ima señalmi kanqa chayamunayki tiempoña kashaqtin, kay tiempopas tukukapunanpaqña kashaqtin?”, nispa. Jesustaq nirqan: “Juj nacionmi juj nación contra jatarinqa, juj llaqtataq juj llaqta contra jatarinqa”, nispa (Mateo 24:3, 7).

 ¿Imakunan kay tiempopi pasashan?: Chay jatun bombakunata ruwaq nacionkunapas guerrapin kashanku juj nacionkunawan.

 Proyecto de Datos de Localización y Eventos de Conflictos Armados nisqapas ninmi: “Kay último watakunapin guerrakuna astawan yapakushan”, nispa.

 Bibliapin nishan: “Tukukuy p’unchaypin uray lado reyqa wichay lado reywan maqanakuq jamunqa”, nispa (Daniel 11:40).

 ¿Imakunan kay tiempopi pasashan?: Bibliaq nisqan jina wakin nacionkunan juj paiskunata dominanankupaq imaymanata ruwashanku. Chaymantapas chay jatun nacionkunaqa kay pachata thuninapaq jina bombakunatan astawanraq ruwashanku, chay bombakunaqa ratullan maymanpas chayarunman.

 Programa de Datos sobre Conflictos de la Universidad de Uppsala nin: “Kay último watakunapin guerrakuna astawan yapakushan, chaymantapas chay jatun nacionkunan favorninpi kashaq paiskunata guerrapi apoyashanku”, nispa.

 Bibliapin nishan: “Tukukuy p’unchaykunataqa manchakuy sinchi sasa tiempokunan chayamunqa. Runakunan kanqa [...] mana uyakuq k’ullukuna, yanqa tumpaqkuna, cuerponkuta mana kamachiqkuna, sinchi k’araq sonqokuna”, nispa (2 Timoteo 3:1-3).

 ¿Imakunan kay tiempopi pasashan?: Kay tiempopi runakunaqa manañan ima acuerdomanpas jaykuyta munankuchu, chaymi nacionkunata kamachiqkunapas guerraman jaykuspallaña munasqankuta ruwanku. Chaykuna kasqanwanmi runakunaqa manchakushanku qonqay ima ratupas jatun bombakunawan guerra kananmanta.

 Foro Económico Mundial nin: “Sichus autoridadkuna mana kallpachakunqakuchu acuerdoman jaykunankupaq chayqa, astawanmi guerrakunaqa yapakunqa, aswan askha runakunataq wañunqaku”, nispa.

 ¿Diosninchis permitinqachu chay bombakunawan guerra kananta?

 Bibliapiqa manan willanchu chay bombakunawan guerra kanqachus manachus chaytaqa. Ichaqa willarqanmi “mancharikunapaq jina” imaymana pasananta (Lucas 21:11). Chaykunaqa ñan pasarqanña Segunda Guerra Mundial kashaqtinpas. Chay kutipin iskay jatun bombakunata t’ojachirqanku. Ichaqa, ¿imaraykun Dios jinallata qhawan guerrakuna kananta? Chaymanta yachanaykipaq qhaway ¿Imaraykun Dios jinallata qhawan ñak’ariykunata? nisqa videota.

 ¿Chinkapunqachu jallp’anchis?

 Manan, chay bombakunata iskay kinsata kacharinkumanña chaypas, Diosqa manan permitinqachu chay bombakunawan mundontinpi guerra kanantaqa, chay guerra kanman chayqa llapanchischá chinkapusunman. Chaymantapas Bibliapiqa willanmi jallp’anchis mana jayk’aqpas chinkananta, runakunapas wiñaypaq kausanankuta.

 Wakin runakunan ninku: “Chay jatun bombakunawan guerra kaqtinqa, pisi runakunallañachá kay pachapiqa qhepanqaku, imaymana llakipichá tarikunqakupas jallp’anchis contaminasqa kapuqtin”, nispa. Diosmi ichaqa Bibliapi prometewanchis jallp’anchista allichapunanpaq.

 Kay jallp’anchisqa kikillanmanta allichakunanpaq jinan kamasqa karqan. Chaymantapas Diosmi prometewanchis jallp’anchista allichapunanpaq; chaymi runakunaqa wiñaypaq chaypi tiyanqaku (Salmos 37:11, 29; Apocalipsis 21:5).

 ¿Iman yanapawasunman chaymanta ama nishuta llakikunapaq?

 Wakinqa manchasqan kashanku chay bombakunawan guerra kananmanta, llakikunkutaq chay pasaqtin imaynachus kausay kananmanta. Bibliapin ichaqa kashan sumaq consejokuna, chaykunan yanapawasunchis ama nishuta llakikunanchispaq.

 Bibliapin willawanchis jamuq tiempopi sumaq kausay kananmanta. Chayta yachayqa yanapawasunmi sonqonchis tiyaykunanpaq, amaña nishuta llakikunanchispaqpas (Hebreos 6:19, willakuyta qhaway). Chaymantapas manan allinchu kanman jamuq tiempopi imakunachus pasanqa chaymanta nishuta llakikuyqa, Jesusmi nirqan: “Sapa p’unchay llakikuyqa chay p’unchayllapaq kachun”, nispa (Mateo 6:34).

 Saludninchistaqa cuidananchismi, sichus nishuta qhawasunman chay bombakunawan guerra kananmanta, otaq periodistakunaq chaymanta imachus nisqankuta chayqa, nishutan llakikusunman onqorapusunman imaraqmi. Chaymantapas manan sut’itapuniqa yachasunmanchu imakunapunichus pasanqa chaytaqa, manataqmi noqanchisqa chaykunataqa allichayta atisunmanchu, chaymi mana allinchu kanman chaykunamanta nishuta llakikuyqa.

 Ama nishuta qhawaychu chay llakikunapaq noticiakunata, aswanpas imakunatas vidaykipi allinta ruwashanki chaykunapi masta piensay.

 Diospa promesankunamanta yachanki chayqa sonqoyki ukhupin thaj kanki.

 ¿Chay bombakunata t’ojachiqtinkuchu Armagedón qallarinqa?

 Wakin runakunan piensanku chay bombakunata mundontinpi t’ojachiqtinku Armagedón qallarinanpaq. Chay bombakunawan guerra kanman chayqa, manañachá kay pachapiqa kausay kanmanñachu.

 Bibliapin ichaqa Armagedonmanta rimaspa Diospa guerranmanta rimashan, chay guerrapiqa Diosmi kay pachapi gobiernokunawan maqanakunqa a (Apocalipsis 16:14, 16). Diospa guerranpiqa manan llapa runakunachu wañunqaku, Diosqa millay runakunallatan chinkachipunqa, chay qhepamantaq kay pachapi sumaq kausay kanqa (Salmos 37:9, 10; Isaías 32:17, 18; Mateo 6:10).

 Bibliaq nisqan jina, ¿pillan guerrakunata tukuchinqa?

 Jehová b Diosmi guerrakunata ruwaq nacionkunata chinkachipunqa, jap’isqanku bombakunatapas armakunatapas ñut’upunqan, chaymi manaña kay pachapiqa guerrakuna kanqachu. Chaytaqa gobiernonwanmi ruwanqa, chay gobiernoqa janaq pachamantan pachantinta kamachimunqa (Daniel 2:44).

 Diospa gobiernonqa runakunatan yachachinqa thajpi kausayta. Chay gobiernollataq mundontinta kamachinqa chayqa, manañan runakunaqa t’aqanasqañachu kausanqaku, nitaqmi guerramanpas jaykunqakuñachu (Miqueas 4:1-3). Chayraykun Bibliapi nishan: “Sapankankun uvas sach’anku k’uchupi, higos sach’anku k’uchupi tiyaykunqaku, manan pipas paykunataqa manchachinqachu”, nispa (Miqueas 4:4).