Tito 1:1-16

  • Napaykuy (1-4)

  • Tito umalliqkunata churananpaq Cretapi kasqanmanta (5-9)

  • Anyanan mana kasukuqkunataqa (10-16)

1  Noqa Pabloqa Diospa kamachinmi kani, Jesucristoq apostolnintaqmi kanipas, iñiyniypas apóstol jina llank’asqaypas Diospa ajllasqankunaq iñiyninman jinan kashan, cheqaq kaqta allinta yachayman jinataqmi kashanpas; chaytaq Diospa ancha sumaq sonqo kayninman jina kashan.  Chaymantapas tukuy chaykunaqa wiñay kausay suyakuyman jinan kashan, chaytaqa mana jayk’aq llullakuq Diosmi prometeran ñaupa tiempomantapacha.  Payqa tiemponpin siminta reqsichiran allin willakuykuna willakusqanwan, chayta willanaypaqmi noqaqa churasqa karani salvawaqninchis Diospa kamachisqanman jina.  Noqan qanman qelqamushayki, iñiqmasi cheqaq wawáy Tito: Qanwan kachun Dios Yayaq, jinallataq salvawaqninchis Cristo Jesuspa ancha sumaq sonqo kaynin thaj kayninpas.  Cretapiqa saqemurayki mana allin ruwaykunata correginaykipaq, sapanka llaqtapi umalliqkunata churanaykipaqwanmi. Imaynan kamachirayki jina,  umalliqqa* kanan mana juchachana, juj esposallayoq iman, wawankunapas iñiq, allin kausaq, kasukuq iman kananku.  Iñiqkunata qhawariqqa Diospa mayordomontaq chayqa, mana juchachanan kanan, manan munasqanman jinallachu imatapas ruwanan, manan ratolla phiñakuqchu kanan, manan machaqchu kanan, manan pitapas maltrataqchu kanan, manataqmi imaymanayoq kayta maskhaspa puriqchu kanan,  aswanmi kanan jujkunata sumaqta chaskiq, allin kaqta munakuq, allin yuyaywan imatapas ruwaq, chanin kaqta ruwaq, junt’aq sonqo, cuerponta kamachiq ima;  chaymantapas cheqaq yachachikuyman k’askakuspa allinta yachachiqmi kanan, chhaynapi allin yachachikuyman jina jujkunata kallpachananpaq, chay yachachikuypa contranpi rimaqkunatapas anyananpaqwan. 10  Askhan rijurimushan mana kasukuq runakuna, yanqata rimaqkuna, engañaqkunapas; astawanqa qhari kay qaracha kuchuchikuyman k’askakuqkunan chhaynaqa kashanku. 11  Wisq’anapunin chay runakunaq simintaqa, paykunaqa imatapas gananankuraykun mana kaqta yachachispa entero wasikunata iñiypi urmachishanku. 12  Llaqtamasinku profetapunin niran: “Creta runakunaqa llullallañan kanku, manchakuy phiña animalkuna jinan kankupas, mana ima ruwaq rajrapukunataqmi kankupas”, nispa. 13  Chay nisqayqa cheqaqpunin. Chayrayku paykunataqa allin-allintapuni anyay, chhaynapi iñiypi qhalilla kashanankupaq, 14  judiokunaq cuentonkunata ama uyarishanankupaq, cheqaq kaqmanta t’aqakuq runakunaq kamachikusqankutapas ama uyarishanankupaqwan. 15  Limpio kaqpaqqa tukuy imapas limpiollataqmi, mana iñiyniyoq qhelli kaqkunapaqmi ichaqa mana imapas limpiochu, paykunaq yuyayninku concienciankupas qhellillaña kasqanrayku. 16  Paykunaqa “reqsiykun Diostaqa” nispan purinku, imayna kausasqankuwanmi ichaqa Diosta neganku; paykunaqa millakunapaq jinan kanku, mana kasukuqmi kankupas, manataqmi servinkuchu allin ruwaykunata ruwanankupaqpas.

Uraypi willakuykuna

Qhaway “explicasqa simikuna” nisqapi “umalliq” nisqata.