Santiago 5:1-20

  • Qhapaqkunata anyakusqanmanta (1-6)

  • Aguantaqkunaqa bendecisqa kanankumanta (7-11)

  • “Arí” nisqaykichisqa “arí” nisqallapuni kachun (12)

  • Iñiywan mañakuyqa allinpuni kasqanmanta (13-18)

  • Pantaqta allin ñanman kutichimunamanta (19, 20)

5  Yau qhapaqkuna, waqaychis, qapariychis, sinchi llakikunaykichis tiempoqa chayamushanñan.  Qhapaq kayniykichisqa ismupunñan, p’achaykichispas thutaq tukusqanñan kapun.  Qoriykichispas qolqeykichispas oxidapunñan, chay oxidasqanmi rikuchinqa juchapi kashasqaykichista, chay oxidotaqmi aychaykichistapas tukupunqa. Imachus juñusqaykichisqa nina jinan kanqa tukukuy p’unchaykunapiqa.  ¡Uyariychis! Chajraykichista cosechaqkunaman mana qosqaykichis pagon wajakushan; chajraykichista rutuqkunaq khuyayta wajakusqankupas janaq pacha ejercitokunata kamachiq Jehová Diospa ninrinmanmi chayan.  Qankunaqa tukuy imaymanayoq kaspan kusikuykunallapi kay pachapi kausarankichis, nak’ana p’unchaypaqmi sonqoykichistapas wirayachirankichis.  Chaymantapas pichus chanin kaqtan juchachaspa wañuchirankichis. Chayraykun payqa contraykichispi kashan.  Wayqe-panaykuna, Señorpa chayamunan tiempokama pacienciakuychis. Yachasqaykichis jina, chajra llank’aq chajraq ancha valeq rurunta oqarinanpaqqa ñaupaq parata qhepa paratawanmi pacienciawan suyakun ¿riki?  Chhaynata qankunapas pacienciakuychis. Chaymantapas Señorpa chayamunan tiempoqa cercapiñan kashan, chayrayku sonqoykichista allinta kallpachaychis.  Wayqe-panaykuna, ama qankuna ukhupiqa jujkunamanta rimakuy kachunchu, chhaynapi mana juzgasqa kanaykichispaq. Chaymantapas juzgaqqa punkupiñan kashan. 10  Wayqe-panallaykuna, Jehová Diospa sutinpi rimaq profetakuna jina kaychis, paykunaqa imaymanakunapin ñak’ariranku, pacienciawantaqmi aguantarankupas. 11  Chhaynata aguantaqkunaqa kusisqan kanku. Qankunaqa yachankichismi imaynatachus Job aguantaran, imaynatachus Jehová Diospas bendeciran chaytaqa ¿riki? Chhaynapin Jehová Diosqa rikuchiran ancha munakuq kasqanta, khuyapayakuq kasqantawan. 12  Astawanqa, wayqe-panaykuna, ama imaraykupas juraychischu ni janaq pacharaykupas ni kay pacharaykupas. “Arí” nisqaykichisqa “arí” nisqallapuni kachun, “manan” nisqaykichispas “manan” nisqallapuni kachun, mana chayqa juchachasqan kawaqchis. 13  Pipas qankuna ukhupi sasachakuykunawan ñak’arishan chayqa, Diosmanta mañakuspa kachun. Pipas kusisqa kashan chayqa, adorana takikunata takichun. 14  Pipas onqosqa kashan chayqa, iñiq t’aqapi umalliqkunata* wajakamuchun, paykuna chay onqosqapaq mañapuchunku, aceitewanpas Jehová Diospa sutinpi jawichunku. 15  Iñiywan mañakuymi chay onqosqata* qhaliyachinqa, Jehová Diostaqmi jatarichinqapas. Juchallikuranña chaypas, perdonasqan kanqa. 16  Chayrayku, qankunapura juchaykichiskunata willanakuychis, jujkuna-jujkunapaqtaq Diosmantapas mañapuychis, chhaynapi qhaliyachisqa kanaykichispaq. Chanin runaq rogakuyninqa ancha atiyniyoqmi jujkunata yanapananpaq. 17  Eliaspas noqanchis jinan runalla karan, paymi tukuy sonqowan Diosmanta mañakuran ama paramunanpaq, jinan mana paramuranchu kinsa wata soqta killata. 18  Chay qhepamanmi payqa mañakullarantaq, jinan paramuran, chhaynapin allpaqa mijuyta qoran. 19  Wayqe-panallaykuna, qankunamanta pipas cheqaq ñanmanta pantachisqa kanman jujtaq chay pantaqta kutichimunman chayqa, 20  chay kutichimuqmi chay juchallikuqta* wañuymanta salvashanman, juchankuna perdonasqa kananpaqtaqmi yanapashanmanpas.

Uraypi willakuykuna

Qhaway “explicasqa simikuna” nisqapi “umalliq” nisqata.
Chaytaqa “chay sayk’usqata” nispapas t’ijrakullanmantaqmi.
Chaypiqa “chay juchallikuqpa almanta” nillanmantaqmi.