Santiago 3:1-18

  • Qalluta mansoyachinamanta (1-12)

    • Manan llapachu yachachiqkunaqa kananku (1)

  • Janaq pachamanta jamuq yachaymanta (13-18)

3  Wayqeykuna, manan llapaykichischu yachachiqkunaqa kanaykichis. Yachasqaykichis jina, Diosqa allin-allintapunin t’aqwinqa imaynatachus chay ruwananchista junt’ashanchis chayta, chayman jinataqmi juzgasqapas kasunchis.  Llapanchispas pantanchispunin imallapipas ¿riki? Pipas rimasqanpi mana pantaqqa mana ima juchayoqchá chay runaqa, cuerpontapas allintachá dominan.  Caballokunawan kasuchikunapaqqa frenotan siminman churakun ¿riki? Chay frenowanmi llapa cuerpontapas dominakun.  Barcokunapas ancha jatunña, sinchi wayraq apasqanña chaypas, juj juch’uy timonllawanmi chaykunataqa apakachakun, arí, chay timonllawanmi barcota purichiqqa may munasqanmanpas kutirichin.  Chhaynallataqmi qallupas, juch’uychallan cuerpopiqa, ichaqa sinchitan alabakun. Ninaqa juch’uy rauraychallamantan may jatun sach’a-sach’ata ruphaykapunman ¿riki?  Chay nina jinallataqmi qalluqa kallantaq. Cuerponchispa llapa partenkunamantaqa chay qallunchismi tukuy mana chanin kaqkunawan junt’a kashan, llapa cuerpotataqmi qhellichanpas. Qalluqa lliutan runaq vidanta ruphaykapunman, arí, Gehena jinan lliuta ch’usaqman tukuchipunman.  Salqa animalkunata, alton phawaq animalkunata, suchuq animalkunata, lamar-qochapi kaq animalkunatapas mansoyachikullanmanmi, ñataqmi runakunaqa mansoyachinkuña kanpas.  Qallutan ichaqa mana pipas mansoyachiyta atinmanchu. Qalluqa mana kamachiy atiymi, sinchi mana allinmi, venenowantaqmi junt’a kashanpas.  Chay qalluwanmi Yayanchis Jehová Diostaqa jatunchanchis, chay qallullawantaqmi “Diospa rijch’ayninman jina” kamasqa runakunatapas ñakanchis. 10  Arí, kaq simillamantan bendicionpas ñakaypas lloqsimun. Wayqeykuna, manapunin chaykunaqa kananchu. 11  Manan kaq pujullamantaqa lloqsinmanchu misk’i unupas kachi unupas ¿riki? 12  Wayqellaykuna, manan higos sach’apas aceitunataqa rurunmanchu, nitaq uvas sach’apas higostaqa rurunmanchu ¿riki? Manallataqmi kachi unumantaqa misk’i unuta orqokunmanchu. 13  ¿Pillapas kanchu qankuna ukhupi allin yachayniyoq allin yuyayniyoq runa? Kan chayqa, chhayna kasqanta rikuchichun allinta kausaspa, yachaymanta jamuq llamp’u sonqo kaywan tukuy imatapas ruwaspa. 14  Ichaqa sonqoykichispichus kashanman sinchi envidianakuy, churanakuy chayqa, yanqan alabakushawaqchis, cheqaq kaq contrataqmi llullakushawaqchispas. 15  Chay yachayqa manan janaq pachamantachu jamun, aswanmi chayqa jamun kay pachamanta, aychaq munayninman jina puriqkunamanta, supaykunamanta ima. 16  Maypichus envidianakuy churanakuypas kan chaypin kallantaq ch’aqwaypas tukuy mana allin kaqkunapas. 17  Janaq pachamanta jamuq yachaymi ichaqa runata tukuchin ch’uya sonqoman, thaj kausayta maskhaqman, llamp’u sonqoman,* usqhaylla kasukuqman, ancha khuyapayakuqman, tukuy imapi allin kaqkunata ruwaqman, mana pimanpas sayapakuqman, mana iskay uyawanchu imatapas ruwaqman ima. 18  Chaymantapas chanin kay ruru mujutaqa maypichus thaj kausay kan chaypin t’akakun, thaj kausayta maskhaqkunaq allinninpaqtaqmi chayqa kanpas.

Uraypi willakuykuna

Chaypiqa “mana terco kaqman” nillanmantaqmi.