Santiago 2:1-26

  • Runata imayna kasqanman jina ajllayqa jucha kasqanmanta (1-13)

    • Runamasita munakuyqa ancha allin kamachikuymi (8)

  • Mana imatapas ruwaqtinchisqa wañusqan iñiyninchisqa kashanman (14-26)

    • Supaykunapas creenkun manchakunkutaqmi kanpas (19)

    • Abrahanqa “Jehová Diospa amigon” nisqan karan (23)

2  Wayqe-panaykuna, ¿imaynapitaq qankunari jatunchasqa Señorninchis Jesucristopi iñishaspa wakinta jatunchashankichis wakintataq pisichashankichis?  Juñunakusqaykichisman juj runa qori anillontin ancha sumaq p’achasqa jaykumuqtin, chayllamantaq juj wajcha runa qhelli p’achallaña jaykumuqtinqa,  ¿chay allin p’achasqa runatachu sumaqta qhawarispa ninkichis: “Jamuy kayman, kay allin kaq tiyanapi tiyakuy”, nispa? ¿Chay wajchatataqchu ninkichis: “Chayllapi sayay” otaq “kay pampapi tiyaykuy”, nispa?  Chayta ruwashawaqchis chayqa, ¿manachu wakin runata aswan allinpaq qhawarishawaqchis wakintataq pisichashawaqchis? Chaymantapas, ¿manachu mana chaninta juzgaq juezkuna jina kashawaqchis?  Munasqa wayqe-panaykuna, uyariwaychis, ¿manachu Diosqa kay pacha runakunaq wajchapaq qhawarisqan runakunata ajllaran iñiyninkupi qhapaq kanankupaq? Paykunatamá riki ajllaran munakuqninkunaman prometesqan gobiernota herenciata jina chaskinankupaqpas.  Qankunataq ichaqa wajchakunata pisichashankichis. ¿Manachu qhapaqkuna qankunataqa ñak’arichishasunkichis, juezkunamanpas aysashasunkichis?  ¿Manachu paykunaqa apasqaykichis ancha allin sutitapas millayta k’amishanku?  Diospa simin qelqapin nishan: “Runamasiykitan qan kikiykita jina munakunki”, nispa, chay ancha allin kamachikuytachus junt’ankichis chayqa, allinmi chay ruwasqaykichisqa kanqa.  Ichaqa kaqllachus runakunata imaynachus kasqankuman jina ajllashawaqchis chayqa, juchatan ruwashawaqchis, chhaynapitaq chay kamachikuypa juchachasqan kawaqchis. 10  Pipas kamachikuy simita llapanta junt’ashaspa jujnillanpi pantarunman chayqa, llapa kamachikuy contran juchallikushanman. 11  “Aman jujwan pantankichu” niqqa, “aman pitapas wañuchinkichu” nillarantaqmi. Chayrayku, manapaschá piwanpas pantashawaqchu, ichaqa pitapas wañuchiwaq chayqa, llapan kamachikuytan p’akishawaq. 12  Qankunaqa libre llaqtan kankichis, qankunapaq kaq kamachikuyman jinataqmi juzgasqapas kankichis, chayrayku chayman jina imatapas ruwaychis rimaychispas. 13  Pipas mana khuyapayakuqqa mana khuyapayakuyllawantaqmi juzgasqa kanqa. Khuyapayakuyqa gananqan ima juiciotapas. 14  Wayqe-panaykuna, pipas “iñiyniyoqmi kani” nishaspa, allin kaqkunata mana ruwanmanchu chayqa, ¿valenmanchu chay iñiynin? Chhayna iñiyqa manan chay runataqa salvanmanchu ¿riki? 15  Mayqen iñiqmasinchismanpas p’acha faltashanman, chay p’unchaypaq mijunanpas faltashanman, 16  jinaspa mayqenniykichispas niwaqchis: “Sumaqlla ripukuy, q’oñita p’acharakamuy, sajsatataq mijurakamuy”, nispa, manataq ima necesitasqantapas qowaqchischu chayqa, ¿ima allintataq qankunari ruwashawaqchis? 17  Chhaynan iñiywanpas kanman, manachus allin kaqkunata ruwasunman chayqa, wañusqan iñiyninchisqa kashanman. 18  Ichaqa, yaqapaschá pipas ninman: “Qanqa iñiyniyoqmi kanki, noqataq allin kaqkunata ruwani”, nispa. Yau chhaynata rimaq runa, awer rikuchiway iñiyniykita mana imatapas ruwaspalla, noqataq iñiyniyta rikuchisayki allin kaqkunata ruwaspa. 19  Qanqa creenkin Diosqa ch’ullalla kasqanta ¿riki? Allinmi chayqa. Supaykunapas creenkun chaytaqa, manchakuymantataqmi khatatatankupas. 20  Yau mana yuyayniyoq runa, ¿manachu yachanki mana ruwayniyoq iñiyqa yanqapaq kasqanta? 21  ¿Manachu taytanchis Abrahanpas imachus ruwasqanrayku chaninpaq jap’isqa karan? Arí, payqa wawan Isaacta sacrificiopi jaywananpaq altarman churaqtinmi chhayna qhawarisqa karan. 22  Rikusqayki jina, Abrahanpa iñiyninqa imachus ruwasqankunawan kuskan llank’aran, imachus ruwasqankunawantaqmi junt’apasqapas karan. 23  Chayraykun Diospa simin qelqapipas nin: “Abrahanqa Jehová Diospi iñisqanraykun chaninpaq jap’isqa karan”, nispa, chhaynapin payqa “Jehová Diospa amigon” nisqa kapuran. 24  Rikusqaykichis jina, allinkuna ruwasqanraykun pipas chaninpaqqa jap’isqa kanqa, manan iñisqanraykullachu. 25  ¿Manachu qhelli kausaypi puriq* Rahabpas imachus ruwasqanrayku chaninpaq jap’isqa karan? Payqa qhamiyaq runakunata sumaqta chaskispan juj ladonta kachapuran. 26  Imaynan mana espirituyoq cuerpoqa wañusqa kashan, chhaynallataqmi iñiyninchiswanpas kanman; manachus allin kaqkunata ruwasunman chayqa, wañusqan iñiyninchisqa kashanman.

Uraypi willakuykuna

Chaypiqa cuerponta vendeq warmimantan rimashan.