Romanos 9:1-33

  • Israel llaqta runakunamanta Pabloq llakikusqan (1-5)

  • Pikunapunichus Abrahanpa miraynin kasqanmanta (6-13)

  • Diosta mana kutipakunamanta (14-26)

    • Millay runakunamanta, khuyapayanapaq jina runakunamantawan (22, 23)

  • Wakillan salvasqa kanankumanta (27-29)

  • Israel llaqta runakunaq urmasqanmanta (30-33)

9  Noqaqa Cristoq discipulon jinan cheqaqta rimashani, manan llullakushanichu, concienciaypas santo espirituq pusasqanmi sut’itapuni willakun  sonqoypi sinchi llakisqa kashasqayta may nanasqa kashasqaytawan.  Cristota mana qatikuq wayqe-panaykunaq chaskinanku castigota chaskiychus paykunata yanapanman chayqa, liston noqaqa kashani chay castigota chaskinaypaq,  chay wayqe-panaykunaqa Israel runakunan kanku. Paykunatan Diosqa wawankunata jina adoptaran, paykunamanmi qhapaq atiyta qoran, paykunawanmi rimanakuranpas, kamachikuy simitapas paykunamanmi qoran. Chaymantapas paykunan Diostaqa adoraranku, paykunan promesankunatapas chaskiranku.  Paykunaqa ñaupa taytakunaq mirayninmi kanku, paykunamantan Cristopas runa jina naceran. Wiñaypaq jatunchasqa kachun tukuy imata kamachiq Diosqa. Amén.  Kunanmi ichaqa Diosmanta t’aqasqa kashanku. Ichaqa manan chayraykuchu nisunman “Diospa siminqa mana junt’akuqmi” nispaqa. Manan Israelpi llapa naceqkunachu “Israel runakuna” kanku.  Manataqmi Abrahanpa miraynin kasqankuraykuchu llapanku paypa wawankuna kanku. Diospa simin qelqapas ninmi: “Mirayniykiqa Isaacmantan jamunqa”, nispa.  Chhaynaqa, manan Abrahanpa llapa wawankunachu Diospa wawankuna kanku, aswanpas Diospa promesanmanta jamuqkunan paypa mirayninqa kanku.  Diosmi khaynata prometeran: “Watamanmi kunan jinata kutimusaq, chaypaqqa wawayoqñan Saraqa kanqa”, nispa. 10  Manan chay kutillachu Diosqa prometeran, ñaupa taytanchis Isaacpaq mellizokunawan Rebeca onqoq kashaqtinpas prometeranmi. 11  Diosqa ñan yachasqaña mayqentachus ajllanan karan chayta, chayqa manan chay ajllasqanpa imachus ruwasqanman jinachu kanan karan, aswanpas pitachus wajay munasqantan ajllanan karan. Chaymi manaraq naceshaqtinku, manaraq allin kaqta ni mana allin kaqtapas ruwashaqtinku 12  Diosqa Rebecata niran: “Kuraq kaqmi sullk’a kaqpa kamachin kanqa”, nispa. 13  Qelqasqan kashanpas: “Jacobtan munakuni, Esautataq cheqnikuni”, nisqa. 14  Chhaynaqa, ¿ima nisuntaq? ¿“Diosqa manan chaninchu” nisunchu? ¡Manapunin! 15  Paymi Moisesta niran: “Noqaqa pitachus khuyapayayta munani chaytan khuyapayasaq, pitachus llakipayayta munani chaytan llakipayasaqpas”, nispa. 16  Chhaynaqa, pipas ajllasqa kananpaqqa khuyapayakuq Diosmantan dependen, manan runaq munayninmantachu, nitaq kallpachakusqanmantapaschu. 17  Diospa simin qelqaq nisqan jina, Diosmi Egiptopi reyta* niran: “Atiyniyta qanpi rikuchinaypaqmi noqaqa mana wañuchiraykichu, chhaynapi pachantinpi sutiy willasqa kananpaq”, nispa. 18  Chhaynaqa, pitachus munan chaytan Diosqa khuyapayan, sonqonku rumiyachiyta munaqkunatan ichaqa jinallata qhawan sonqonkuq rumiyananta. 19  Yaqapaschá niwankichisman: “¿Imaraykutaq runakunatari juchachashallan? ¿Acaso pipas paypa munaynin contra sayayta atiranchu?”, nispa. 20  Yau runa, ¿pitaq qanri kanki Diosman kutipakunaykipaq? ¿T’urumanta ruwasqa kaqqa ninmanchu ruwaqninta: “¿Imanaqtinmi khaynata ruwawanki?”, nispa? 21  ¿Manachu t’urumanta imatapas ruwaqqa atiyniyoq kashan t’uruwan ima munasqantapas ruwananpaq? ¿Manachu munaspaqa kaq t’urullawan ruwanman juj munay p’uyñuta otaq común p’uyñutapas? 22  Chhaynallataqmi Dioswanpas; payqa munanña millay runakunaman sinchi phiñakuyninta atiynintawan rikuchiyta chaypas, anchatan pacienciakun ñut’unapaq jina phiñachiqnin runakunapaq. 23  Chaytaqa ruwan khuyapayanapaq jina runakunaman ancha qhapaq atiyninta rikuchinanpaqmi, paykunan chaskinqaku ñaupaqmantaña preparasqan premiota. 24  Chay runakunaqa noqanchismi kanchis, payqa manan judiokunallatachu wajawanchis, aswanpas waj nacionkunamanta runakunatawanmi. Chhaynatataq pay ruwayta munan chayqa, ¿pitaq ima ninmanpas? 25  Chayraykun Oseas libropipas niran: “Waj llaqtatan ‘llaqtaymi’ nisaq, mana munasqay warmitan ‘munasqaymi’ nisaq; 26  maypichus ‘qankunaqa manan llaqtaychu kankichis’ nispa nisqaypin ‘kausaq Diospa wawankuna’ nisqa kankichis”, nispa. 27  Profeta Isaiaspas Israel runakunamantaqa niranmi: “Lamar-qochapi aqo jinaña Israelpa wawankuna kanku chaypas, puchuqkunallan salvasqaqa kanqaku. 28  Jehová Diosqa jujpaqkaman usqhaylla kay pachapi kaqkunamanta cuentata mañanqa”, nispa. 29  Profeta Isaiasqa nillarantaqmi: “Hanaq pacha ejercitokunata kamachiq Jehová Dioschus mirayninchista mana puchuchinmanchu karan chayqa, Sodoma llaqta Gomorra llaqta jinachá kasunman karan”, nispa. 30  Chhaynaqa, kayta yachaychis: Waj nacionkunamanta runakuna manaña chanin ñanta maskharankuchu chaypas, iñisqankuraykun paykunaqa chaninpaq jap’isqa kanku. 31  Israel runakunan ichaqa, kamachikuy simiq nisqanman jinaña chanin kayta maskharanku chaypas, mana atirankuchu chay kamachikuyman jina ruwayta. 32  ¿Imaraykun mana atirankuchu? Paykunaqa manan iñiywanchu chanin kayta maskharanku, aswanpas imapas ruwasqallankuwan chanin kanankupaqmi piensaranku, chayraykun mana atirankuchu. Chaymi paykunaqa “urmachiq rumi” jawa urmaranku; 33  Diospa simin qelqapas ninmi: “¡Uyariychis! Sionpin churasaq urmachiq rumita, jark’aq qaqatawan, pipas chaypi iñiqqa manan p’enqachisqachu kanqa”, nispa.

Uraypi willakuykuna

Griego rimaypiqa “Faraonta” ninmi. Chhaynatan niqku Egiptopi reykunata.