Romanos 8:1-39

  • Espirituwanmi kausaypas libre kaypas kan (1-11)

  • Diospa espiritun imatachus sut’ita rikuchisqanmanta (12-17)

  • Llapa kamasqakuna Diospa wawankuna jina libre kayta suyashanku (18-25)

  • Espíritu noqanchispaq mañakusqanmanta (26, 27)

  • Qallariymantapacha pikunatachus Diospa ajllasqanmanta (28-30)

  • Diospa munakuyninwan tukuy imatapas vencenamanta (31-39)

8  Chhaynaqa, Cristo Jesuswan jujllachasqa kaqkunaqa manan juchachasqachu kanku.  Santo espirituq kamachikuyninmi Cristowan jujllachasqa kaqkunaman kausayta qon, chay kamachikuymi librarasunkichis juchaq kamachikuyninmanta, jinallataq wañuypa kamachikuyninmantawan.  Runakunaqa juchasapa kasqankuraykun kamachikuy simitaqa mana llapantachu junt’ayta atiranku, chaymi chay kamachikuyqa mana salvayta atiranchu, Diosmi ichaqa kamachikuy simiq mana ruway atisqanta ruwaran; payqa juchayoq runaman rijch’akuqta Churinta kachamuspan juchata chinkachiran, chhaynapin runapi kaq juchata juchacharan.  Chayqa karan kamachikuy simipi kaq chanin kamachikuykunata junt’ananchispaqmi, chay kamachikuytaqa espirituq munasqanman jina purispan junt’anchis, manan aychanchispa munasqanman jina purispachu.  Pipas aychaq munasqanman jina kausaqqa aychaq munaynillanmanmi yuyayninta churan, espirituq munayninman jina kausaqmi ichaqa espirituq munayninman yuyayninta churan.  Aychaq munayninman yuyayta churayqa wañuymanmi apan, espirituq munayninman yuyayta churaymi ichaqa kausayman thaj kayman ima apan;  aychaq munayninman yuyayta churaqkunaqa Diospa enemigonmi kapunku, paykunaqa manan Diospa kamachikuyninta kasukunkuchu, ni kasukuytapas atinkumanchu.  Chhaynaqa aychaq munayninman jina puriqkunaqa manan Diospa sonqonpaq jinachu kankuman.  Diospa espiritunchus qankunapi kashan chayqa, manan aychaq munayninman jinachu purinkichis, aswanpas espirituq munayninman jinan. Chaymantapas mayqenpichus mana Cristoq espiritun kan chayqa, manan Cristoqchu. 10  Ichaqa Cristochus qankunawan jujllachasqa kashan chayqa, aycha cuerpoykichisña jucharayku wañusqa kashan chaypas, santo espiritun kausayta qosunkichis Diospa ñaupanpi chanin kasqaykichisrayku. 11  Chayrayku, wañusqakuna ukhumanta Jesucristota kausarichimuqpa espiritunchus qankunapi kashan chayqa, chay espirituwanmi payqa wañuq cuerpoykichistapas kausarichimunqa. 12  Chhaynaqa, wayqe-panaykuna, manan aychanchistaqa kasunanchischu, chhaynapi ama munayninman jina kausananchispaq. 13  Aychaq munayninman jinachus kausankichis chayqa, wañunkichismi; ichaqa espirituq yanapayninwanchus cuerpoq ruwayninkunata wañuchinkichis chayqa, kausankichismi. 14  Diospa espiritunwan llapa pusachikuqkunaqa Diospa wawankunan kanku. 15  Qankunaqa manan kamachi kanaykichispaqchu espiritutaqa chaskirankichis, nitaq wajmanta manchasqa kanaykichispaqpaschu, aswanpas Diospa wawankuna jina adoptasqa kanaykichispaqmi, chay espiritun kallpachawanchis: “¡Abba,* papáy!”, nispa wajakunanchispaq. 16  Diospa espiritunmi sonqonchispi* sut’ita rikuchin Diospa wawankuna kasqanchista. 17  Wawankunachus kanchis chayqa, herenciatapas chaskillasuntaqmi, arí, Cristoq chaskisqan herenciatan noqanchispas chaskillasuntaq. Cristo jinachus ñak’arisun chayqa, pay jinan jatunchasqa kallasuntaq. 18  Chhaynaqa, kunan tiempopi ñak’arisqanchisqa manan imapaschu kanqa jamuq tiempopi Diospa rikuchinan jatun premionchiswan tupanachisqaqa. 19  Llapa kamasqakunan makillaña suyashanku Diospa wawankuna lliflli kaywan rijurimunankuta. 20  Kamasqakunaqa yanqa kausaymanmi jap’ichisqa karanku, ichaqa manan paykunaq munayninpichu, aswanpas chay jap’ichiqninpa munayninpin, chaywanpas jap’ichiqninqa qoranmi juj suyakuyta; 21  arí, kamasqakunaqa ismusqa kayman watasqa kasqankumantan kacharichisqa kanqaku, jinaspa Diospa wawankuna jina libre kapunqaku. 22  Yachasqanchis jina, kamasqakunaqa llapankun juj nisqalla khuyayta waqashanku, kunankamataqmi nanaypi kashanku. 23  Manan paykunallachu waqashanku, santo espirituta chaskiqkunapas waqashanchismi, chay espirituqa herencianchismanta ñaupaq kaq parten, arí, Diospa wawankuna jina adoptasqa kananchista suyakushananchiskaman khuyayta sonqonchispi waqashanchis; Diosqa adoptawasun aycha cuerponchismanta kacharichisqa kananchispaq preciota Cristo pagasqanraykun. 24  Noqanchisqa chay suyakuy yuyaywanmi salvasqa karanchis; ichaqa ima suyakusqanchistapas chaskisunmanña chayqa, manañan suyakuychu kanman; pipas suyakusqanta chaskispaqa manañan suyakunmanchu ¿riki? 25  Ichaqa manaraqtaq suyakusqanchista chaskinchischu chayqa, pacienciawanmi suyakushanallanchis. 26  Jinaspapas espirituqa yanapawasunmi kallpanchis pisiyaqtin; mayninpiqa yaqapaschá imamantapas mañakuyta munashaspa mana ima niytapas atisunchu, chay ratokunapin espirituqa sonqonchispi khuyayta waqasqanchista mana imayna willakuyta atiqtinchis noqanchispaq mañapuwasun. 27  Sonqota t’aqwiq Diosqa yachanmi imatachus espíritu ch’uya runakunapaq mañakushan chayta, espirituq mañakusqan Diospa munayninman jina kasqanrayku. 28  Yachasqanchis jina, Diosqa munakuqninkuna allin kananku yuyaywanmi tukuy imatapas ruwan, paykunaqa munayninman jina wajasqakunan kanku; 29  Diosqa qallariymantapachan yacharan pikunatachus ajllanan karan chayta, paykunatan ajllaran Churinman rijch’akuq kanankupaq, chhaynapi chay Churi wayqenkuna ukhupi phiwi* kananpaq. 30  Chay ajllasqankunatan payqa wajaran, wajasqankunatataq chaninpaq qhawariran, chaninpaq qhawarisqankunatataq jatuncharan. 31  Chhaynaqa, ¿ima nisuntaq chaykunamanta? Noqanchiswantaq Dios kashan chayqa, ¿pitaq contranchispiri kanman? 32  Payqa manan Churintapas jark’aranchu ñak’arinanmanta, aswanmi llapanchisrayku wañunanpaq entregaran, ¿chaychu wakin cosaskunatapas Churinwan kuska ancha kusikuywan mana qowasunman? 33  ¿Pitaq Diospa ajllasqankuna contrari rimanman? Diosqa chaninpaqmi paykunata qhawarin. 34  ¿Pitaq paykunatari juchachanman? Manan pipas. Cristo Jesusmi paykunarayku wañuran, jinaspa kausarichisqa karan; payqa Diospa paña ladonpin kashan, chaypin Diosmanta rogapuwashanchis. 35  ¿Imataq Cristoq munakuyninmantari t’aqawasunman? ¿Ñak’ariy? ¿Sinchi llakikuy? ¿Qatikachasqa kay? ¿Yarqay? ¿Mana p’achayoq kay? ¿Wañuy patapi tarikuy? ¿Espadawan amenazasqa kay? Manan imapas t’aqawasunmanchu ¿riki? 36  Qelqasqan kashan: “Qanraykun tukuy tiempo wañuy patapi tarikuyku, nak’anapaq ovejakuna jinan rikusqa kayku”, nisqa. 37  Ichaqa munakuwaqninchispa yanapayninwanmi tukuy chaykunata atipashanchis. 38  Noqaqa allintapunin yachani: Manan ni wañuypas, ni kausaypas, ni angelkunapas, ni autoridadkunapas, ni kay tiempopi ima kaqpas, ni jamuq tiempopi ima kaqpas, ni atiykunapas, 39  ni altopi kaqpas, ni ukhupi kaqpas, ni ima kamasqapas Señorninchis Cristo Jesuspi Diospa munakuyninmantaqa t’aqawasunchu.

Uraypi willakuykuna

“Abba” nisqa simiqa arameo rimaymantan jamun, chayqa “papáy” ninantan nin. Chhaynatan wawakuna munakuywan respetowan papankuta niqku.
Griego rimaypiqa “espiritunchiswan” ninmi.
Phiwi wawataqa “kuraq wawa” otaq “primer wawa” nillankutaqmi.