Romanos 6:1-23

  • Cristopi bautizasqa kaqkuna mosoq kausayta chaskinankumanta (1-11)

  • Amaña juchawan dominachikunamanta (12-14)

  • Juchaq kamachinmanta Diospa kamachinman tukupusqankumanta (15-23)

    • Juchaq pagayninqa wañuymi, Diospa qokuynintaq kausay (23)

6  Chhaynaqa, ¿ima nisuntaq? ¿Juchallapichu purishasun, chhaynapi Dios ancha sumaq sonqo kayninta astawan rikuchiwananchispaq?  ¡Manapunin! Juchapaqqa ñataq wañupunchisña chayqa, ¿imaynapitaq juchallapiri kausashasunman?  ¿Manachu yachankichis Cristo Jesuspi llapa bautizasqa kaqkunaqa wañuyninpi bautizasqa kasqanchista?  Chhaynaqa wañuyninpi bautizasqa kasqanchiswanmi paywan kuska p’ampasqa kapunchis, chhaynapi imaynan Cristopas Yayaq qhapaq atiyninwan kausarichisqa karan, chhaynata noqanchispas mosoq kausaypi purinanchispaq.  Paypa imaynachus wañusqanta jinataq wañupunchis chayqa, paypa imaynachus kausarimpusqanta jinallataqmi kausarimpusunchispas; chhaynapin paywanqa jujllachasqa kashanchis.  Yachasqanchis jina, ñaupa kausayninchisqa paywan kuskan k’aspipi clavasqa karan, chhaynapi juchallikuq cuerponchis mana atiyniyoq kananpaq, manaña juchaq kamachin kananchispaqwan.  Wañuqqa wañusqanwanmi llapa juchankunamanta pagapun.*  Jinaspapas Cristowan kuskataq wañupunchis chayqa, paywan kuskallataqmi kausasunchispas.  Cristoqa ñataq kausarimpunña chayqa, manañan payqa jayk’aqpas wañunqachu; arí, wañuyqa manapuniñan paytaqa munaychakunqañachu. 10  Payqa juj kutillatan wañuran, chhaynapi juchata chinkachinanpaq; kunantaq ichaqa Diospa munayninta ruwananpaq kausashan. 11  Chhaynallataq qankunapas wañusqa jina qhawarikuychis jucha ruwaykunapaq, ichaqa Diospa munayninta ruwanaykichispaq kausaychis Cristo Jesuspa discipulon kasqaykichisrayku. 12  Chayrayku, amaña dejaychischu wañuq cuerpoykichispi jucha rey jina kamachikunanta, chhaynapi cuerpoykichispa imachus munasqanta ama ruwanaykichispaq. 13  Cuerpoykichistapas amaña mana chanin armakunata jina juchaman jaywaychischu, aswanpas Diosman entregakuychis wañusqakuna ukhumanta kausarimpuqkuna jina, cuerpoykichistapas payman jaywaychis chanin kaq armakunata jina. 14  Qankunaqa manan kamachikuy simipichu kashankichis, aswanpas Diospa ancha sumaq sonqo kayninpin kashankichis, chaymi juchaqa mana qankunata dueñochakunanchu. 15  Chhaynaqa, manataq kamachikuy simipichu kashanchis, aswanpas Diospa ancha sumaq sonqo kayninpitaq kashanchis chayqa, ¿juchallapichu purishasun? ¡Manapunin! 16  ¿Manachu yachankichis pitapas kamachi jina kasukuspaykichisqa paypa kamachin kasqaykichista? Chhaynaqa, juchaq kamachinchus kankichis chayqa, wañunkichismi; ichaqa Diospa kamachinchus kankichis, kasukunkichistaqchus payta chayqa, chaninmi kankichis. 17  Ñaupaqpiqa juchaq kamachinmi qankunaqa karankichis, kunanmi ichaqa tukuy sonqo kasukushankichis ima yachachikuymanchus entregasqa karankichis chayta, chayrayku Diosman gracias kachun. 18  Arí, qankunaqa juchamanta kacharichisqan karankichis, chaymi kunanqa chanin kaypa kamachinkunaña kapunkichis. 19  Jucha jawa pisi kallpa kasqaykichisraykun noqaqa entiendenapaq jinalla rimashani: Imaynan cuerpoykichisqa millakunapaq kaqkunaq, mana allin ruwaykunaq kamachin karan millay ruwaykunata ruwanaykichispaq, chhaynallataq kunanpas cuerpoykichisqa chanin ruwaykunaq kamachin kachun ch’uya ruwaykunata ruwanaykichispaq. 20  Juchaq kamachin kashaspaykichisqa libren kasharankichis chanin kaymanta. 21  Chay tiempopiqa, ¿imatataq ruruq kankichis? Kunan p’enqakusqaykichis ruwaykunatan ¿riki? Chay ruwaykunaqa wañuyman apaq ruwaykunan. 22  Kunanmi ichaqa juchamanta kacharichisqa kaspa Diospa kamachinña kapunkichis, chaymi ch’uya kausayta rurushankichis, chaytaq wiñay kausayman apasunkichis. 23  Juchaq pagayninqa wañuymi, Diospa qokuyninmi ichaqa wiñay kausay, chay qokuyqa Señorninchis Cristo Jesusraykun.

Uraypi willakuykuna

Chaypiqa “kacharichisqa kapun” otaq “perdonasqa kapun” nillanmantaqmi.