Romanos 15:1-33

  • Cristo jinan jujkuna-jujkunawan sumaqta chaskinakunanchis (1-13)

  • Pabloqa waj nacionkunata servinanpaq churasqa kasqanmanta (14-21)

  • Pabloq viajananmanta (22-33)

15  Chhaynaqa noqanchis iñiypi allin kallpayoq kaqkunan iñiypi pisi kallpayoqkunata yanapananchis, manataq noqanchispa allinnillanchistachu maskhananchis.  Aswanmi sapankanchis runamasinchispa allinninpaq kaqkunata, paykunata kallpachaq kaqkunatawan ruwananchis.  Cristopas manan kikinpa allinnillantachu maskharan, aswanpas Diospa simin qelqapi nisqanman jinan ruwaran, chaypin nin: “K’amisuqniykikunaq k’amiyninmi noqaman chayamuwan”, nispa.  Ñaupaqpi qelqasqa kaqkunaqa yachachiwananchispaqmi qelqasqa karan; chaymantapas Diospa simin qelqan kallpachawanchis, aguantananchispaqpas yanapawanchis, chaymi suyakuyniyoqpas kanchis.  Kallpachawaqninchis, aguantananchispaqpas yanapawaqninchis Diosmantan mañakuni Cristoq yuyaynin yuyayniyoq kanaykichispaq.  Chhaynapi juj nisqalla juj kunkalla Señorninchis Jesucristoq Yayan Diosta jatunchanaykichispaq.  Chhaynaqa, imaynan Jesucristoqa sumaqta chaskiwaranchis chhaynata qankunapas jujkuna-jujkunawan sumaqta chaskinakuychis, chhaynapi Dios jatunchasqa kananpaq.  Cristoqa qhari kayninku qaracha kuchusqa kaqkunaq serviqninmanmi tukupuran, chaytan ruwaran Diosqa cheqaq rimaqpuni kasqanta rikuchinanpaq, ñaupa taytankuman prometesqankunapas cheqaqpuni kasqanta rikuchinanpaqwan,  jinallataq nacionkunapas Diosta khuyapayakuq kasqanmanta jatunchanankupaqwan. Diospa simin qelqapas ninmi: “Chayraykun nacionkuna ukhupi adorasayki, sutiykita jatunchaspan takisaqpas”, nispa. 10  Chaymantapas ninmi: “Nacionkuna, llaqtanwan kusikuychis”, nispa. 11  Nillantaqmi: “Llapa nacionkuna Jehová Diosta jatunchaychis, llapa llaqtakunapas payta jatunchachunku”, nispa. 12  Isaiaspas ninmi: “Jesepa mirayninmantan* juj runa rijurimunqa, paymi askha nacionkunata kamachinqa, paypin nacionkuna suyakunqaku”, nispa. 13  Suyakuyta qoq Diosmantan mañakuni paypi confiasqaykichisrayku ancha kusikuywan thaj kaywan ima junt’aykunasuykichispaq, chhaynapi santo espirituq atiyninwan suyakuyniykichispi aswan kallpachasqa kanaykichispaq. 14  Wayqe-panaykuna, noqaqa allintan yachani qankuna allin kaywan tukuy yachaywan ima junt’a kasqaykichista, yuyaychanakuy yachasqaykichistapas. 15  Ichaqa sut’itan wakin asuntokunamanta qelqamushaykichis chaykunata yuyarichinaypaq. Chaykunataqa yuyarichimushaykichis Dios ancha sumaq sonqowan qhawariwasqanraykun. 16  Payqa chhaynata qhawariwan Cristo Jesuspa serviqnin kaspa allin willakuykunata lliu nacionkunaman willanaypaqmi, chay ruwayqa ch’uya ruwaymi. Chaytaqa ruwashani chay nacionkunamanta runakuna santo espirituwan ch’uyanchasqa kaspa sumaq ofrenda jina Diosman jaywasqa kanankupaqmi. 17  Chhaynaqa, Cristo Jesuspa discipulon kasqayrayku, Diospa qowasqan llank’anata ruwasqayrayku iman kusisqa kashani. 18  Chaymi noqa kikiypa ruwasqaymantaqa mana rimasaqchu, aswanpas imakunatachus Cristo noqawan ruwaran waj nacionkuna kasukuq kanankupaq chaykunallamantan rimasaq. Chaytan payqa ruwaran imachus rimasqaywan, ruwasqaywan, 19  señalkunawan, milagrokunawan, Diospa espiritunpa atiyninwan ima; chaymi Jerusalén llaqtamanta qallarispa Ilírico provinciakama Cristomanta allin willakuykunata lliuman willarani. 20  Noqaqa tukuy atisqaytan ruwarani maypichus Cristoq sutinmanta ña uyarinkuña chaykunapi amaña allin willakuykunata willanaypaq, chhaynapi mana jujpa cimiento churasqanman perqanaypaq. 21  Chaytaqa ruwarani Diospa simin qelqaq nisqanman jinan, chaypin nin: “Paymanta mana jayk’aq willasqa kaqkunan payta reqsinqaku, paymanta mana jayk’aq uyariqkunan entiendenqaku”, nispa. 22  Chayraykun askha kutiña qankunaman jamuyta munasharani chaypas, mana atimusharanichu. 23  Kunanmi ichaqa ña tukuniña kay ladokunapi predicayta, chaymantapas qayna watakunamantañan qankunawan tupayta munashani; 24  chaymi España llaqtaman riq jina qankunata watukamuyta munashani, qankunawan juj tiempo sumaqta pasaruqtiytaq maychus rinayman juj chikanta riysiwanaykichista. 25  Kunanmi ichaqa Jerusalentaraq risaq chaypi iñiqmasikunata* atiendemunaypaq. 26  Macedonia provinciapi Acaya provinciapi ima iñiqmasikunan kusikuywan juj yanapayta apachiwashanku Jerusalenpi kaq wajcha iñiqmasikunapaq. 27  Kusisqaña chayta ruwashanku chaypas, ruwanankutan paykunaqa ruwashanku chay iñiqmasikunamanta manu kasqankurayku. Paykunaqa Jerusalenpi iñiqkunaraykun Diosmanta imaymanata chaskiranku, chaymi kaqninkuwan paykunata yanapanankupuni. 28  Chay apachiwasqankuta paykunaman chayachispaymi Españata risaq, chayman riq jinataq qankunatapas waturikamusaykichis. 29  Qankunamanqa Cristomanta jamuq imaymana allinkuna apariykusqan chayamusaq. 30  Wayqe-panaykuna, Señor Jesucristorayku, espiritumanta jamuq munakuyrayku iman valekuykichis tukuy sonqoykichiswan Diosmanta mañapuwanaykichispaq, imaynan noqapas mañakushani jinata; 31  chhaynapi Judeapi kaq mana iñiqkunamanta librasqa kanaypaq, Jerusalenpi kaq iñiqkunapas yanapay apasqayta sumaqta chaskinankupaqwan; 32  chhaynapitaq Diospa munayninpi qankunaman kusisqa jamuspay qankunawan kuska kallpachasqa kanaypaq. 33  Thaj kayta qoq Dios llapaykichiswan kachun. Amén.

Uraypi willakuykuna

Griego rimaypiqa “Jesepa saphinmantan” ninmi.
Griego rimaypiqa “ch’uyakunata” otaq “santokunata” ninmi.