Romanos 14:1-23

  • Ama juchachanakunamanta (1-12)

  • Jujkunaman ama ima urmachinatapas churanamanta (13-18)

  • Jujkunawan sumaqta kausanapaq kallpachakunamanta (19-23)

14  Sumaqta chaskiychis iñiyninpi pisi kallpayoq runata. Ichaqa aman juchachankichischu imatapas imaynatachus qhawarisqanmantaqa.  Wakinqa iñiyninku imaynachus kasqanman jinan mijullanku tukuy imatapas, wakinmi ichaqa iñiyninkupi pisi kallpa kasqankurayku q’omerkunallata mijunku.  Pipas mijuqqa ama pisichachunchu mana mijuqtaqa, mana mijuqpas ama juchachachunchu mijuqtaqa. Diosqa paytapas sumaqtan chaskin.  ¿Pitaq qanri kanki jujpa kamachinta juzganaykipaq? Patronninpaqchá allinpas mana allinpas kakun. Chaymantapas Jehová Diostaq yanapashan chayqa, atinmanmi paypa ñaupanpi allin kayta.  Wakinqa yaqapaschá juj p’unchayta aswan allinpaq qhawarinkuman, wakintaq mayqen p’unchaytapas igual-llata qhawarinkuman. Chayrayku ama pipas iskayachunchu imachus ruway munasqanmantaqa.  Pipas mayqen p’unchaytapas waqaychaqqa Jehová Diospaqmi waqaychan. Mijuqpas Jehová Diospaqmi mijun, chaymi payman graciasta qon; mana mijuqpas Jehová Diospaqmi mana mijunchu, chaywanpas payqa agradecekunmi Diostaqa.  Manan mayqenninchispas noqallanchispaqchu kausanchis, wañuspapas manan noqallanchispaqchu wañunchis.  Noqanchisqa kausanchisña chaypas, Jehová Diospaqmi kausanchis; wañunchisña chaypas, Jehová Diospaqmi wañunchis. Chhaynaqa kausashaspapas wañupuspapas Jehová Diospan kanchis.  Wañusqakunaq kausaqkunaqpas Señornin kananpaqmi Cristoqa wañuranpas kausarimpuranpas. 10  ¿Imaraykutaq qanri wayqeykita juzganki? ¿Imaraykutaq pisichankipas? Llapanchismi Diospa juzganan ñaupapi sayananchis kanqa. 11  Qelqasqan kashan: “Jehová Diosmi nin: ‘Cheqaqtapunin nini, llapa runakunan ñaupaypi qonqorikunqaku, llapankun yachanqaku noqa Dios kasqayta’”, nispa. 12  Chhaynaqa, sapankanchismi kikinchismanta Diosman cuentata qosunchis. 13  Chayrayku amaña noqanchispura juzganakusunchu, aswanpas tukuy atisqanchista ruwasun amapuni mayqen iñiqmasinchispa ñaupanpipas ima urmachinatapas ni ima jark’anatapas churananchispaq. 14  Señor Jesuspa discipulon kasqayraykun mana iskayaspa allinta yachani tukuy imapas mana kikillanmantaqa qhellichu kasqanta, aswanpas pipas imatapas qhellipaq qhawarillaqpaqmi imapas qhelliqa. 15  Imapas mijusqayki jawachus iñiqmasiyki sintisqa kashan chayqa, manañan munakuypichu purishawaq. Chayrayku, ama ima mijusqaykiwanpas iñiqmasiykiq iñiynintaqa ñut’uychu, payraykun Cristoqa wañuran. 16  Ama allinpaq qhawarisqaykichiskunata ruwaychischu, chaykuna jawachus jujkuna mana allinta qankunamanta rimankuman chayqa. 17  Diospa gobiernonman jaykuyqa manan mijunamantachu ni ujanamantachu kanqa, aswanpas santo espirituq yanapayninwan chanin kanamanta, jujkunawan sumaqta kausanamanta, kusisqa kausanamanta iman kanqa. 18  Pipas chaykunata ruwaspa kamachi jina Cristota serviqqa Diospa sonqonpaq jinan, chhayna runataqa lliupas sumaqtan qhawarinku. 19  Chayrayku, tukuy atisqanchista ruwasun jujkunawan sumaqta kausananchispaq, kallpachanakunanchispaq ima. 20  Amaña Diospa ruwasqantaqa mijusqaykiwan thuniychu. Tukuy imapas limpioña chaypas, sinchi mana allinmi kanman pipas mijusqanwan jujkunata urmachinman chayqa. 21  Chayrayku, amaña aswan aychatapas mijuychu, ni vinotapas ujaychu, ni imatapas ruwaychu chaywanchus iñiqmasiyki urmanman chayqa. 22  Imaynachus iñiyniyki kasqanqa qanllapaq kachun Diospa ñaupanpi. Kusisqa kachun imapas ruwasqanmanta mana juchachakuq runaqa. 23  Ichaqa sichus iskayaspa mijun chayqa, juchachasqañan kashan mana iñiyninman jinachu mijusqanrayku. Chhaynaqa, pipas mana iñiyman jinachu imatapas ruwan chayqa juchatan ruwan.

Uraypi willakuykuna