Romanos 13:1-14

  • Autoridadkunata kasukunamanta (1-7)

    • Impuesto paganamanta (6, 7)

  • Munakuqqa kamachikuy simitan junt’an (8-10)

  • P’unchaypi jina purinamanta (11-14)

13  Autoridadkunaq atiyninqa Diosmantan jamun, chaymi autoridadkunataqa lliu runa* kasukunan, Diosmi paykunataqa churan maypichus sapankapas kashanku chayman.  Chhaynaqa, pipas autoridadkunaq contranpi sayarin chayqa, Diospa churasqan contran sayarishan; Diospa churasqan contrapi sayariqkunaqa juzgasqan kanqaku.  Kamachikuqkunaqa manan allin kaqta ruwaqkunaq manchakunanpaqchu kanku, aswanpas mana allin kaqta ruwaqkunaq manchakunanpaqmi. Chayrayku, paykunata mana manchakuspa kausayta munanki chayqa, allin kaqta ruway, chayta ruwaqtiykin paykunaqa allinta qanmanta rimanqaku.  Paykunaqa qanpa allinniykipaqmi Diospa kamachinta ruwashanku. Mana allinta ruwashanki chayqa manchakushanaykin, manan yanqachu espadataqa jap’ishanku. Paykunaqa Dios serviqkunan kanku, mana allin ruwaqkunata castiganankupaqtaqmi churasqapas kashanku.  Chayraykun paykunataqa kasukunaykichispuni, ichaqa manan castigota manchakuspallachu kasukunaykichis, aswanpas concienciaykichisrayku iman.  Chaymi impuestotapas pagankichis; paykunaqa tukuy tiempon lliu runata servishanku, chhaynapin Diosta serviqkuna kanku.  Lliuman qoychis imachus qonaykichis kaqta: impuesto mañakuqman impuestota, pagota mañakuqman pagota, jinallataq manchakunata munaqtapas manchakuychis, respetanata munaqtapas respetaychis.  Aman pimanpas manuqa kankichischu, aswanpas jujkunaman munakuyniykichista rikuchiylla manuykichisqa kachun; runamasinta munakuqqa ñan junt’anña kamachikuy simita.  Chay kamachikuypin nin: “Aman jujwan pantankichu, aman pitapas wañuchinkichu, aman suwakunkichu, aman jujpa kaqninta munapayankichu”, nispa. Chay kamachikuykuna, wakin kamachikuykunapas jujllamanmi juñukun: “Runamasiykitan munakunki qan kikiykita jina”, nisqa kamachikuyman. 10  Pipas munakuqqa manan ima mana allintapas runamasintaqa ruwanchu, munakuqqa allintan kamachikuy simita junt’ashan. 11  Chay nisqaykunatan ruwanallaykichistaq rijch’arinaykichis tiempoña kasqanrayku, kunanqa iñiqman tukupusqanchis tiempomantapas aswan cercapiñan kashan salvasqa kananchisqa. 12  Tutaqa ñan tukupushanña, ñataqmi p’unchayamunqaña kanpas, chayrayku tutayaqpi ruwaykunata ch’utikuspa wijch’upusun, Diosmanta jamuq armakunawantaq churakusun.* 13  P’unchaypi jina allintapuni purisun, ama millay fiestakunapichu ni machaypichu, ama qhelli ruwaypichu ni mana p’enqarikuspa jucha ruwaypichu, ama maqanakuypichu ni envidianakuspachu. 14  Aswanpas Señor Jesucristowan p’achawan jina churakuychis, amataq piensashaychischu aychaq munayninta ruwaykunapiqa.

Uraypi willakuykuna

Chaypiqa “lliu alma” nillanmantaqmi.
Griego rimaypiqa “k’anchaypa armankunawantaq churakusun” ninmi.