Romanos 12:1-21

  • Cuerpota kausashaq sacrificiota jina jaywanamanta (1, 2)

  • Imaymana ruwaykunaña kan chaypas juj cuerpolla kasqanmanta (3-8)

  • Cristianokuna imaynatachus kausanankumanta (9-21)

12  Chhaynaqa, wayqe-panaykuna, Dios khuyapayakuq kasqanraykun valekuykichis: Cuerpoykichista Diosman jaywaychis kausashaq sacrificiota jina, sonqonman chayaq ch’uya sacrificiota jina, chhaynapin tukuy yuyayniykichiswan Diosta servinkichis.  Amataq kay pacha runakuna jinachu kausaychis, aswanpas yuyayniykichista mosoqyachispa imayna kasqaykichista cambiaychis, chhaynapin allinta yachankichis Diospa munayninqa allinpuni, junt’asqapuni, sonqonpaq jinapuni kasqanta.  Ancha sumaq sonqowan Dios qhawariwasqanraykun llapaykichista niykichis: Ama sinchi allinpas kawaqchis jinaqa qhawarikuychischu, aswanpas sapankaykichis allin yuyayniyoq kaychis Diospa qosqasuykichis iñiyniykichisman jina.  Cuerpopiqa askha partekunan kan, manataqmi llapankuchu kaq ruwanallayoq kanku.  Chhaynan noqanchispas kanchis; askhaña kanchis chaypas, juj cuerpollan kanchis Cristowan jujllachasqa; sapankanchistaq jujkuna-jujkunawan jujllachasqa kashanchis.  Diosqa ancha sumaq sonqo kayninpin sapankanchisman atiyta qowanchis, ichaqa manan kaq atiytachu; chayrayku profetizanapaq atiyta chaskiqqa, profetizachun iñiy chaskisqanman jina;  jujkunata servinanpaq atiyta chaskiqpas, servishallachun; jinallataq yachachiqpas yachachishallachun,  jujkunata kallpachaqpas* kallpachashallachun,* rakiqpas ama mich’akuspa rakichun, umalliqpas allinta umallichun, khuyapayaqpas tukuy sonqo khuyapayachun.  Tukuy sonqowan munanakuychis.* Mana allin kaqta cheqnikuychis, allin kaqmantaq k’askakuychis. 10  Imaynan wayqe-panantin kaqkunapas anchata munanakunku, chhaynata qankunapas tukuy sonqo sumaqta munanakuychis. Listopuni kashaychis jujkunata sumaqta rikunaykichispaq. 11  Tukuy sonqowan llank’aychis amataq qellakachakuychischu. Santo espirituq yanapayninwan tukuy sonqollapuni llank’aychis. Kamachi jina Jehová Diosta serviychis. 12  Suyakuyniykichiswan kusikuychis. Ñak’ariykunapiña tarikuspapas aguantaychis. Diosmantapas mañakushallaychispuni. 13  Iñiqmasikunata* yanapaychis imankuchus faltasqanman jina. Kallpachakushallaychis jujkunata sumaqta chaskinaykichispaq. 14  Qatikachaqniykichiskunapaqpas Diosmanta mañapuychis sumaqta qhawarinanpaq, qankunapas paykunataqa sumaqta rikuychis amataq ñakaychischu. 15  Kusikuqkunawan kusikuychis; waqaqkunawanpas waqaychis. 16  Jujkunatapas qankunata jina qhawariychis, amataq jatunchakuychischu, aswanpas k’umuykukuq kaychis. Ama yachaysapamanqa tukuychischu. 17  Ama pimanpas mana allinmantaqa mana allinllawantaq kutichiychischu. Imatachus runakuna allinpaq qhawarinku chayta allinta reparaychis. 18  Tukuy atisqaykichista ruwaychis lliu runawan sumaqta kausanaykichispaq. 19  Munasqa wayqe-panaykuna, ama qankuna kikiykichisqa vengakuychischu, aswanpas Diosman chaytaqa saqeychis pay phiñakuyninta rikuchinanpaq. Simin qelqapipas ninmi: “‘Noqamanmi tupawan vengakuyqa, noqañan kutichipusaq’ ninmi Jehová Diosqa”, nispa. 20  Ichaqa “enemigoykichus yarqasqa kashan chayqa, mijuchiy; ch’akisqachus kashan chaypas, imallatapas qoy ujananpaq. Chayta ruwaspan sonqonta llamp’uyachinki, sansatapas umanpi montoshawaq jinata”. 21  Ama mana allin kaqwanqa atipachikuychu, aswanpas allin kaqwan mana allin kaqtaqa atipashallay.

Uraypi willakuykuna

Chaypiqa “yuyaychaqpas” nillanmantaqmi.
Chaypiqa “yuyaychashallachun” nillanmantaqmi.
Griego rimaypiqa “munakuyniykichisqa ama iskay uyachu kachun” ninmi.
Griego rimaypiqa “ch’uyakunata” otaq “santokunata” ninmi.