Romanos 1:1-32

  • Napaykuy (1-7)

  • Roma llaqtata Pabloq visitay munasqanmanta (8-15)

  • Chanin runa iñisqanrayku kausananmanta (16, 17)

  • Millay runakuna castigasqa kanankumanta (18-32)

    • Diospa imaynachus kasqanqa kamasqankunapin rikukun (20)

1  Cristo Jesuspa kamachin noqa Pablon qelqamushaykichis, noqan kani apóstol kanaypaq ajllasqa, Diospa allin willakuyninkunata willanaypaq t’aqasqa.  Chay allin willakuykunatan Diosqa ñaupaqmantaraq prometeran profetankunawan, chay willakuykunaqa ch’uya qelqakunapin kashan.  Churinmantan chay willakuykunaqa willashan, paymi runa jina Davidpa mirayninmanta naceran.  Santo espirituq atiyninwanmi chay Churiqa kausarichisqa karan, chhaynapitaq sut’ita rikukuran Diospa Churin kasqanta, paymi Señorninchis Jesucristo;  paymi ancha sumaq sonqowan qhawariwan,* apóstol kanaypaqpas ajllawaran, chhaynapi lliu nacionkunamanta runakuna iñinankupaq, kasukuq kanankupaq, sutintapas jatunchanankupaqwan.  Chay nacionkuna ukhumantan qankunapas wajasqa kankichis Jesucristoq discipulon kanaykichispaq.  Roma llaqtapi Diospa lliu munakusqankunamanmi qelqamushaykichis, qankunan ch’uya kanaykichispaq ajllasqa kankichis: Qankunawan kachun Yayanchis Diospa jinallataq Señor Jesucristoq ancha sumaq sonqo kaynin thaj kayninpas.  Ñaupaqtaqa Jesuspa sutinpin Diosniyta “gracias” nini qankunaq iñiyniykichismanta; jinantinpin iñiyniykichismantaqa allinta rimashanku.  Noqaqa tukuy sonqoywanmi Diosta servishani Churinmanta allin willakuykunata willaspay, payqa allintan yachan sapa mañakuspay qankunamanta rimasqayta, 10  anchatan rogakushani, Dios munaqtinqa qankunata watukuq jamunaypaq. 11  Maytapunin qankunawanqa tupayta munashani qankunata kallpachanaypaq, chhaynapi astawan Diosman jap’ipakunaykichispaq, iñiypi qaqata sayanaykichispaqwan. 12  Arí, noqaqa munayman noqanchispura kallpachanakunanchistan, chhaynapi iñiyniykichis noqata kallpachawananpaq, noqaq iñiyniytaq qankunata kallpachanasuykichispaq. 13  Wayqe-panaykuna, askha kutipin noqaqa qankunaman jamuyta munarani, waj nacionkunapi jina chaypipas lliuman yachachinaypaq, chhaynapi wakillanpas Jesuspa discipulon kanankupaq, ichaqa manan atimushanichu. 14  Noqaqa manun kani griego runakunamanpas waj llaqtayoqkunamanpas, yachayniyoqkunamanpas mana yuyayniyoqkunamanpas, 15  chaymi maytapuni munashani qankuna Roma llaqtapi tiyaqkunamanpas allin willakuykuna willayta. 16  Noqaqa manan p’enqakunichu chay allin willakuykuna willaytaqa, chay willakuykunawanmi Diosqa atiyninta rikuchin, chhaynapi lliu iñiqkuna salvasqa kanankupaq; ñaupaqtaqa judiokunamanmi willakushan, chaymantataq griegokunaman. 17  Iñiqkunaqa iñisqankuraykun Diospa chanin kayninta allin willakuykunapi rikunku, chaytaqmi iñiyninkuta astawan kallpachan. Qelqasqan kashanpas: “Chanin runaqa iñisqanraykun kausanqa”, nisqa. 18  Diosqa janaq pachamantan phiñakuyninta rikuchimushan payta mana manchakuq runakunaman, mana allinta ruwaq runakunamanwan. Paykunan mana allin kaqta ruwaspa runakunata jark’anku cheqaq kaqta mana yachanankupaq. 19  Diosqa imaymanatan paykunaman sut’ita rikuchin, chhaynapi payta reqsinankupaq. 20  Diostaqa manaña rikunchischu chaypas, paypa wiñay atiyninpas Diospuni kasqanpas kay pacha kamasqa kasqanmantapachan sut’ita rikukun, arí, imaynachus kasqanqa imachus kamasqankunapin sut’ita reparakun, chaymi mana pipas ninmanchu “manan yacharanichu” nispaqa. 21  Chhayna runakunaqa yacharankuña pay Dios kasqanta chaypas, manan jatuncharankuchu ni “gracias” nirankupaschu; aswanmi mana yuyayniyoq kapuranku, mana entiendeq sonqonkupas tutayapuranmi. 22  “Yachayniyoqmi kayku” nirankuña chaypas, mana yuyayniyoqmi karanku. 23  Chaymi wiñay-wiñaypaq kausaq* qhapaq atiyniyoq Diosta adoranankumantaqa runaq rijch’ayninta* adoraranku; adorallarankutaqmi alton phawaq animalkunaq rijch’ayninta, tawa chakiyoq animalkunaq rijch’ayninta, pampan suchuq animalkunaq rijch’aynintapas. 24  Chayraykun Diosqa sonqonkuq munasqanman jina millakunapaq ruwaykunaman saqerpariran, chhaynapi paykuna kikinku cuerponkuta p’enqayman churanankupaq. 25  Diosmanta cheqaq yachachikuypi creenankumantaqa pantasqa yachachikuypin creeranku, kamaqta adoranankumantapas kamasqakunatan adoraranku serviranku ima, ichaqa kamaqllan wiñaypaq jatunchasqaqa kanan. Amén. 26  Chayraykun Diosqa paykunata saqerpariran cuerponkuq sinchi munapayasqan qhelli ruwaykunaman. Chhaynapin warmikunapas mana ruwanata ruwaspanku manaña qhariwan puñuyta munarankuchu, aswanmi warmipurallaña puñuranku; 27  qharikunapas mana ruwanata ruwaspankun manaña warmikunawan puñuyta munarankuchu, aswanmi aychankuq munayninpi raurarispanku qharipura millay qhellikunata ruwaranku; chhaynata pantasqankuraykun paykunaqa castigasqa karanku. 28  Paykunaqa manan Diosta kasukuytapas ni paypi piensaytapas munarankuchu, chaymi Diosqa qhelli yuyayniyoq kayman paykunata saqerpariran, chhaynapi mana ruwanakunata ruwanankupaq. 29  Paykunaqa tukuy mana chanin kaywan, tukuy millay ruwaywan, tukuy sinchi munapayaywan, tukuy mana allin kaywan iman junt’a kasharanku. Chaymantapas envidiakuywan, wañuchiywan, churanakuywan, engañaywan, jujkunaq ñak’arinanta munaywan iman junt’a kasharanku. Jinaspapas paykunaqa cuento q’epikuna, 30  yanqamanta tumpaqkuna, Diosta cheqnikuqkuna, mana respetoyoqkuna, uma oqariqkuna, alabakuqkuna, mana allin kaqta paqarichiqkuna, tayta-mamankuta mana kasukuqkuna, 31  mana entiendeqkuna, rimasqankuta mana junt’aqkuna, runamasinkuta mana munakuqkuna, mana khuyapayakuqkuna iman karanku. 32  Kunanpas chhayna runakunaqa allintan yachanku Diospa chanin kamachikuyninman jinaqa, chaykunata ruwaqkunaqa wañunanku kasqanta, chaywanpas paykunaqa ruwashallankun chaykunata, chhayna ruwasqankutapas “allinmi” ninkuraqtaqmi.

Uraypi willakuykuna

Griego rimaypiqa “ancha sumaq sonqowan qhawariwanku” ninmi.
Griego rimaypiqa “mana ismuq” ninmi.
Griego rimaypiqa “ismuq runaq rijch’ayninta” ninmi.