Mateo 9:1-38

  • Mana kuyuriy atiq runata Jesuspa qhaliyachisqanmanta (1-8)

  • Mateota wajasqanmanta (9-13)

  • Ayunomanta Jesusta tapunku (14-17)

  • Jairoq ususinmanta, juj warmi Jesuspa p’achanta llamiykusqanmantawan (18-26)

  • Ñausakunata upakunatawan Jesuspa qhaliyachisqanmanta (27-34)

  • Askha cosechana kasqanmanta, llank’aqkunataq pisilla kasqanmantawan (35-38)

9  Chaymi Jesusqa boteman seqaspa juj ladoman chimparan, jinaspa tiyasqan llaqtaman jaykuran.  Chayllamanmi mana kuyuriy atiq runata camillapi apamuranku. Chaymi Jesusqa iñiyniyoq kasqankuta rikuspa chay mana kuyuriq runata niran: “Wawalláy, kallpachakuy, juchaykikunan perdonasqa kapun”, nispa.  Jinan kamachikuy simita yachachiqkunamanta wakinqa ninakuranku: “Kay runaqa Diostamá k’amishan”, nispa.  Jesustaq imachus piensasqankuta yachaspa niran: “¿Imaraykun sonqoykichispi mana allin kaqkunata piensashankichis?  ¿Mayqentaq aswan fácil kanman: ‘Juchaykikunan perdonasqa kapun’, niychu, icha: ‘Jatarispa puririy’, niychu?  Yachanallaykichispaqpas, runaq Churinqa atiyniyoqmi kay pachapi juchakunata perdonananpaq”, nispa. Chaymantan chay mana kuyuriy atiq runata niran: “Sayariy, camillaykita oqarispa wasiykiman ripuy”, nispa.  Jinan payqa sayarispa wasinman ripuran.  Chayta rikuspan runakunaqa mancharikuranku, jinaspa Diosta jatuncharanku runakunaman chhayna atiy qosqanmanta.  Chaymanta rishaspataq Jesusqa rikuran Mateo sutiyoq runata, impuesto cobranapi tiyashaqta, jinaspa niran: “Qatikamuway”,* nispa. Jinan Mateoqa sayarispa qatikuran. 10  Chaymantataq Mateoq wasinpi mijushaqtin askha jamuranku impuesto cobraqkuna juchasapa runakuna ima, jinaspa Jesuswan discipulonkunapiwan kuska mijuyta qallariranku. 11  Chayta rikuspan fariseokunaqa Jesuspa discipulonkunata niranku: “¿Imaraykun yachachiqniykichis mijun impuesto cobraqkunawan juchasapa runakunawan ima?”, nispa. 12  Jesustaq chayta uyarispa niran: “Qhali runakunaqa manan doctorta necesitankuchu, onqosqakunan ichaqa necesitanku. 13  Chayrayku, riychis, jinaspa Diospa imachus nisqanta yachamuychis, paymi nin: ‘Khuyapayakuq kanaykichistan munani, manan sacrificiokuna jaywawanaykichistachu’, nispa. Noqaqa manan allin kausaq runakunata wajaqchu jamuni, aswanpas juchasapakunata wajaqmi”, nispa. 14  Chaymantataq Juanpa discipulonkuna jamuspanku Jesusta tapuranku: “Noqaykupas fariseokunapas ayunaykun, ¿imanaqtintaq discipuloykikunari mana ayunankuchu?”, nispa. 15  Jesustaq paykunata niran: “¿Llakikunkumanchu novioq amigonkuna paykunawan novio kashaqtin? Manan ¿riki? Ichaqa chayamunqan p’unchaykuna, chaypin novioqa paykunamanta qechusqa kanqa, chayñan paykunaqa ayunanqaku. 16  Manan pipas mauk’a p’achamanqa mosoq telawan remiendanmanchu, mana chayqa chay mosoq telan q’estispa* mauk’a p’achata chutarinman, chhaynapitaq astawan llik’irparinman. 17  Manallataqmi pipas mana poqosqa vinotaqa mauk’a odrekunaman* jich’aykunmanchu, chhayna kaqtinqa odrekunachá phatapunman vino poqoqtin, vinotaq jich’akapunman, odrekunapas manaña imapaqpas valepunmanchu. Aswanpas mana poqosqa vinotaqa mosoq odrekunamanmi jich’aykuna, chhaynapin odrepas mana phatanqachu, vinopas mana usunqachu”, nispa. 18  Chaykunata rimashallaqtinraqmi juj umalli runa payman achhuykuspa ñaupanpi k’umuykuran, jinaspa niran: “Ñachá ususiyqa wañurapunña, jamuy, payta llamiykampuway kausarinanpaq”, nispa. 19  Chaymi Jesusqa sayarispa discipulonkunawan kuska qhepanta riran. 20  Chayllamanmi chunka iskayniyoq wataña yawar apay onqoywan ñak’arishaq warmi Jesuspa qhepallanta achhuykuspa jawa p’achanpa cantonta llamiykuran. 21  Payqa sonqonpin nisqaña: “Jawa p’achallantapas llamiyrusaq chayqa, qhaliyarusaqmi”, nispa. 22  Jesustaq kutirispa payta rikuran, jinaspa niran: “¡Ususíy, kallpachakuy! Iñiyniykin qhaliyachisunki”, nispa. Chay ratomantapachan chay warmiqa qhali kapuran. 23  Umalli runaq wasinman jaykuspataq Jesusqa rikuran flauta tocaqkunata askha runakunatawan bullachakushaqta. 24  Jinan Jesusqa niran: “Lloqsiychis, sipaschaqa manan wañunchu, puñushallanmi”, nispa. Chayta niqtinmi paykunaqa pisichaspa asipayayta qallariranku. 25  Jawaman runakuna lloqsiruqtin jinataq sipaschaq kasqanman jaykuran, jinaspa makinmanta jap’iykuran, sipaschataq jatariran. 26  Chay pasasqantaqa llapa chay lado llaqtakunapin yacharanku. 27  Chaymanta Jesús rishaqtintaq iskay ñausa runakuna wajakuspa payta qatikuranku: “¡Davidpa Churin, khuyapayaykuwayku!”, nispa. 28  Juj wasiman jaykuqtintaq, chay ñausakunaqa payman achhuykuranku, jinan Jesusqa tapuran: “¿Iñinkichischu ñawiykichis kicharinaypaq atiyniyoq kasqayta?”, nispa. Paykunataq: “Arí, Señor”, nispa niranku. 29  Chaymi ñawinkuta llamiykuspa niran: “Iñisqaykichisman jina ruwasqa kachun”, nispa. 30  Ñawinkutaq kicharikapuran. Jinan Jesusqa paykunata allin-allinta kamachiran: “Amapunin pimanpas willankichischu”, nispa. 31  Paykunan ichaqa wasimanta lloqsispanku chayneqpi kaq llapa llaqtakunapi ayllukunapi ima Jesuspa imachus ruwasqanmanta willayta qallariranku. 32  Chay runakuna ripushaqtinmi Jesusman pusamuranku supaypa junt’aykusqan upa runata. 33  Chay supay qarqosqa kaqtintaq chay runaqa rimaripuran. Chaymi runakunaqa admirasqa niranku: “Israelpiqa manan jayk’aqpas rikukuranchu khayna ruwaykunaqa”, nispa. 34  Fariseokunataq ichaqa niranku: “Kay runaqa supaykunata kamachiqpa atiyninwanmi supaykunata qarqon”, nispa. 35  Jesusqa llapa llaqtakunata llapa ayllukunatawanmi puriran sinagogakunapi yachachispa, Diospa gobiernonmanta allin willakuykunata willaspa, imaymana onqoyniyoqkunata nanayniyoqkunatawan qhaliyachispa. 36  Runakunata rikuspan Jesusqa paykunata khuyapayaran, paykunatan rikuran mana michiqniyoq ovejakunata jina khuyay k’irisqata, ch’eqesqata. 37  Chaymi discipulonkunata niran: “Cosechanaqa askhapunin kashan, llank’aqkunan ichaqa pisilla kanku. 38  Chayrayku, cosecha oqarichiq dueñota rogakuychis cosechanman llank’aqkunata kachamunanpaq”, nispa.

Uraypi willakuykuna

“Qatikamuway” nispaqa Jesuspa discipulon kapuymantan rimashan.
“Q’estiy” simitaqa “q’entiy” otaq “encogekuy” nillankutaqmi.
Chaykunaqa karan uywa qaramanta ruwasqan.