Mateo 8:1-34

  • Lepra onqoyniyoq runa qhaliyachisqa kasqanmanta (1-4)

  • Juj capitán imayna iñiqchus kasqanmanta (5-13)

  • Capernaumpi askha runata Jesuspa qhaliyachisqanmanta (14-17)

  • Jesusta imayna qatikunamanta (18-22)

  • Sinchi wayrata Jesuspa upallachisqanmanta (23-27)

  • Supaykunata khuchikunaman qatiykusqanmanta (28-34)

8  Orqomanta Jesús uraykamuqtinqa ancha askha runakunan payta qatikuranku.  Chayllamanmi lepra onqoyniyoq runa jamuran, payman k’umuykuspataq niran: “Señor, munanki chayqa, atinkin qhaliyachiwayta”, nispa.  Chaymi Jesusqa makinta jaywarispa llamiykuran, jinaspa niran: “Arí, munanin, qhali kapuy”, nispa. Jinan chay runaqa kaq rato qhaliyapuran.  Chaymantataq Jesusqa niran: “Aman pimanpas willankichu, aswanpas sacerdoteman rispa qhawachikamuy, Moisespa kamachikusqanman jinataq ofrendaykita jaywamuy, chhaynapi onqoyniykimanta qhaliyapusqaykita yachanankupaq”, nispa.  Capernaum llaqtaman jaykuqtintaq ejercitopi capitán* jamuran, jinaspa valekuran:  “Wiraqocha, kamachiymi wasipi sinchita onqospa ñak’arishan, manan jatariytapas atinchu”, nispa.  Jesustaq niran: “Chayman chayaspayña qhaliyachisaq”, nispa.  Ejercitopi capitantaq niran: “Wiraqocha, noqaqa manan wasiypi qanta chaskinaypaq jinachu kani, aswanpas rimarillay, kamachiyqa qhaliyapullanqan.  Noqapas kamachina runan kani, kamachinitaqmi soldadokunatapas, jujnintan nini: ‘Phaway riy’, nispa, jinan rin; jujnintataq nini: ‘Jamuy’, nispa, jinan jamun; kamachiytapas nini: ‘Kayta ruway’, nispa, jinan ruwan”, nispa. 10  Chayta uyarispan Jesusqa anchata admirakuran, jinan qhepan riqkunata niran: “Cheqaqtan niykichis: Manan Israelpiqa pitapas khaynaniraq iñiyniyoq runataqa tariranichu. 11  Ichaqa niykichismi: Askhan inti lloqsimuy ladomanta inti jaykuy ladomantawan jamunqaku, jinaspa janaq pacha gobiernopi Abrahanwan, Isaacwan, Jacobwan ima mesapi tiyaykunqaku. 12  Janaq pacha gobiernoq wawankunan ichaqa tutayaq jawaman wijch’usqa kanqaku. Chaypin paykunaqa waqanqaku, mana imanakuyta atispankutaq kirunkutaraq k’achachachinqaku”, nispa. 13  Chaymantataq Jesusqa ejercitopi capitanta niran: “Riy, imaynachus iñiyniyki kasqanman jina qanpaq ruwasqa kachun”, nispa. Chay kamachintaq kaq rato qhaliyarapuran. 14  Pedroq wasinman jaykuspan Jesusqa rikuran Pedroq suegranta fiebre onqoywan puñunapi kashaqta. 15  Chaymi Jesusqa makinta llamiykuran, fiebretaq thanirapuran, jinan chay warmiqa jatarispa atiendeyta qallariran. 16  Ch’isintataq payman pusamuranku supaykunaq junt’aykusqan askha runakunata, Jesustaq juj simillawan chay espiritukunata qarqoran, llapan onqosqakunatapas qhaliyachiran. 17  Chhaynapin junt’akuran profeta Isaiaspa nisqan, paymi niran: “Paymi onqoyninchiskunata chinkachipuran, nanayninchiskunatapas apakapuran”, nispa. 18  Jesusqa muyuriqninpi askha runakunata rikuspan discipulonkunata kamachiran qocha chimpaman chimpanankupaq. 19  Chayllamanmi kamachikuy simita yachachiq runa payman achhuykuspa niran: “Yachachikuq, maytaña riqtiykipas qatikusaykin”, nispa. 20  Jesustaq niran: “Atoqkunapas t’oqoyoqmi, alton phawaq animalkunapas q’esayoqmi, runaq Churinpan ichaqa mana kanchu umanta maypi samaykachinallanpas”, nispa. 21  Jinan jujnin discipulon niran: “Señor, taytaytaraq ñaupaqta p’amparamusaq”, nispa. 22  Jesustaq niran: “Qanqa qatikamuwashallay, wañusqakunaña wañupuqninkutaqa p’ampashachunku”, nispa. 23  Boteman Jesús seqaqtintaq discipulonkunaqa paywan riranku. 24  Chayllamanmi qochapi sinchi wayra jatariran, jinan unuqa sinchita aytikuspa boteta millp’usharanña; Jesusmi ichaqa puñusharan. 25  Discipulonkunataq achhuykuspa rijch’achiranku: “¡Señor, salvawayku, chinkaykushanchisñan!”, nispa. 26  Jesustaq paykunata niran: “Pisi iñiyniyoq runakuna, ¿imaraykun sinchi mancharisqa kashankichis?”, nispa. Jinan payqa sayarispa wayratawan qochatawan phiñarikuran, chhaynapin thaj kapuran. 27  Paykunataq admirasqa niranku: “¿Pitaq kay runari, chaytaq wayrapas qochapas kasunri?”, nispa. 28  Qocha chimpapi Gádara runakunaq llaqtanman Jesús chayaqtintaq, supaykunaq junt’aykusqan iskay runakuna panteonmanta lloqsimuspa payman jamuranku, paykunaqa sinchi phiñan karanku, chaymi mana pipas chay ñanninta puriyta munaqchu. 29  Paykunan qapariranku: “Diospa Churin, ¿iman noqaykuwan ruwanayki? ¿Manaraq tiempopichu ñak’arichiqniyku jamushanki?”, nispa. 30  Paykunamanta karu chimpapitaq askhallaña khuchikuna mijusharanku. 31  Chaymi chay supaykunaqa rogakuranku: “Qarqowankiku chayqa, jaqay khuchikunaman qarqowayku”, nispa. 32  Jesustaq niran: “¡Riychisyá!”, nispa. Jinan paykunaqa chay runakunamanta lloqsispa khuchikunaman jaykuranku, chay khuchikunataq phawarispa llapanku qochaman urmaykuranku, unuwan jeq’epaspataq wañuranku. 33  Khuchi michiqkunataq ayqekuspa llaqtaman riranku, chaypin lliuta willakuranku, imachus chay supayniyoq runakunawan pasaran chaytapas willakurankun. 34  Jinan llaqtantin runakuna lloqsimuranku Jesuswan tupaq, payta rikuspataq valekuranku llaqtankumanta ripunanpaq.

Uraypi willakuykuna

Juj capitanqa Roma ejercitopi 100 soldadokunata kamachiqmi karan.