Mateo 7:1-29

  • JESUSPA ORQOPI YACHACHISQANMANTA (1-27)

    • Manan pitapas juzganachu (1-6)

    • Mañakushanallan, maskhashanallan, punkutapas takashanallan (7-11)

    • Imaynatachus jujkunata rikunamanta (12)

    • K’illku punku (13, 14)

    • Imachus ruwasqanpin pipas reqsisqa kanqa (15-23)

    • Qaqa patapi wasi, aqo patapi wasipiwan (24-27)

  • Jesuspa yachachisqanmanta runakunaq admirakusqan (28, 29)

7  ”Amaña pitapas juzgaychischu, chhaynapi mana juzgasqa kanaykichispaq,  imaynatachus juzgasqaykichisman jinan qankunapas juzgasqa kallankichistaq, imaynatachus jujkunata ruwankichis chhaynallataqmi qankunapas ruwasqa kankichis.  Chhaynaqa, ¿imaraykun wayqeykiq ñawinpi kaq ichhuta qhawanki, manataq reparakunkichu ñawiykipi kaq rakhu k’aspitaqa?  ¿Imaynapin wayqeykita niwaq: ‘Ñawiykipi kaq ichhuta orqorusayki’, nispa, ñawiykipi juj rakhu k’aspi kashaqtin?  ¡Iskay uya! Ñaupaqtaqa ñawiykimantaraq chay rakhu k’aspita orqokuy, chayraqmi allinta rikunki wayqeykiq ñawinpi kaq ichhuta orqonaykipaq.  ”Aman Diospa kaqninkunataqa alqokunaman qonkichischu, amallataq perlaykichiskunatapas* khuchikunaman wijch’unkichischu, paqtan saruchankuman, kutirimuspataq llik’irparisunkichisman.  ”Diosmanta mañakushallaychis, chaskinkichismi; maskhashallaychis, tarinkichismi; punkutapas takashallaychis, kicharimusunkichismi.  Pipas mañakuqqa chaskinmi, pipas maskhaqqa tarinmi, pipas takaqmanqa punkupas kichasqan kanqa.  ¿Mayqenniykichistaq wawaykichis t’antata mañakushaqtin rumita qowaqchis? 10  ¿Challwata mañakuqtinpas mach’aqwaytachu qowaqchis? 11  Qankunapas millay runaña kashaspapas yachankichismi wawaykichiskunaman allin regalokuna qoytaqa ¿riki? ¿Chaychu janaq pachapi kaq Yayaykichisqa mañakuqninkunaman allin kaqkunata mana qonman? 12  ”Chhaynaqa, imatachus runakuna ruwanasuykichista munankichis, chhaynallatataq qankunapas paykunata ruwaychis; chhaynatan nin kamachikuy simipas profetakunaq qelqasqanpas. 13  ”K’illku punkunta jaykuychis, ama jatun punkuntaqa; chayninta jaykuq anchollaña jatun ñanqa wañuymanmi apan, askhataqmi chaynintaqa rishanku; 14  k’illku punkunta jaykuq ñañu ñanmi ichaqa kausayman apan, pisillataqmi chaytaqa tarinku. 15  ”Cuidakuychis llulla profetakunamanta, paykunan ovejaman tukuspa qankunaman jamusunkichis, ukhunkupin ichaqa sinchi yarqasqa atoqkuna* kanku. 16  Paykunataqa imachus ruwasqankupin* reqsinkichis. ¿Pallakunmanchu uvasta kiskakunamanta, higostapas kisakunamanta? Manan ¿riki? 17  Chhaynallataqmi allin sach’aqa allin ruruta rurun, mana allin sach’an ichaqa mana valeq ruruta rurun. 18  Allin sach’aqa manan mana valeq rurutaqa rurunmanchu, nitaqmi mana allin sach’apas allin rurutaqa rurunmanchu. 19  Allin ruruta mana ruruq sach’aqa wit’usqa kaspan ninaman wijch’uykusqa kanqa. 20  Chhaynaqa, imachus ruwasqankupin chay runakunataqa reqsinkichis. 21  ”Manan llapa ‘Señor, Señor’ niwaqniychu janaq pacha gobiernomanqa jaykunqa, aswanpas janaq pachapi kaq Yayaypa munayninta ruwaqllan. 22  Chay p’unchaypiqa askhan niwanqaku: ‘Señor, Señor, ¿manachu sutiykipi profetizarayku, sutiykipi supaykunata qarqorayku, sutiykipi askha milagrokunatapas* ruwarayku?’, nispa. 23  Jinan paykunata nisaq: ‘¡Manapunin reqsiykichischu! ¡Ripuychis qayllaymanta, mana allin kaqta ruwaqkuna!’, nispa. 24  ”Pipas kay nisqaykunata uyarispa junt’aqqa qaqa patapi wasinta ruwaq allin yuyayniyoq runa jinan. 25  Sinchita paramuqtinmi unu yapakuran, jinaspa chay wasiman jaykuran, wayrapas sinchita wayramuspa wasiman waqtakuran, chay wasin ichaqa mana thunikuranchu qaqa patapi ruwasqa kasqanrayku. 26  Pipas kay nisqaykunata uyarispa mana junt’aqmi ichaqa, aqo patapi wasinta ruwaq mana yuyayniyoq runa jina kanman. 27  Sinchita paramuqtinmi unu yapakuran, jinaspa chay wasiman jaykuran, wayrapas sinchita wayramuspa wasiman waqtakuran, chay wasitaq urmaspa manchayta thunikapuran”, nispa. 28  Chaykunata Jesús rimayta tukuqtintaq runakunaqa anchatapuni admirakuranku imayna yachachisqanmanta. 29  Payqa Diospa nisqanman jinapunin yachachiq,* manan kamachikuy simita yachachiqkuna jinachu.

Uraypi willakuykuna

Perlaqa ancha valorniyoqmi, qespi rumi jinan, chayqa tarikun lamar-qochapi kaq wakin animalchakunaq ukhunpin.
Griego rimaypiqa “lobokuna” ninmi.
Griego rimaypiqa “rurusqankupin” ninmi, chaywanmi ichaqa rimashan imachus ruwasqankumanta.
Griego rimaypiqa “atiywan ruwaykunatapas” ninmi.
Griego rimaypiqa “atiywanmi yachachiq” ninmi.